Levitico 26 - Ti Biblia (1973)

Benbendicion iti panagtulnog. Dusdusa iti panaglabsing.

¹ Dicayto mangaramid iti didiosenyo, wenno mangbangon iti maysa a ladawan a kinitikitan, wenno maysa a monmon, wenno mangipasdeccayo iti uray ania a umas-asping a bato iti dagayo, tapno daytoy ti pagrucbabanyo: siac ni Jehova a Diosyo.

² Ngilinenyonto dagiti aldawco a panaginana, ket pagraemanyonto ti santuarioc: siac ni Jehova.

³ No magnacayo cadagiti nagbilinac, ket tungpalenyo dagiti bilbilinco, ket salimetmetanyo ida:

⁴ Itedconto ngarud dagiti tudo cadagiti carbenganda, ket ti daga pataudennanto ti apit, ket dagiti caycayo iti bangcag agbungadanto.

⁵ Ket ti panagbayoyo madanunanto ti panagburas iti uvas, ket ti panagburasyo madanunnanto ti panagipurruac; ket mangancayto nga agpennec iti taraonyo, ket agbiagcayto a sitatalged iti daga.

⁶ Ket itedconto ti talna iti daga, ket agiddacayto, ket awanto ti pagbutnganyo; pucawecto dagiti narungsot nga an-animal iti daga, dinto met lumabas ti campilan iti dagayo.

⁷ Ket camatenyonto dagiti cabusoryo, ket isuda mapasagdanto iti sangoyo, gapu iti campilan.

⁸ Ket ti lima cadacayo pagtarayendanto ti sangagasut, ket ti sangagasut cadacayo pagtarayendanto ti sangapulo ribu; ket dagiti cabusoryo mapasagdanto iti sangoyo gapu iti campilan.

⁹ Ket patgencayto, ket parangayencayto, ken paaduencayto, ket ibuangayconto ti tulagco cadacayo.

¹⁰ Ket canenyonto dagiti baac a pinenpen a nabayag a naidulin, ket alaenyonto nga umuna ti baac a gapu iti baro.

¹¹ Ket icabilconto iti nagtengngaanyo ti tavernaculoc: ket ti espirituc dinacayto carimon.

¹² Ket magnaacto iti nagtengngaanyo, ket siacto ti Diosyo, ket dacayto ti ilic.

¹³ Siac ni Jehova a Diosyo a nangaon cadacayo iti daga nga Egipto, tapno dicay mabag-en cadacuada; ket dinadaelco dagiti paco a nacaisangolanyo, ket pinatacdercayo a magna.

¹⁴ Ngem no didacto ipangag, ken dicayto aramiden amin dagitoy a bilbilinco;

¹⁵ Ket no iwacsiyonto dagiti nagbilinac, ket dagiti cararuayo guraenda dagiti bilbilinco, iti casta dicayo aramiden iti amin a bilbilenco, ngem labsingenyo ket di ti tulagco;

¹⁶ Siac aramidecto met daytoy cadacayo: mangicabilacto iti nacakigkigtot cadacayo, nga isu ti sarot ken gorigor a mangdadael cadagiti mata, ken mamagliday iti cararua ket dacayo imulayonto dagiti bin-iyo iti ubbaw, ta dagiti cabusoryo ti manganto.

¹⁷ Ket iparangconto ti rupac a bumusor cadacayo, ket dacayo macabilcayto iti sango dagiti cabusoryo; dagiti gumura cadacayo isudanto ti mangituray cadacayo; ket agtalawcayto nga uray awan ti cumamat cadacayo.

¹⁸ Ket no didacto pay la ipangag gapu cadagitoy, dusaencayto ngarud iti maminpito a daras pay gapu cadagiti basbasolyo.

¹⁹ Ket burakecto ti bileg ti cuspagyo: ket aramidecto ti langityo a cas landoc ken ti dagayo a cas suer;

²⁰ Ket ti pigsayo maibusto iti ubbaw; gapu ta ti dagayo awanto ti apitna, casta met dagiti caycayo iti daga didanto agbunga.

²¹ Ket no magnacayo iti maicaniwas caniac, ket didacto ipangag, yegconto cadacayo iti maminpito a saplit a mayannatup cadagiti basbasolyo.

²² Ket ibaonconto iti nagtenggaanyo dagiti an-animal a narungsot iti tay-ac a mangtacaw cadacayo cadagiti annacyo, ken mangdadael cadagiti an-animalyo, ken mangpabassitto iti bilangyo; ket dagiti dalanyo agbalindanto a langalang.

²³ Ket no gapu cadagitoy, dicayto la cayat ti mabagbagan caniac no di ket magnacayto laeng iti maibusor caniac;

²⁴ Iti casta magnanto met ngarud ti maibusor cadacayo, ket cabilencayto met iti maminpito gapu cadagiti basbasolyo.

²⁵ Ket yegconto cadacayo ti maysa a campilan a mangtungpal ti ibales ti tulag; ket dacayo aggoommungcayto nga agtitipon iti uneg ti iliyo: ket siac ibaonconto cadacayo ti angol; ket dacayo mayawatcayto iti ima ti cabusor.

²⁶ Intono dadaelec ti ungcay ti tinapayyo, sangapulo a babai dagiti manglutonto iti tinapayyo iti maysa nga horno, ket isublidanto nga ited a tinembeng ti tinapayyo: ket canenyonto, ket dicayto mapnec.

²⁷ Ket no amin cadagitoy didacto pay la ipangag, ngem busorendacto laeng;

²⁸ Ti casta siac siuungetacto a bumusor cadacayo ket dusaencayto met ti maminpito gapu cadagiti basbasolyo.

²⁹ Ket dacayo canenyonto ti lasag dagiti annacyo a lalaki, ken ti lasag dagiti annacyo a babbai canenyonto.

³⁰ Ket rebbaecto dagiti nangato a disso a pagdaydayawanyo ket duprakekto dagiti didiosenyo a ladladawan ti init, ket ipandagconto dagiti bangcayyo a natay iti ravaw dagiti bagbagi dagiti didiosenyo; ket ti cararuac carimonnacayto.

³¹ Ket pagbalinnecto a langalang dagiti il-iliyo, ket pagwalangwalangecto dagiti sansantuarioyo, ket diacto met say-upen ti banglo dagiti sayamusomyo.

³² Ket paglangalangecto ti daga; ket dagiti cabusoryo nga agnaed kencuana pagsidsiddaawandanto.

³³ Ket iwaraswarascayto cadagiti sabsabali a nacion, ket asutecto ti campilan iti licudanyo: ket iti dagayo awanto ti matagtagitao, ket dagiti iliyo walangwalangdanto.

³⁴ Iti casta lac-amento ti daga dagiti panaginana iti bayat ti panaglangalangana, ken caaddayo iti daga dagiti cabusoryo; isu met ti panaginananto ti daga ken panaglac-amna cadagiti panaginanana.

³⁵ Cas iti cabayag ti panaglangalangna casta met ti panaginanananto, nga isu ti inana a dina linac-am cadagiti al-aldawyo a panaginana, idi nagnaedcayo pay kencuana.

³⁶ Ket cadagiti mabati cadacayo patacrotecto ti pusoda cadagiti daga dagiti cabusorda; ket ti carasacas ti maysa a bulong a maipalais pagtarayennanto ida; ket tumaraydanto a cas iti maysa nga itarayanna ti campilan, ket maipasagdanto nga uray awan cumamat.

³⁷ Ket isuda maysanmaysa masipparodnanto ti caduana, a cas la adda campilan iti licudan, idinto nga awan agcamat: ket dicayto maitured ti sumango cadagiti cabusoryo.

³⁸ Ket dacayo matmataycayto iti inilinili, ket ti daga dagiti cabusoryo ibusennacayto.

³⁹ Ket dagiti matda cadacayo, cumcumbetdanto iti kinadakesda cadagiti dagdaga dagiti cabusoryo; ken casta met a iti kinadakes dagiti nagannac cadacuada cacancanunongdanto ida a cumcumbet.

⁴⁰ Ket isuda ipudnodanto dagiti kinadakesda, ken ti kinadakes dagiti ammada, iti salungasingda nga isu ti panangsalungasingda caniac, ken casta met gapu ta nagnada iti maibusor caniac,

⁴¹ Siac met a maibusor cadacuada, ket impanco ida iti daga dagiti cabusorda: no ngarud no agpacumbaba dagiti puspusoda a di nakugit, ket annugotenda ti dusa ti kinadakesda;

⁴² Malagipconto ngarud ti tulagco ken Jacob; ken casta met ti tulagco ken Isaac, ken casta met ti tulagco ken Abraham malagipconto; ket malagipconto ti daga.

⁴³ Ti daga casta met a mabaybay-an gapu cadacuada, ket lac-amenanto dagiti panaginanana iti bayat ti panaglangalangna nga awanda: ket annugotendanto ti dusa ti basolda; ta gapu ta inwacsida dagiti bilbilinco, ket dagiti carcararuada kinaumada dagiti nagbilinac.

⁴⁴ Ket nupay casta amin dagita, idinto nga addada iti daga dagiti cabcabusorda diacto iwacsi ida, diacto met cauma ida, tapno rebbekec ida nga italipupos, ken tapno mawara ti tulagco cadacuada; ta siac ni Jehova a Diosda;

⁴⁵ Ngem lagipecto a maipaay cadacuada ti tulag dagiti nakin-putot cadacuada nga inaonco iti daga nga Egipto iti imatang dagiti nasnacion, tapno siac coma ti Diosda siac ni Jehova.

⁴⁶ Dagitoy dagiti nagbilinan ken bilbilin, ken al-alagaden nga intuyang ni Jehova isu ken cadagiti annac ti Israel idiay bantay Sinai gapu ken Moises.