Levitico 25 - Ti Biblia (1973)

Ti tawen a panaginana ken ti tawen a jubileo.

¹ Ket ni Jehova nakisao ken Moises idiay bantay Sinai, a kinuana,

² Ibagam cadagiti annac ti Israel, a cunam cadacuada, No macagteng cayo iti daga nga itedco cadacayo, ti daga ngilinennanto ti maysa a panaginana ken Jehova.

³ Cadagiti innem a tawen mulaamto ti daga, ken cadagiti innem a tawen arbasamto ti cauvasam, ket burasemto dagiti bungbungana;

⁴ Ngem iti maicapito a tawen isunto ti maysa a panaginana ti nadaeg nga inana a maipaay iti daga, maysa nga inana ken Jehova: dicanto mulaan ti dagam, wenno arbasan ti cauvasan.

⁵ Ti tumubtubo laeng iti nagapitam dicanto anien, ket dagiti uvas ti puon a di naarbasan, dicanto burburasen: isunto ti tawen ti nadaeg a panaginana ti daga.

⁶ Ket iti panaginana ti daga agservidanto a taraon cadacayo; kenca, ken ti bag-enmo a lalaki ken babai, ken iti adipenmo a makitegtegged ken iti gangannaet a makipagtaeng kenca.

⁷ Ken dagiti amin a bungbungada agservidanto a taraon cadagiti vacvacam, ken cadagiti an-animal nga adda iti dagam.

⁸ Ket sica bumilangcanto cadagiti pito a tawen a panaginana, maminpito daras a pito a tawtawen; ket addanto kenca a bilang dagiti pito a tawtawen a panaginana, nga isuda dagiti uppat a pulo ket siam a tawtawen.

⁹ Isursuryonto ngarud ti aweng ti tangguyob iti maicasangapulo nga aldaw ti maicapito a bulan; iti aldaw ti pannacaabbong isursuryonto ti tangguyob iti amin a dagayo.

¹⁰ Ket ngilinenyonto ti maicalima pulo a tawen, ket iwarragawagyonto ti wayawaya iti daga cadagiti amin nga agnaed kencuana: isunto ti maysa a jubileo cadacayo, ket masublianyonto tumunggal maysa a tao iti dagana, ket agsublicayto tunggal maysa a tao iti familiana.

¹¹ Maysanto a jubileo cadacayo, ti maicalimapulo a tawen: dicayto agmula wenno agani cadagiti timmubtubo laeng, wenno burasen dagiti uv-uvas cadagiti puon a dinaarbasan.

¹² Gapu ta isu ti jubileo; isunto ti nasantoan cadacayo: canenyonto ti bungbunga iti dayta a tawen nga aggapu iti taltalon.

¹³ Iti daytoy a tawen a jubileo, dacayo isubliyonto tunggal maysa iti cucuana.

¹⁴ Ket no mangilacocayo iti uray ania iti padayo a tao, wenno gumatangcayo iti sanicua ti padayo a tao, dicayto agginnallilaw.

¹⁵ Cas mayannurot iti bilang dagiti tawtawen iti calpasan ti jubileo, gumatangcanto iti padam a tao, ken cas mayannurot iti bilang dagiti tawtawen dagiti ap-apit, isu ti panaglaconanto kenca.

¹⁶ Cas mayannurot iti caadu dagiti tawtawen yadadomto ti nginana, ken cas mayannatup iti cabassit dagiti tawtawen, ibasbassit monto met ti nginana; ta ti bilang dagiti ap-apit ti panglacoanna kenca.

¹⁷ Ket dicayto aggiinnallilaw, no di ket agbutengcayto iti Diosyo: siac ni Jehova a Diosyo.

¹⁸ Isu ti gapuna a tungpalenyonto dagiti bilbilinco, ket salimetmetanyonto dagiti ipaalagadco ken sungputenyo ida; ket agtalinaedcayto a sitatalged iti daga.

¹⁹ Ket ti daga itednanto ti bungana, ket mangancayto nga agpennec, ket agnaedcayto a sitatalged idiay.

²⁰ Ket no cunayonto, Ania ti canenminto iti maicapito a tawen? adtoy dicamto agmula wenno burasen dagiti apitmi;

²¹ No casta ibaonconto ti bendicionco cadacayo iti maicanem a tawen, ket agbunganto iti maipaay cadagiti tallo a tawen.

²² Ket agmulacayto iti maicawalo a tawen ket mangancayto cadagiti bungbunga a baac a pinenpenpen; inggana iti maicasiam a tawen, agpapan iti panagbungada, mangancayto iti baac a pinenpen.

²³ Ket ti daga saanto a malaco iti awan patinggana, ta ti daga cucuac: ta dacayo gangannaet ken makipagtaengcayo la caniac.

²⁴ Ket iti amin a daga nga icutanyo ipasubbotyonto.

²⁵ No ti cabsatmo ta pumanglaw, ket mangilaco cadagiti cucuana, ti cabagianna a caasitgan umaynanto subboten ti inlaco ni cabsatna.

²⁶ Ket no ti maysa a tao awan kencuana ti mangsubbot, ket bimmacnangen, ket addaanton ti umanay a pagsubbotna;

²⁷ Ibilangna ngarud dagiti tawen a pannacalacona ket isublina ti matda iti nangilacoanna; ket agsublinto ti panagtagicuaenna.

²⁸ Ngem no dinanto mabalin a pasublien kencuana, daydiay ngarud inlacona, mabatinto iti ima ni gimmatang agingga iti tawen a jubileo: ket iti dayta a jubileo mayawatto, ket ti naglaco agsublinto iti cucuana.

²⁹ Ket no ti maysa a tao ilacona ti maysa a balay a pagnaedan, iti maysa a ciudad a nabacudan, mabalinna a subboten iti uneg ti macatawen iti calpasan ti pannacailacona; iti las-ud ti apag-isu a macatawen addanto calinteganna iti panagsubbotna.

³⁰ Ket no dinto masubbot iti las-ud ti apag-isu a macatawen, ti balay ngarud nga adda iti uneg ti nabacudan a ciudad mapatalgedanto ken gimmatang ti panagtagicuana nga agnanayon agpapan putotna: dinto maisubli iti tawen a jubileo.

³¹ Ngem dagiti balbalay dagiti il-ili nga awan bacudda nga aglawlaw maipadadanto cadagiti taltalon iti away: dagitoy masbutdanto, ken maisublidanto iti tawen a jubileo.

³² Nupay casta dagiti il-ili dagiti Levitas, dagiti balbalay cadagiti il-ili a pagtagicuaanda, mabalin dagiti Levitas a subboten iti uray ania nga aldaw.

³³ Ket no maysa cadagiti Levitas ti summubbot, ti balay ngarud a nalaco, ken ti ciudad a pagtagicuaanna maisublidanto no tawen a jubileo; ta dagiti balbalay cadagiti il-ili dagiti Levitas cucuada ida iti nagtengaan dagiti annac ti Israel.

³⁴ Ngem ti talon a maidarapat cadagiti il-ilida saan a maipalubos nga ilacoda; ta daytoy ti mataginayon a cucuada.

³⁵ Ket no ti cabsatmo ta pumanglaw, ket ti imana agpasag kenca; saranayemto ngarud cas maysa a gangannaet, ken maysa a makipagtaeng, makipagbiag kenca.

³⁶ Dicanto aramaten ti panagpatubo kencuana wenno pamaadu, no di ket agbutengcanto iti Diosmo; tapno ti cabsatmo makipagbiag kenca.

³⁷ Dicanto ited kencuana ti piracmo iti panagpatubo, wenno ited kencuana dagiti saganam a taraonmo tapno paaduem.

³⁸ Siac ni Jehova a Diosyo a nangaon cadacayo iti daga nga Egipto itedco cadacayo ti daga a Canaan, ken tapno siac ti Diosyo.

³⁹ Ket no ti cabsatmo a sitataeng kenca pumanglaw, ket ilacona ti bagina kenca; dicanto pagservien a cas bag-en.

⁴⁰ Cas maysa a mangmangged ken cas maysa a makipagtaeng, agnaedto kenca: isu agservinto kenca inggana iti tawen a jubileo:

⁴¹ Isu ti panangpanawnanto kenca, isu ken dagiti annacna nga agcucuyogda ket agsublinto iti familiana, ken agsublinto iti daga dagiti ammana.

⁴² Gapu ta adipenco ida nga inaonco iti daga nga Egipto: saandanto a malaco a bag-en.

⁴³ Dicanto iturayan iti nainget, no di ket agbutengcanto iti Diosmo.

⁴⁴ Ket iti maipapan cadagiti bagbag-enmo a lallaki ken babbai nga addanto kenca: cadagiti nasnacion a caparangetmo ti paggatangam iti bagbag-enmo a lallaki ken babbai.

⁴⁵ Maysa pay a cadagiti annac dagiti gangannaet a makipagtaeng cadacayo ti pangatanganyonto, ken cadagiti familiasda a makipagyan cadacayo, a pinutotda iti dagayo: ket cucuayonto ida.

⁴⁶ Ket pagbalinenyonto ida a maysa a tawid a maipaay cadagiti annacyo a sumaganad cadacayo tapno icutanda ida a sanicua: cadacuada ti pangalaanyonto cadagiti bag-enyo nga agnanayon: ngem cadagiti cacabsatyo nga annac ti Israel dicayto agtitinnuray iti nainget iti maysa ken maysa.

⁴⁷ Ket no maysa a gangannaet wenno makipagili kenca bimmacnang, ket ti cabsatmo pimmanglaw iti sibayna, ket ilacona ti bagina iti gangannaet, wenno makipagili kenca, wenno iti capuonan ti familia ti gangannaet;

⁴⁸ Calpasan ti pannacailacona mabalin a masbot: maysa cadagiti cacabsatna mabalinna a subboten;

⁴⁹ Wenno ti ulitegna, wenno anac ti ulitegna ti mangsubbot kencuana, wenno siasino nga asideg a cabagianna iti caputotanna ti mangsubbot kencuana, wenno no isu bumacnang, subbotenna ti bagina met laeng.

⁵⁰ Ket makibinnilangto ken gimmatang kencuana manipud iti tawen a pannacailacona inggana iti tawen a jubileo ket ti pateg ti nacailacoanna maitutopto iti bilang dagiti tawtawen, a maitutop iti bayag ti caaddananto a maysa a bag-en kencuana.

⁵¹ No adu a tawtawen pay, a maitutop iti caaduda, isublinanto ti bayad ti pannacasubbotna iti pirac a nacagatanganna.

⁵² Ket no bassit laengen a tawen ti matda agpapan iti tawen a jubileo, makibinnilangto ngarud kencuana: ti maitutop cadagiti tawtawenna a nagservi isublinanto ti bayad ti pannacasubbotna.

⁵³ Cas maysa a tagabu a mabayadan iti tinawentawen agyanto kencuana: dinanto iturayan iti nainget iti imatangmo.

⁵⁴ Ket no dinto macasbot cadagitoy a pamuspusan, lumapsutto ngarud no tawen a jubileo, isu ken dagiti annacna a maicuyog kencuana.

⁵⁵ Gapu ta adipenco ida dagiti annac ti Israel; isuda ti adipenco nga inaonco iti daga nga Egipto: siac ni Jehova a Diosyo.