Levitico 2 - Ti Biblia (1973)

Ti linteg cadagiti daton a bel-laay.

¹ Ket no adda mangipaay iti daton a bel-laay ken Jehova, ti namayecmec nga harina idatonnanto; ket buyatannanto iti lana, sana icabilto ti incienso;

² Ket ipannanto cadagiti papadi nga annac a lallaki ni Aaron; ket isu irakemnanto ti imana iti dadduma nga harinana a namayecmec, ken iti dadduma a lanana, agraman amin a inciensona; ket ti padi puurannanto iti altar a cas panglagip kencuana, maysa a daton a maaramid iti apuy, a nabanglo a sayamusom ken Jehova:

³ Ket ti matda iti daton a bel-laay maipatagicuanto ken Aaron ken dagiti annacna a lallaki: isu ti maysa nga aramid a nasantoan unay dagiti datdaton a maaramid iti apuy ken Jehova.

⁴ Ket no mangidatagca iti daton a bel-laay a naluto iti horno, isunto dagiti torta nga harina a namayecmec nga awan levadurana, a nagamayan iti lana, wenno dagiti bibingca a di-nalevaduraan a sinapsapoan iti lana.

⁵ Ket no ti idatagmo maysa a daton a bel-laay a naluto iti bandeja ti horno, dagitinto namayecmec nga harina a di-nalevaduraan a nagamayan iti lana.

⁶ Pispisiemto ket lanaamto: isu ti maysa a daton a bel-laay.

⁷ Ket no ti idatagmo maysa a daton a bel-laay a naluto iti parioc, ti namayecmec nga harina nga adda lanana ti maaramidto.

⁸ Ket ipanmonto ti daton a bel-laay a naaramid cadagitoy a ramitramit ken Jehova: ket isunto ti maiparang iti padi, ket isu ipannanto iti altar.

⁹ Ket ti padi mangalanto iti daton a bel-laay ti panglaglagip kencuana, ket puurannanto iti rabaw ti altar, maysa a daton a maaramid iti apuy, a nabanglo a sayamusom ken Jehova.

¹⁰ Ket ti matda iti daton a bel-laay cucuanto ni Aaron ken dagiti annacna a lallaki: isu ti maysa nga aramid a nasantoan unay cadagiti datdaton a maaramid iti apuy ken Jehova.

¹¹ Saanto a nalevaduraan ti daton a bel-laay nga idatonyonto ken Jehova; ta dicayto puuran ti levadura wenno diro a daton a naaramid iti apuy ken Jehova.

¹² Idatagyonto ida a pagdaton dagiti umuna a bungbunga ken Jehova: ngem saandanto a maipan nga agservi a nabanglo a sayamusom iti rabaw ti altar.

¹³ Ket tumunggal maidatag ti datonmo a bel-laay asinamto; ket dicanto liwayan ti asin ti tulag ti Diosmo iti datonmo a bel-laay: dagup amin a datonmo pakidatonmonto ti asin.

¹⁴ Ket no idatagmo ti maysa a daton a canen dagiti umuna a bungbunga ken Jehova, ipaaymonto a daton a canen dagiti umuna a bunbunga ti trigo a sibubukel ti dawana a nairuban, napilpil a binukel ti nalangto a dawa.

¹⁵ Ket iccamto iti lana, saca parabawanto ti incienso: isu ti maysa a daton a canen.

¹⁶ Ket ti padi puurannanto ti panglagip itoy, nga isu ti dadduma ti napilpil a bukel, ken ti dadduma ti lanana, agraman amin ti inciensona: isu ti maysa a daton a maaramid iti apuy ken Jehova.