Levitico 16 - Ti Biblia (1973)

Ti tinawentawen a pannacaabbong.

¹ Ket ni Jehova nakisao ken Moises, calpasan ti ipapatay dagidi dua nga annac a lallaki ni Aaron, idi immasedegda iti saclang ni Jehova, ket natayda;

² Ket ni Jehova kinunana ken Moises, Ibagam ken Aaron a cabsatmo ta saanto a sumsumbrec cadagiti amin nga aldaw iti nasantoan a disso iti uneg ti abbong, a dumanon iti sango ti tugaw ti caasi, nga adda iti rabaw ti lacasa; tapno dimatay: gapu ta siac agparangacto iti ulep iti rabaw ti tugaw ti caasi.

³ Cadagitoy sumrecto ni Aaron iti tugaw a nasantoan: agraman maysa a lalaki a vaca, nga idaton gapu iti basol, ken maysa a carnero a lalaki a daton a mapuuran.

⁴ Isu icawesnanto ti nasantoan a bado a lienzo, ket yarpawnanto met iti lasagna ti sapin a lienzo, ket mabaricsanto iti barikes a liemzo, ket ti mitra a lienzo maicapetto kencuana: dagitoy dagiti nasantoan a pagan-anay, ket isu digosennanto ti bagina iti danum sananto icawes ida.

⁵ Ket mangalanto iti gimong dagiti annac ti Israel dagiti dua a calding a lallaki nga idaton gapu iti basol, ken maysa a carnero a lalaki a daton a mapuuran.

⁶ Ket ni Aaron idatagnanto ti lalaki a vaca a daton gapu iti basol isu a maipaay kencuana, ket aramidennanto ti pannacaabbongna agraman balayna.

⁷ Ket alaennanto dagiti dua a calding, ket idatagnanto ida iti saclang ni Jehova iti ruangan ti tolda ti gimong.

⁸ Ket ni Aaron paggasangasatennanto dagiti dua a calding; ti maysa a mapagasatan maipaay ken Jehova, ket ti maicadua ken Azazel.

⁹ Ket ni Aaron idatagnanto ti calding a napagasatan a maipaay ken Jehova, ket ipaaynanto kencuana a daton gapu iti basol.

¹⁰ Ngem ti calding, a naipatang ken Azazel, idatagnanto a sibibiag iti saclang ni Jehova, ta aramidennanto a pacaabbonganna, tapno ibaonna a maipaay ken Azazel iti let-ang.

¹¹ Ket ni Aaron idatagnanto ti lalaki a vaca a daton gapu iti basol, isu a maipaay kencuana, ket aramidenna ti pannacaabbongna agraman balayna, ket patayennanto ti lalaki a vaca a daton gapu iti basol a maipaay kencuana:

¹² Ket isu iggamannanto ti paginciensoan a napno iti beggang ti apuy nga aggapu iti altar iti saclang ni Jehova, ket ti imana a sipupunno iti nasayamusom nga incienso a natumtumec a sagbabassit, ket ipannanto iti uneg ti abbong:

¹³ Ket icabilnanto ti incienso iti rabaw ti apuy iti saclang ni Jehova, tapno ti asuc ti incienso macumutanna ti tugaw ti caasi nga adda iti rabaw ti pamanecnec, tapno isu saan a matay:

¹⁴ Ket mangalanto iti dara ti vaca a lalaki, ket iwarsinanto iti ramayna iti rabaw ti tugaw ti caasi iti bangirna iti daya; ket iti sangoanan ti tugaw ti caasi warsiannanto iti ramayna iti dara iti maminpito daras.

¹⁵ Calpasanna patayennanto ti calding a daton gapu iti basol a maipaay iti ili, ket ipannanto ti darana iti uneg ti abbong, ket aramidennanto iti dara ti calding, ti cas inaramidna iti dara ti vaca a lalaki, ket iwarsinanto iti rabaw ken iti sangoanan ti tugaw ti caasi:

¹⁶ Ket aramidennanto ti pannacaabbong ti nasantoan a disso maipuon cadagiti kinarugit dagiti annac ti Israel, ken gapu cadagiti salungasingda, cadagiti amin a basbasolda met laeng: casta met nga aramidennanto ti maipaay iti tolda ti gimong a makipagyan cadacuada iti baet ti kinarugitda.

¹⁷ Ket awanto ti tao iti tolda ti gimong no sumrec nga agaramid iti pannacaabbong iti uneg ti nasantoan a disso, agingga iti di rumuar ken dina maaramid ti pacaabbongan a maipaay kencuana met laeng, ken maipaay iti balayna, ken maipaay iti amin a gimong ti Israel.

¹⁸ Ket isu rumuarto nga agtarus iti ayan ti altar nga adda iti sango ni Jehova, ket aramidennanto ti pannacaabbongda, ket mangalanto iti dara ti lalaki a vaca, ken iti dara ti calding, ket icabilnanto cadagiti sarsara ti altar iti lawlawna.

¹⁹ Ket iwarsinanto ti dara iti ramayna iti rabawna, iti maminpito daras, ket dalusannanto, ket pasantoennanto dagiti rugrugit dagiti annac ti Israel.

²⁰ Ket no malpasnan a maaramid ti pannacaabbong a maipaay iti nasantoan a disso; ken ti tolda ti gimong, ken ti altar, idatagnanto ti calding a sibibiag:

²¹ Ket ni Aaron ipataynanto dagiti dua nga imana iti rabaw ti olo ti sibibiag a calding, ket ipudnonanto iti rabawna ti amin a kinadakes dagiti annac ti Israel, ken amin a salsalungasingda, dagiti amin a basbasolda met laeng; ket icabilnanto ida iti rabaw ti olo ti calding, ket ibaonnanto iti tay-ac babaen iti ima ti maysa a tao a masagsagana.

²² Ket ti calding ti mangawit a mangipan iti amin a kinadakes iti agpotpotong a daga: ibulosnanto ti calding iti let-ang.

²³ Ket ni Aaron sumrecto iti tolda ti gimong, ket ucsobennanto dagiti cawesna a lienzo a pinagaruatna idi simrec iti nasantoan a disso, ket ibatina ida idiay:

²⁴ Ket digosennanto ti bagina iti danum iti uneg ti nasantoan a disso, sananto icapet dagiti cawcawesna, sa rumuar, ket ipaaynanto ti datonna a mapuuran, ken ti daton a mapuuran iti biang ti umili, ket aramidennanto ti pannacaabbongna, ken ti maipaay iti biang ti umili.

²⁵ Ket ti baba ti daton gapu iti basol puurannanto iti rabaw ti altar.

²⁶ Ket ti mangibulos iti calding a maipaay ken Azazel labaannanto dagiti pagan-anayna, ket digosennanto ti bagina iti danum, ket no malpas, sumrecto iti uneg ti pacarso.

²⁷ Ket ti lalaki a vaca a daton gapu iti basol, ken ti calding a daton gapu iti basol, a ti darada naidatag a pacaabbongan ti nasantoan a disso, maipandanto iti ruar ti pacarso; ket puurandanto iti apuy dagiti lal-lalatda ken lasagda, ken tackida.

²⁸ Ket ti mangpuur cadacuada labaannanto dagiti pagan-anayna, ket digosennanto ti bagina iti danum, ket no malpas sumrecto iti uneg ti pacarso.

²⁹ Ket daytoy ti maalagadto nga agnanayon cadacayo: iti maicapito a bulan, iti maicapulo nga aldaw ti bulan, agladingitto ti cararuayo, ket awanto ti uray ania a trabajo nga aramidenyo, ti umili man wenno gangannaet a makipagtaeng cadacayo:

³⁰ Gapu ta iti daytoy nga aldaw maaramidto ti pannacaabbongyo, tapno pacadalusanyo; maugasancayto cadagiti amin a basbasolyo iti saclang ni Jehova.

³¹ Isu ti aldaw a panaginana ti nadaeg a panaginanayo, ket agladingitto ti cararuayo; daytoy ti maalagad iti agnanayon.

³² Ket ti padi, a mapulotanto ken maconsagrarto nga agpadi a sono ni amana aramidennanto ti pannacaabbong, ket icapetnanto dagiti cawes a lienzo, dagiti met laeng cawes a nasantoan:

³³ Ket isu aramidennanto ti pannacaabbong a maipaay iti santuario a nasantoan; ket aramidennanto ti pannacaabbong a maipaay iti tolda ti gimong, ken maipaay iti altar; ket aramidennanto ti pannacaabbong a maipaay cadagiti papadi ken maipaay cadagiti amin a tattao ti gimong.

³⁴ Ket daytoy ti maalagadto cadacayo nga agnanayon, a maaramid a pannacaabbong dagiti annac ti Israel gapu cadagiti amin a basbasolda iti maminsan iti macatawen. Ket inaramidna cas imbilin ni Jehova ken Moises.