Levitico 18 - Ti Biblia (1973)

Ti panaggaabig dagiti asideg nga agcabagian ken sabsabali a kinarugit maiparitda.

¹ Ket ni Jehova nakisao ken Moises, a kinunana,

² Ibagam cadagiti annac ti Israel, ket cunam cadacuada, Siac ni Jehova a Diosyo.

³ Iti cas cadagiti ar-aramid iti daga sadi Egipto, isu a nagnaedanyo, dicayto ar-aramiden: ket iti cas cadagiti ar-aramid iti daga sadi Canaan, isu a pangipanac cadacayo, dicayto ar-aramiden; dicayto met pagdalanan dagiti al-alagadenda.

⁴ Dagiti bilbilinco isuda ti aramidenyonto ket dagiti ipaalagadco salimetmetanyonto tapno isuda ti pagdalananyo; siac ni Jehova a Diosyo.

⁵ Iti casta sungpotenyonto dagiti ipaalagadco ken bilbilinco; nga no aramiden ti tao, agbiagto cadacuada; siac ni Jehova.

⁶ Awanto cadacayo ti dumenna iti siasinoman nga asideg a cabagianna, tapno lucaisanna ti bagi nga ibainna: siac ni Jehova.

⁷ Ti bagi nga ibain ni amam, uray ti bagi nga ibain ni inam, dicanto lucaisan: isu ni inam; dicanto lucaisan ti bagi nga ibainna.

⁸ Ti bagi nga ibain ti asawa ni amam dicanto lucaisan: bagi nga ibain ni amam dayta.

⁹ Ti bagi nga ibain ni cabsatmo a babai nga anac ni amam, wenno anac a babai ni inam, nayanac man iti balay, wenno nayanac iti sadino man, dicanto met lucaisan ti ibainda a bagi.

¹⁰ Ti bagi nga ibain ti babai nga annac ti anacmo a lalaki, wenno ti babai nga anac ni anacmo a babai, uray ti bagida nga ibain dicanto lucaisan; gapu ta ti ibainda a bagida ibainmo met.

¹¹ Ti bagi nga ibain ti babai nga anac ni asawa ni amam, isu a pinutot ni amam, isu cabsatmo a babai, dicanto lucaisan ti bagina nga ibainna.

¹² Dicanto lucaisan ti bagi nga ibain ti babai a cabsat ni amam; isu asideg a cabagian ni amam.

¹³ Dicanto lucaisan ti bagi nga ibain ti babai a cabsat ni inam: ta isu asideg a cabagian ni inam.

¹⁴ Dicanto lucaisan ti bagi nga ibain ti lalaki a cabsat ni amam, dicanto dumenna ken asawana: isu ikitmo.

¹⁵ Dicanto lucaisan ti bagi nga ibain ti manugangmo a babai: isu asawa ni anacmo a lalaki; dicanto lucaisan ti bagi nga ibainna.

¹⁶ Dicanto lucaisan ti bagi nga ibain ti asawa ni cabsatmo a lalaki: bagi nga ibain ni cabsatmo dayta.

¹⁷ Dicanto lucaisan ti bagi nga ibainna (ti maysa a babai,) ken ti anacna a babai; dicanto alaen ti babai nga anac ni anacna a lalaki, wenno ti babai nga anac ti anacna a babai, tapno lucaisam ti ibainna a bagina; isuda cabagianna ida nga asideg; dayta isu ti kinadakes.

¹⁸ Ket sica dicanto alaen ti cabsat a babai ni asawam a babai, tapno casalisalna, tapno lucaisam ti bagi nga ibainna, a cadua ni asawam iti bayat ti panagbiagna.

¹⁹ Ket sica dicanto adanian ti maysa a babai tapno lucaisam ti bagi nga ibainna, iti bayat ti caaddana a saan a nadalus gapu iti panagsangailina.

²⁰ Ket sica dicanto caidda a caabig ti asawa ti padam a tao, ta mamulitanca kencuana.

²¹ Ket sica dicanto mangted iti uray la no maysa iti putotmo a ipasrecmo ida iti apuy ken Moloch; dicanto met ipabpabareng ti nagan ti Diosmo: siac ni Jehova.

²² Dicanto caidda ti lalaki a cas ibilang a babai: daytoy ti kinarimon.

²³ Ket sica dicanto caidda ti uray ania nga animal a mulitam ta bagim kencuana; casta met ti siasinoman a babai dinto agyan iti sango ti maysa nga animal tapno makicaidda; gampor daytoy.

²⁴ Dicay mulmulitan ti bagbagiyo iti uray ania cadagitoy nga aramid: ta amin cadagitoy namulitan dagiti nasnacion nga iyadayoc iti sangoananyo;

²⁵ Ket ti daga namulitan: isu ti gapuna nga impasarungcarco ti kinadakesna idiay, ket ti daga isaruana dagiti agnaed kencuana.

²⁶ Isu ti gapuna a dacayo salimetmetanyo dagiti pagalagadac, ken dagiti bilbilinco, ket dicayto ar-aramiden ti uray ania cadagitoy a nacarimrimon; uray no cadaraanyo, uray no gangannaet a makitubo cadacayo;

²⁷ (Ta amin dagitoy a kinarimon naaramiden idi dagiti tattao nga immun-una ngem dacayo, iti daga, ket ti daga namulitan:)

²⁸ Tapno ti daga dinacay met isarua, no mamulitanyo, a cas idi panangisaruana iti nacion nga immun-una ngem dacayo.

²⁹ Ta siasinoman a mangaramidto iti uray ania cadagitoy a kinarimon, dagiti met laeng mangaramid cadagitoy, maipusaydanto iti ilida.

³⁰ Isu ti gapuna a salimetmetanyonto ti ipaannongco tapno dicay ar-aramaten ti uray ania a nacarimrimon nga awid a naaramid idi awancay pay, ken tapno dicay mulmulitan cadagitoy ti bagbagiyo: siac ni Jehova a Diosyo.