Levitico 14 - Ti Biblia (1973)

Dagiti daton ti pannacadalus ti agcucutel.

¹ Ket ni Jehova nakisao ken Moises, a kinunana,

² Daytoy isunto ti alagaden ti agcucutel iti aldaw a pannacadalusna: isu maipanto iti padi:

³ Ket ti padi mapanto iti ruar ti pacarso; ket ti padi kitaennanto; ket, adtoy, no ti sacsakiten a cucutel imminbag iti nagcucutel ken akincucutel,

⁴ Agbilinto ngarud ti padi iti pannacaala iti biang ni padalusan ti dua a sibibiag a tumatayab a nadalus, ken cayo a cedro, ken escarlata, ken hisopo:

⁵ Ket ti padi ibilinnanto a mapapatay ti maysa cadagiti tumatayab iti maysa a damili iti yan ti danum nga agay-ayus.

⁶ Ti maipapan iti tumatayab a sibibiag, isu alaennanto, ken ti cayo a cedro, ken ti escarlata, ken ti hisopo, ket itanebnanto ida, agraman ti sibibiag a tumatayab, iti dara ti pinatay a tumatayab iti rabaw ti danum nga agay-ayus:

⁷ Ket warsiannanto ni padalusan iti cucutel iti maminpito, ket ibatadnanto nga isu nadalus, ket ibbatannanto ti sibibiag a tumatayab iti napanayag a tay-ac.

⁸ Ket ni padalusan labaannanto dagiti pagan-anayna, ken kiskisannanto amin a boocna ken dutdutna, ket digosennanto ti bagina iti danum; ket nadalusto: ket iti calpasanna, sumrecto iti pacarso ngem agnaedto iti ruar ti toldana cadagiti pito nga aldaw.

⁹ Ket iti maicapito nga aldaw, isu ti panangkiskisnanto iti isu-amin a boocna iti olona, ken ti timidna ken kidayna, uray isu-amin a dutdutna kiskisannanto: ket labaannanto ti pagan-anayna, ket digosennanto ti bagina iti danum, ket nadalusto.

¹⁰ Ket itinto maicawalo nga aldaw mangalanto iti dua a cordero a lallaki nga awan pilawda, ken maysa a cordero a cabayan awan pilawna, nga agtawenen ken tallo a pagcasangapulo nga apag ti maysa nga efa ti namayecmec nga harina a maipaay a daton a macan a nalaocan iti lana, ken maysa a log ti lana.

¹¹ Ket ti padi a mangdalus kencuana idatagnanto ti tao a padalusan ken dagidiay a banbanag iti sango ni Jehova, iti ruangan ti tolda ti gimong.

¹² Ket ti padi alaennanto ti maysa cadagiti cordero a lalaki, ken ti log ti lana, ket ipaaynanto a daton, gapu iti salungasing, ket ililinanto ida cas daton a maitayag iti sango ni Jehova:

¹³ Ket papatayennanto ti cordero a lalaki iti yan a pamatpatayan iti daton gapu iti basol, ken ti daton a mapuuran, iti lugar ti santuario: ta cas ti idaton a gapu iti basol isu ti bagi ti padi, casta met ti daton gapu iti salungasing: isu ti nasantoan unay:

¹⁴ Ket ti padi alaennanto iti dara ti daton gapu iti salungasing, ket ti padi icabilnanto iti pantoc ti lapayag a canawan ni madalusan, ken iti tangan ti imana a canawan, ken iti tangan ti canawan a sacana.

¹⁵ Ket ti padi alaennanto iti log ti lana, ket ibuyatnanto iti daculap ti macatigid nga imana met laeng;

¹⁶ Ket ti padi babasaennanto ti ramayna a canawan iti lana nga adda iti imana a catigid, ket iwarsinanto iti ramayna ti lana iti mamimpito iti sango ni Jehova:

¹⁷ Ket ti matda iti lana nga adda iti imana icabilto ti padi iti pantoc ti lapayag a canawan ni madalusan, ken iti tangan ti imana a canawan, ken iti tangan ti sacana a macanawan, iti rabaw ti dara ti daton gapu iti salungasing:

¹⁸ Ket ti natda iti lana nga adda iti ima ti padi icabilnanto iti olo ni madalusan: ket ti padi aramidennanto a pacaabbonganna, a maipaay ken madalusan iti saclang ni Jehova.

¹⁹ Ket ti padi irucbabnanto ti daton gapu iti basol, ket aramidennanto a pacaabbongan a maipaay ken madalusan gapu iti kinarugitna: ket iti calpasanna papatayennanto ti daton a mapuuran;

²⁰ Ket ti padi ipaaynanto ti daton a mapuuran ken ti daton a macan iti rabaw ti altar: ket ti padi aramidennanto a pacaabbonganna, ket nadalusto,

²¹ Ket no napanglaw, ket awan mabalinna a pangalaan iti casdiay, mangalanto ngarud iti maysa a cordero a lalaki nga agservi a daton a mailili gapu iti salungasing, tapno maaramid a pacaabbonganna, ken maysa a pagcapulo ti maysa nga efa ti namayecmec nga harina a nalaocan iti lana ken maysa a log ti lana daton a macan;

²² Ken dua a pagpagaw wenno dua nga urbon dagiti calapati, no cas dagita ti mabalinna nga alaen; ket ti maysa isunto ti daton gapu iti basol, ket ti caduana maysa a daton a mapuuran.

²³ Ket iti maicawalo nga aldaw ipannanto ida maipaay ti pagdalusna iti padi, iti ruangan ti tolda ti gimong, iti saclang ni Jehova:

²⁴ Ket ti padi alaennanto ti cordero a daton gapu iti salungasing, ken ti log ti lana, ket ti padi ililinanto ida a maipaay a daton a maitayag iti sango ni Jehova.

²⁵ Ket isu papatayennanto ti cordero a daton gapu iti salungasing; ket ti padi mangalanto iti dara ti daton gapu iti salungasing, ket icabilnanto iti pantoc ti lapayag a canawan ni madalusan, ken iti tanganna a canawan, ken tangan ti sacana a canawan.

²⁶ Ket ti padi mangibuyatto iti lana iti daculapna met laeng ti imana a macatigid;

²⁷ Ket ti ramay ti macanawan nga ima ti padi iwarsinanto ti dadduma a lana nga adda iti imana a macatigid iti maminpito iti saclang ni Jehova:

²⁸ Ket ti padi icabilnanto ti lana nga adda iti imana iti pantoc ti lapayag a canawan ni madalusan, ken iti tangan ti imana a canawan, ken iti tangan ti sacana a canawan, iti rabaw ti nacaiccan ti dara ti daton gapu iti salungasing:

²⁹ Ket ti natda iti lana nga adda iti ima ti padi icabilnanto iti olo ni madalusan, tapno maaramid a pacaabbonganna iti saclang ni Jehova.

³⁰ Ket isu idatonnanto ti maysa cadagiti pagaw, wenno cadagiti urbon ti calapati, isu nga cas cabaelanna nga alaen;

³¹ Uray ania cadagiti cabaelanna nga alaen, ti maysa agservi a daton gapu iti basol, ket ti caduana agservi a daton a mapuuran, agraman ti daton a macan: ket ti padi aramidennanto ti pannacaabbong a maipaay ken madalusan iti saclang ni Jehova.

³² Daytoy ti alagaden ti agsakit iti cucutel a dinanto cabaelan a gunoden ti maitutop a pacadalusanna.

³³ Ket ni Jehova nakisao ken Moises ken ni Aaron, a kinunana,

³⁴ No macadanoncayo iti daga a Canaan, nga itdecto cadacayo a tagicuaenyon ket icabilco ti didigra a cucutel iti maysa a balay idiay daga a tagicuaenyo;

³⁵ Ti akinbalay ngarud umaynanto ibaga iti padi, a cunana, Ipagarupco a cas la adda maysa a didigra iti balayco.

³⁶ Ket ti padi ibilinnanto a pagpanawanda ti balay, no ti padi dina pay mapan kitaen idiay ti didigra, tapno amin nga adda iti balay di-coma maaramid a saan a nadalus: ket iti calpasanna ti padi sumrecto a cumita iti balay:

³⁷ Ket isu imatangannanto ti didigra; ket adtoy, no ti didigra adda cadagiti diddiding ti balay a nagaritgaritan iti nauneg, bumerde wenno lumabaga, ket ti langana immuneg iti diding;

³⁸ Ti padi ngarud rumuarto iti balay nga inggana iti ruanganna, ket ripcannanto ti balay bayat iti pito nga al-aldaw.

³⁹ Ket ti padi umayto manen iti maicapito nga aldaw, ket imatangannanto; ket adtoy, no ti didigra nagwaras cadagiti diddiding ti balay;

⁴⁰ Ti padi ibilinnanto ngarud nga iccatenda dagiti batbato nga yan ti didigra, ket ibellengda ida iti disso a narugit iti ruar ti ciudad:

⁴¹ Ket ituyangnanto a macuscusan ti balay nga aglawlaw iti unegna; ket isuda ibellengdanto dagiti a macuscusda iti ruar ti ciudad iti disso a narugit:

⁴² Ket alaendanto dagiti sabali a batbato, ket icabildanto ida iti yan a nagicatanda, ket isu mangalanto iti sabali a masa, ket palitadaennanto ti balay.

⁴³ Ket no ti didigra ta sumubli manen, ket rumsua iti uneg ti balay, calpasan ti pinangiccatna cadagiti batbato, ken calpasan ti panangcuscusna iti balay, ken calpasan ti pannacapalitadana manen;

⁴⁴ Ti padi sumrecto ngarud, ket imatangannanto; ket adtoy, no ti didigra agado iti uneg ti balay, dayta ti cucutel a mamagrucop iti balay; saan a nadalus.

⁴⁵ Ket isu rebbaennanto dayta a balay, dagiti batbatona, ken tartaricayona, ken dagup amin a masa ti balay; ket ipannanto ida iti ruar ti Ciudad iti disso a narugit.

⁴⁶ Maysa pay, ti sumrec iti dayta a balay iti bayat ti aldaw a pannacarikepna, saanto a nadalus inggana iti rumabii.

⁴⁷ Ket ti agidda iti dayta a balay labaannanto ti pagan-anayna; ket ti mangan iti dayta a balay labaannanto dagiti pagan-anayna.

⁴⁸ Ket no ti padi sumrecto tapno imatanganna, ket, adtoy, ti didigra saan a nagado iti dayta a balay, calpasan ti pannacapalitadana; no casta ti padi ibatadnanto a ti balay nadalus, ta ti didigra nagimbagen.

⁴⁹ Ket isu alaennanto a pangdalus iti balay ti dua a tumatayab, ken cayo a cedro, ken escarlata, ken hisopo:

⁵⁰ Ket papatayennanto ti maysa cadagiti tumatayab iti maysa nga alicamen a damili iti rabaw ti danum nga agay-ayus:

⁵¹ Ket alaennanto ti cayo a cedro, ken ti hisopo, ken ti escarlata, ken ti sibibiag a tumatayab, ket ipabatocnanto ida iti danum nga agay-ayus, ket warsiannanto ti balay iti maminpito daras:

⁵² Ket dalusannanto ti balay nga aramatenna ti dara ti tumatayab, ken ti agay-ayus a danum, ken ti sibibiag a tumatayab, ken ti cayo a cedro, ken ti hisopo, ken ti escarlata:

⁵³ Ngem isu ibbatannanto ti sibibiag a tumatayab iti ruar ti ili iti napanayag a tay-ac casta ti panangaramidnanto iti pacaabbongan a maipaay iti dayta a balay; ket nadalusto.

⁵⁴ Daytoy ti alagaden a maitutop cadagiti amin a kita ti didigra a cucutel, ken dogoldogol,

⁵⁵ Ken maipaay iti cucutel ti maysa a cawes ken ti maysa a balay,

⁵⁶ Ken maitutop iti letteg, ken latlat ken lasilas;

⁵⁷ A pangisuro no narugit, ken no nadalus: daytoy ti alagaden ti cucutel.