Levitico 20 - Ti Biblia (1973)

Ti panagdayaw ken Moloch ken sabsabali pay a basbasol maipawilda. Linlinteg a cacaniwas ti panagderrep. Bilin a sungpoten. Dagiti linlinteg ti kinadalus.

¹ Ket ni Jehova nakisao ken Moises, a kinunana,

² Maysa pay, ibagamto cadagiti annac ti Israel, Siasinoman a lalaki cadagiti annac ti Israel, wenno cadagiti gangannaet a makipagtaeng iti Israel a mangted cadagiti putotna ken Moloch: di bumurong a mapapatayto; dagiti tattao ti daga uburendanto cadagiti batbato.

³ Iparangconto met ti rupac a sibubusor iti dayta a tao, ket ipusayconto cadagiti cailianna; ta isu nangted iti putotna ken Moloch, a pinangmulitna iti santuarioc, ken pinangipabpabarengna iti nasantoan a naganco.

⁴ Ket no dagiti tattao ti daga ilemmengda a talipupusen dagiti matada iti dayta a tao no mangted cadagiti putotna ken Moloch, ket dida papatayen:

⁵ Siac ngarud iparangarangconto ti rupac a bumusor iti dayta a tao, ken bumusor cadagiti cacabagianna, ket ipusayconto, agraman amin a sumurot kencuana nga agbalangcantis, tapno makibalangcantis ken Moloch, ipusayconto ida cadagiti cailianda.

⁶ Ket ti tao a sumurot cadagiti mangcuculam, ken cadagiti agsalsalamangca nga agbalangcantis cadacuada, pudno nga iparangconto ti rupac a bumusor iti dayta a tao, ket ipusayconto cadagiti cailianna.

⁷ Pasantoenyo ngarud dagiti bagbagiyo, ket agsantocayo; ta siac ni Jehova a Diosyo.

⁸ Ket sungpotenyonto dagiti ipaalagadco, ket aramidenyonto ida; siac ni Jehova a mamagsanto cadacayo.

⁹ Ta amin a lalaki a mangilunod ken amana, wenno ken inana, dinto bumurong a mapapatay: isu inlunodna ni amana, wenno ni inana; ti darana maipaawitto kencuana.

¹⁰ Ket ti lalaki a makicamalala iti asawa ti sabali a lalaki, uray ti makicamalala iti asawa ti carrubana a lalaki, ti lalaki ken ti babai nga agcamalala dinto bumurong a mapapatayda.

¹¹ Ket ti lalaki a makicaidda iti asawa ni amana linucaisanna ti bagi nga ibain ni amana: isuda a dua dinto bumurong a mapapatayda; ti darada maipaawitto cadacuada.

¹² Ket no ti maysa a lalaki makicaidda iti manugangna a babai, isuda a dua dinto bumurong a mapapatayda: inaramidda ti gampor; ti darada maipaawitto cadacuada.

¹³ Ket no ti lalaki makicaidda iti padana a lalaki nga ibilangna a cas babai, isuda a dua nacarimrimon ti aramidda: dinto bumurong a mapapatayda, ti darada maipaawitto cadacuada.

¹⁴ Ket no ti maysa a lalaki mangasawa iti agina, daytoy isu ti kinadakes: isuda mapuurandanto iti apuy, isu ken isuda met: tapno awan kinadakes cadacayo.

¹⁵ Ket no ti maysa a lalaki makicaidda iti maysa nga animal, dinto bumurong a mapapatay: ket dacayo patayenyonto ti animal.

¹⁶ Ket no maysa a babai umasideg iti uray ania nga animal ket caiddana, sica papatayemto ti babai, ken ti animal, dinto bumurong a mapapatayda; ti darada maipaawitto cadacuada.

¹⁷ Ket no ti maysa a lalaki alaenna ni cabsatna a babai, nga anac ni amana, wenno anac ni inana, ket makitana ti bagi nga ibain ni cabsatna, ket daytoy a babai makitana met ti bagi nga ibain ni cabsatna a lalaki; daytoy isu ti aramid a nacababain unay; ket isuda maipusaydanto iti imatang dagiti annac ti ilida: isu linucaisanna ti bagi nga ibain ni cabsatna a babai; isu lacamennanto ti kinadakesna.

¹⁸ Ket no ti maysa a lalaki makicaidda iti maysa a babai nga agsangaili a madama, ket lucaisanna ti bagi nga ibainna; isu linucaisanna ti pagtubboganna, ket ti babai linucaisanna ti pagtubbogan ti darana: ket isuda a dua maipusaydanto cadagiti cailianda.

¹⁹ Ket sica dicanto lucaisan ti bagi nga ibain ni cabsat a babai ni inam, wenno cabswat a babai ni amam; gapu ta linucaisanna ti bagi nga ibain ni cabagianna nga asideg: isuda awitendanto ti kinadakesda.

²⁰ Ket no ti maysa a lalaki makicaidda iti asawa ni ulitegna, isu linucaisanna ti bagi nga ibain ni ulitegna: isuda awitendanto ti basolda; mataydanto nga awan anacda.

²¹ Ket no ti maysa a lalaki alaenna ti asawa ni cabsatna, daytoy nga aramid kinarugit: isu linucaisanna ti bagi nga ibain ni cabsatna: awanto ti anacda.

²² Iti casta tungpalenyonto amin dagiti ipaalagadco, ken amin dagiti bilbilinco, ket salimetmetanyonto ida; tapno ti daga a pangyegac cadacayo a pagnaedanyo, dinacayto isarua.

²³ Ket dacayo dicayto pagdalanan dagiti awid dagiti tattao a papanawec iti sangoananyo: gapu ta isuda inaramidda amin dagitoy, ket iti casta kinagurac ida.

²⁴ Ngem kinunac cadacayo, tawidenyonto ti dagada, ket itedconto cadacayo a cucuayo, maysa a daga nga agay-ayus ti gatas ken diro: siac ni Jehova a Diosyo, a nangilasin cadacayo cadagiti tattao.

²⁵ Iti casta rebbengyo a paggigidiaten ti animal a nadalus ken narugit, ken ti narugit a tumatayab ken nadalus: ket dicayto pagbalinen a nacarimrimon dagiti cararuayo gapu iti animal, wenno gapu iti tumatayab, wenno gapu ti uray ania nga agay-ayam iti daga, isuda nga inlasinco a narugit cadacayo.

²⁶ Ket dacayo agsantocayto caniac: ta siac a Jehova santoac, ken inlasincayo cadagiti tattao, tapno dacayo ti cucuac.

²⁷ Casta met ti maysa a lalaki wenno babai a mangcuculam wenno managsalamangca, dinto bumurong a mapapatay: uburendanto ida cadagiti batbato, ti darada maipaawitto cadacuada.