Levitico 21 - Ti Biblia (1973)

Sapasap a gunamgunam cadagiti papadi.

¹ Ket ni Jehova kinunana ken Moises, Ibagam cadagiti papadi nga annac a lallaki ni Aaron, ket saoem cadacuada, Awanto ti mangmulit iti bagina met laeng a maipuon iti natay cadagiti cailiana;

² Malacsid ti maipanggep iti cabagianna nga asideg, isu nga inana, ken amana, ken anacna a lalaki, ken anacna a babai, ken cabsatna a lalaki,

³ Ken cabsatna a babai a balasang, nga asideg kencuana, a di pay naasawaan; a gapu kencuana maipalubos nga mulitanna ti bagina.

⁴ Isu dinanto mulitan ti bagina a ti bagina met laeng a pagrugitenna, idinto nga isu maysa a natan-oc a lalaki iti ilina, dina tulawan ti bagina.

⁵ Didanto pagcalbuen ti oloda wenno kiskisan ti agsumbangir ti timidda, wenno aramiden ti uray ania a sugat iti lasagda.

⁶ Agsantodanto iti Diosda, ket dida rugitan ti nagan ti Diosda; ta idatagda dagiti datdaton ken Jehova a naaramid iti apuy, ti tinapay ti Diosda: iti casta agsantodanto.

⁷ Isuda didanto makiasawa iti babai a balangcantis, wenno natulawan didanto met alaen ti babai nga insina ti asawana: ta ti padi nasantoan iti Diosna.

⁸ Pasantoemto ngarud, ta idatonna ti tinapay ti Diosmo: isu santonto kenca; ta siac ni Jehova a mamagsanto cadacayo, santoac.

⁹ Ket ti anac a babai ti uray asino a padi no tulawanna ti bagina iti panagbalangcantis, rugitanna ni amana: isu mapuuranto iti apuy.

¹⁰ Ket ti cangatoan a padi cadagiti cacabsatna a lallaki, nga iti rabaw ti olona nabuyatan iti lana a pangpulot, ken naconsagrar a mangicapet cadagiti cawes, dinanto wacrayen ti boocna, wenno pigisen dagiti cawesna;

¹¹ Wenno dinto met sumbrec iti uray adino a yan ti bagi a natay, wenno dinanto mulitan ti bagina a maipuon ken amana, wenno ken inana;

¹² Dinto met rumuar iti santuario, wenno tulawan ti santuario ti Diosna; gapu ta ti balangat a lana a pangpulot ti Diosna adda kencuana; siac ni Jehova.

¹³ Ket isu mangasawanto iti maysa a balasang.

¹⁴ Balo a babai, wenno nakisina, wenno maysa a natulawan, maysa a balangcantis, dinto mangasasawa cadagitoy; ngem ti maysa a virgen iti ilina met laeng asawaennanto.

¹⁵ Ket dinanto rugitan ti putotna iti baet dagiti cailianna: ta siac ni Jehova a mamagsanto kencuana.

¹⁶ Ket ni Jehova nakisao ken Moises, a kinunana,

¹⁷ Ibagam ken Aaron, a cunam, Uray asino a lalaki cadagiti putotmo cadagiti amin a putputotda nga adda pilawna, saan a maipalubos nga umasideg tapno mangidaton iti tinapay ti Diosna.

¹⁸ Ta uray asino a lalaki nga adda pilawna, dinto umasideg: ti lalaki a bulsec, wenno pilay, wenno lugpac ti agongna, wenno nagsuroc iti uray ania,

¹⁹ Wenno maysa a lalaki a nablo ti sacana, wenno nablo ti imana,

²⁰ Wenno cubbo, wenno maysa a pandaca, wenno maysa nga mapilaw iti matana, wenno aggudgud, wenno aglatlat, wenno napis-it dagiti bukelbukel;

²¹ Iti putot a lalaki ni Aaron a padi, ti adda pilawna dinto umadani a mangipaay cadagiti datdaton a maaramid iti apuy ken Jehova; adda pilawna; dinto umadani a mangidaton iti tinapay ti Diosna.

²² Manganto iti tinapay ti Diosna, uray tinapay man a nasantoan unay ken ti nasantoan:

²³ Isuna laeng a dinto sumbrec iti uneg ti abbong, wenno umasideg iti altar, gapu ta adda pacapilawanna; tapno dina rugitan dagiti santuarioc: ta siac ni Jehova a mamagsanto cadacuada.

²⁴ Casta ti pinangibaga ni Moises ken Aaron ken cadagiti annacna a lallaki, ken cadagiti amin nga annac ti Israel.