Levitico 17 - Ti Biblia (1973)

Ti linteg a maipapan iti panangpatay cadagiti an-animal. Ti pannangan iti dara maiparit.

¹ Ket ni Jehova nakisao ken Moises, a kinunana,

² Ibagam ken Aaron ken dagiti annacna a lallaki ken amin nga annac ti Israel, ket cunam cadacuada: Daytoy ti aramid nga ni Jehova imbilinna, a kinunana,

³ Siasinoman a tao iti balay ti Israel a mangpatay iti maysa a vaca wenno cordero wenno calding iti uneg ti pacarso, wenno ti mangpatay iti ruar ti pacarso.

⁴ Ket saanna nga impan iti ruangan ti tolda ti gimong, tapno impaayna coma cas maysa a daton ken Jehova iti sango ti tabernaculo ni Jehova: dara ti maipabiddutto iti dayta nga tao; isu imbellengna ti dara; ket dayta a tao maipusayto iti ilina:

⁵ Tapno dagiti annac ti Israel idatagda dagiti datdatonda nga ar-aramidenda iti ruar, tapno idatagda ida met laeng ken Jehova iti ruangan ti tolda ti gimong, iti imatang ti padi, ken irucbabda dagita a maipaay a daton dagiti datdaton iti cappia ken Jehova.

⁶ Ket ti padi pagwarisnanto ti dara iti rabaw ti altar ni Jehova iti ruangan ti tolda ti gimong, ket puurannanto ti taba a maipaay a nabanglo a sayamusom ken Jehova.

⁷ Ket isuda didanto agaramid cadagiti datdatonda a pagdayaw cadagiti sasairo isuda a sorsorotenda. Daytoy ti pagalagadanto a cancanayon cadacuada iti isu-amin capututanda.

⁸ Ket sica ibagamto cadacuada, Siasinoman iti balay ti Israel, wenno cadagiti gangannaet a makipagtaeng cadacuada, a mangirucbab iti daton a mapuuran wenno sacrificio,

⁹ Ket saanna a yeg iti ruangan ti tolda ti gimong, tapno idatonna ken Jehova: dayta a tao maipusayto iti ilina.

¹⁰ Ket siasinoman a tao iti balay ti Israel, wenno cadagiti gangannaet a makipagtaeng cadacuada a mangan iti uray ania a dara; iparangconto ti rupac a maibusor iti dayta a tao a mangan iti dara, ket ipusayconto iti ilina.

¹¹ Ta ti biag ti lasag adda iti dara; ket itedco dayta cadacayo iti rabaw ti altar a maaramid a pacaabbongan a maipaay cadagiti cararuayo; ta dara isu ti macaaramid iti pacaabbongan gapu ta adda kencuana ti biag.

¹² Isu ti gapuna nga imbagac cadagiti annac ti Israel, Awanto cadacayo ti mangan iti dara, uray pay ti siasinoman a gangannaet a makipagtaeng cadacayo dinto mangan iti dara.

¹³ Ket siasinoman cadagiti annac ti Israel, wenno cadagiti gangannaet a makipagtaeng cadacuada a manganup iti uray ania nga animal wenno tumatayab a mabalin a canen, ibellengnanto ti darada, sananto gaburan iti tapuc.

¹⁴ Ta ti maipapan iti biag ti amin a lasag, ti darana ken ti biag nagcaycaysada: isu ti gapuna a kinunac cadagiti annac ti Israel, Dicayto mangan iti dara ti uray ania a lasag; ta ti biag ti isu-amin a lasag isu ti darana: siasinoman a mangan kencuana maipusayto.

¹⁵ Ket tumunggal tao a mangan iti natay latta wenno iti pinatay dagiti animal a narungsot, umili man wenno gangannaet, labaannanto dagiti pagan-anayna, ket digosennanto ti bagina, ket saanto a nadalus inggana ti rumabii: calpasanna isu nadalusto.

¹⁶ Ngem no dinanto ida labaan, wenno di agdigos awitennanto ngarud ti kinadakesna.