Levitico 24 - Ti Biblia (1973)

Ti silaw ken ti tinapay ti santuario. Ti pannacadusa ti panagtabbaaw.

¹ Ket ni Jehova nakisao ken Moises, a kinunana,

² Ibilinmo cadagiti annac ti Israel a mangyegda kenca ti nadingpil napulpulos a lana ti olivo a pagsilaw, a pagsedden iti pagsaingan tapno sigagangat nga agnanayon.

³ Iti ruar ti abbong ti pamanecnec, iti uneg ti tolda ti gimong, taripatoento ni Aaron manipud iti malem inggana iti bigat iti saclang ni Jehova iti cancanayon: isunto ti alagaden nga agnanayon cadagiti putputotyo.

⁴ Isu taripatoennanto a siuurnos iti patinayon dagiti pagsaingan iti rabaw ti nadalus a candelero iti saclang ni Jehova.

⁵ Ket sica mangalacanto iti namayecmec nga harina, ket manglutocanto idiay iti sangapulo ket dua a bibingca: dua nga apagcasangapulo ti maysa a efa, isunto ti maysa a bibingca.

⁶ Ket sica urnosemto ida iti dua nga intar, innem iti maysa nga intar iti rabaw ti nadalus a lamisaan iti saclang ni Jehova.

⁷ Ket iccamto iti nadalus nga incienso iti rabaw ti tunggal intar, tapno maipaay iti tinapay a panglagip, a maysa met laeng a daton a maaramid iti apuy ken Jehova.

⁸ Tunggal aldaw a panaginana urnosennanto iti sango ni Jehova iti agnanayon; isu ti awan patinggana a tulag a maipaay cadagiti annac ti Israel.

⁹ Ket maipaayto ken Aaron ken dagiti annacna a lallaki: ket canendanto iti maysa a nasantoan a disso, gapu ta isu ti nasantoan unay kencuana cadagiti datdaton a naaramid iti apuy ken Jehova gapu iti agnanayon nga alagaden.

¹⁰ Ket ti anac a lalaki ti babai nga Israelita, a ti amana maysa nga Egipcio, a napan cadagiti annac ti Israel; ket ti anac ti Israelita a babai ken ti maysa a lalaki nga Israelita nagcabilda a dua iti uneg ti pacarso:

¹¹ Ket ti lalaki nga anac ti babai nga Israelita nagbassawanganna ti Nagan ni Jehova, ket naglunud; ket impanda ken Moises. Ket ni inana agnagan idi iti Salomit, nga anac ni Dibri iti caputotan ni Dan.

¹² Ket impanda iti pagbaludan tapno malawlawagan cadacuada iti ngiwat ni Jehova.

¹³ Ket ni Jehova nakisao ken Moises, a kinunana,

¹⁴ Ipanyo iti ruar ti pacarso dayta nagtabbaaw idi; ket dagiti nacangngeg kencuana ipatayda coma dagiti imimada iti olona, ket amin ti gimong batoenda coma.

¹⁵ Ket sica ibagamto cadagiti annac ti Israel, ket cunam Siasinoman a mangilunud iti Diosna, baclayennanto ti basolna.

¹⁶ Ket ti agtabbaaw iti nagan ni Jehova, dinto bumurong a mapapatay; pudno a dagup ti gimong batoendanto: gangannaet man wenno umili no pagtabbawanna ti nagan ni Jehova, mapapatayto.

¹⁷ Ket ti mangpapatay ti padana a tao, dinto bumurong a mapapatay,

¹⁸ Ket ti mangpapatay ti maysa nga animal rebbengna a sucatan, biag iti biag.

¹⁹ Ket no ti maysa a tao ranggasanna ti padana a tao, cas ti inaramidna, casta met ti maaramidto kencuana:

²⁰ Ranggas ken ranggas, mata ken mata, ngipen ken ngipen; cas ti ranggas nga aramidennanto iti sabali a tao, casta met ti maaramidto kencuana.

²¹ Ket ti mamapatay iti maysa nga animal, supapacannanto: ket ti mamapatay iti maysa a tao, mapapatayto.

²² Maymaysanto a kita ti linteg ti alagadenyo cas iti maaramid iti gangannaet casta met ti maaramid iti umili: ta siac ni Jehova a Diosyo.

²³ Ket ni Moises imbagana cadagiti annac ti Israel, ket isuda inruarda iti pacarso ti naglunud, sada inubur cadagiti batbato. Ket dagiti annac ti Israel inaramidna ti cas imbilin ni Jehova ken Moises.