Levitico 19 - Ti Biblia (1973)

Naduma duma a linlinteg.

¹ Ket ni Jehova nakisao ken Moises, a kinunana,

² Ibagam iti dagup ti gimong dagiti annac ti Israel, ket soem cadacuada, Dacayo agsantocayto; gapu ta siac a Jehova a Diosyo, santoac.

³ Tummunggal maysa a tao cadacayo cabutengnanto ni inana ken amana; ket ngilinenyonto dagiti aldaw a panaginana: siac ni Jehova a Diosyo.

⁴ Dicay subsublian dagiti ladladawan, dicay met agar-aramid iti sinucog a didiosen: siac ni Jehova a Diosyo.

⁵ Ket no mangidatag cayo cadagiti datdaton iti cappia ken Jehova, idatonyonto tapno maawatcayto.

⁶ Macanto met laeng iti aldaw a panangidatonyo, ken iti sumaruno nga aldaw: ket no adda matda iti maicatlo nga aldaw, mapuuranto iti apuy.

⁷ Ket no macanto laeng iti maicatlo nga aldaw, maysa a kinarimon; dinto maawat:

⁸ Ngem tunggal maysa a mangan, awitennanto ti kinadakesna, ta impabpabarengna ti nasantoan a banag ni Jehova: ket dayta a tao maipusayto iti ilina.

⁹ Ket no anienyo ti apit ti dagayo, dicanto anien a talipupusen dagiti nagsulianan ti talonmo, dicanto met adasen dagiti nalabasan iti panagapitmo.

¹⁰ Dicanto adasen ti cauvasam, dicanto met ipenpen ti bunga a natnag ti cauvasam; batiemto ida a lac-amen ti napanglaw, ken ti gangannaet: siac ni Jehova a Diosmo.

¹¹ Dicayto agtacaw, wenno agaramid a siuulbod, wenno aggiinnulbod.

¹² Ket dicayto agsapata a siuulbod gapu iti naganco, ken ipabpabareng ti nagan ti Diosyo: siac ni Jehova.

¹³ Dicanto parparigaten ti padam a tao, wenno tacawen: ti tangdan ti maysa a mangmangged dinto matactac iti biangmo iti agpatpatnag agingga iti bigat.

¹⁴ Dicanto ilunod ti tuleng wenno mangicabil ti pacaitigcolan iti sango ti bulsec; ngem agbutengcanto iti Diosmo: siac ni Jehova.

¹⁵ Dicayto aramiden ti kinakillo iti panangocom: dicanto idumduma ti kinatao ti napanglaw, wenno bigbigen ti kinatao ti mannacabalin; ngem iti naincalintegan ti pangocommo iti padam a tao.

¹⁶ Dicanto agpagnapagna a cas maysa a natarabitab cadagiti cailiam: dicanto met agpangep iti maicaniwas iti dara ti padam a tao: siac ni Jehova.

¹⁷ Dicanto guraen iti napusoan ni cabsatmo: tubngaremto iti napaypayso ti padam a tao ket dicanto mapabasol gapu kencuana.

¹⁸ Dicanto balsen, wenno salimetmetam a maicaniwas ti guram cadagiti annac ti nacionmo; ngem ayatemto ti padam a tao a cas ita bagim: siac ni Jehova.

¹⁹ Tungpalenyonto dagiti bilinco. Dicanto ipamanada ti animalmo cadagiti sabsabali a kita ti animal: dicanto mulaan ti talonmo iti dua a cakita a bini: dinto met maicapet kenca ti aruaten a cawes a dua a cakita nga agtipon.

²⁰ Ket siasinoman a makiabig iti babai a bag-en a natanianen nga asawa, ket di pay la nasbut, wenno naited ti wayawayana; madusadanto; didanto mapapatay, gapu ta daydiay a babai di pay nawayawayaan.

²¹ Ket ti lalaki yegnanto ti daton gapu iti salungasingna ken Jehova iti ruangan ti tolda ti gimong, a maysa met laeng a carnero a lalaki a maipaay a daton gapu iti salungasing.

²² Ket ti padi aramidennanto a pacaabbonganna ti carnero a lalaki a daton gapu iti salungasing iti saclang ni Jehova, a maipuon iti buddut a nacabasolanna: ket ti biddut a nacabasolanna mapacawanto kencuana.

²³ Ket no macagtengcayon iti daga ken maimulmulayonton ti amin a kita ti caycayo a macan, ibilangyonto dagiti bungbungada a cas awan ti pannacacugitda: tallo a tawen nga addadanto cadacayo a cas saan a nacugit; dagita a bungbunga saanda a macan.

²⁴ Ngem iti maicapat a tawen amin a bungbungada nasantoandanto a pagdaydayaw ken Jehova.

²⁵ Ket iti maicalima a tawen canenyonto ti bungana, tapno mangted cadacayo ti kinalabonda: siac ni Jehova a Diosyo.

²⁶ Dicayto mangan iti uray ania man a sidadara: dicayto met aramaten dagiti panagbuybuyon, wenno agaramid iti padpadles.

²⁷ Dicayto rabaraban dagiti boocyo, dicanto putputdan ti nagsumbangiran ti barbasyo.

²⁸ Dicayto sugaten ti lasagyo gapu iti natay wenno mangilanad iti uray ania a pagilasinan iti bagiyo: siac ni Jehova.

²⁹ Dica tulawan ti anacmo a babai nga aramiden a balangcantis: di la ket ta ti daga matnag iti binabalangcantis, ket ti daga mapnoan iti kinadakes.

³⁰ Ngilinenyonto dagiti aldawco a panaginana, ket daydayawenyonto ti santuarioc: siac ni Jehova.

³¹ Dicay umamang cadagiti managbuyon nga espiritus, wenno cadagiti managsalamangca; dicay makiuman cadacuada ta mamulitancayo cadacuada: siac ni Jehova a Diosyo.

³² Tumacdercanto iti sango ti ubanan nga olo, ket dayawemto ti langa ti lacay, ket agbutengcanto iti Diosmo: siac ni Jehova.

³³ Ket no makipagtaeng kenca iti dagam ti maysa a gangannaet, dicayto aramiden kencuana ti di tumutop.

³⁴ Ta gangannaet a makipagtaeng kenca, maibilangto cadacayo a cas cailianyo, ket ayatemto a cas ita bagim; ta dacayo gangannaetcay met idi iti daga nga Egipto, Siac ni Jehova a Diosyo.

³⁵ Dicayto ar-aramiden ti kinakillo iti panangocom, iti panagrucod, iti panagtimbeng, wenno iti panagsucat.

³⁶ Ti apag-isu a pagtimbengan, apag-isu a panimbeng, agpag-isu nga efa, apag-isu nga hin ti icutanyonto. Siac ni Jehova a Diosyo a nangaon cadacayo iti daga nga Egipto.

³⁷ Ket dacayo tungpalenyonto amin nga ipaalagadco, ken amin dagiti bilbilinco, ket aramidenyo ida. Siac ni Jehova.