Levitico 13 - Ti Biblia (1973)

Ti panangilasin iti cutel.

¹ Ket ni Jehova nakisao cada Moises ken Aaron, a kinunana,

² No iti maysa a tao adda tumaud a letteg, iti cudil ti lasagna wenno latlat, wenno aglaslasilas, ket agbalin a sakit a cucutel iti cudil ti lasagna, maipanto ngarud ken Aaron, a padi, wenno iti maysa cadagiti annacna a lallaki a padi:

³ Ket ti padi imatangannanto ti sacsakiten iti cudil ti lasag; ket no ti dutdut iti sacsakiten nagpuraw, ket ti langa ti sacsakiten naun-uneg ngem iti cudil ti lasagna, dayta ti sakit a cucutel; ket ti padi amirisennanto, ket ikeddengnanto nga isu saan a nadalus.

⁴ Ket no ti yan ti lasilas nagpuraw iti cudil ti lasagna, ket agparang a saan a naun-uneg ngem iti cudil, ket ti dutdut iti dayta saan a nagpuraw, no casta ti padi ipaingnanto ti adda sacsakitenna iti pito nga aldaw;

⁵ Ket ti padi kitaennanto ti maicapito nga aldaw: ket, adtoy, ta no, ti pannacaimatangna, ti sacsakiten saan a dimmackel, ket ti sacsakiten saan a nagwaras iti cudil, ti padi ngarud ipaingnanto pay laeng iti pito nga aldaw;

⁶ Ket ti padi kitaennanto man met laengen iti maicapito nga aldaw, ket, adtoy, no ti sacsakiten nalitem, ket ti sacsakiten saan a nagwaras iti cudil, ti padi ibatadnanton ngarud nga isu nadalusen: latlat ti adda; ket isu labaannanto dagiti pagan-anayna, ket nadalusto.

⁷ Ngem no ti latlat agwaras iti cudil calpasan ti pannacaiparangna iti padi tapno madalusan, iparangnanto a balbaliwan ti bagina iti padi:

⁸ Ket ti padi imatangannanto, ket adtoy, no ti latlat nagwarasen iti cudil, ti padi ibatadnanto a casta a saan a nadalus: dayta ti cucutel.

⁹ No ti sakit a cucutel adda iti tao, maidatagto ngarud iti padi;

¹⁰ Ket ti padi kitaennanto; ket adtoy, no adda letteg a puraw iti cudil, ket pinagbalinna a puraw ti dutdut, ket adda nabiag a lasag nga awan cudilna iti letteg.

¹¹ Dayta nabayagen a cucutel iti cudil ti lasagna, ket ti padi ibatadnanto nga isu saan a nadalus: dinanto ipapaing, ta isu saan a nadalus.

¹² Ket no ti cucutel agwaras iti cudil, ket ti cucutel ramanenna amin a cudil ni agcucutel, manipud olona agingga iti sacana, ket ti padi makitanan a casta;

¹³ Ti padi ngarud ammirisennanto; ket, adtoy, no ti cucutel nalungpusna amin ti lasagna, ibatadnanto a nadalus ni nagsacsakit: pimmuraw amin; isu nadalusen.

¹⁴ Ngem inton agparang kencuanan ti nabiag a lasagna, saanto laeng a nadalus.

¹⁵ Ket ti padi imatangannanto ti lasagna nga awan cudilna, ket ibatadnanto a saan a nadalus: ti awan cudilna a lasag saan a nadalus: isu dayta ti cucutel.

¹⁶ Wenno, ti awan cudilna a lasag agsubli, ket agsucat iti puraw, no casta dumatagto iti padi:

¹⁷ Ket ti padi imatangannanto: ket, adtoy, no ti sacsakiten nagpuraw, ti padi ngarud ibatadnanto a nadalus ni nagsacsakit: isu nadalus.

¹⁸ Ket no iti cudil ti lasag ti nagtaudan ti letteg, ket immimbagen,

¹⁹ Ket iti nagsaadan ti letteg tumubo ti letteg a napuraw, wenno lasilas, lumabaga a puraw, no casta maiparangto iti padi;

²⁰ Ket ti padi imatangannanto; ket, adtoy, no ti langana nalenlennec ngem iti cudil, ket ti dutdut iti yanna nagpurawen, ti padi ngarud ibatadnanto a saan a nadalus: dayta ti sakit a cucutel, timmaud iti yan ti letteg.

²¹ Ngem no ti padi imatangannanto, ket adtoy, awan dutdut a nagpuraw idiay, ket saan a nalenlennec ngem iti cudil, ngem ket di nalitem; ti padi ngarud ipaingnanto bayat dagiti pito nga aldaw:

²² Ket no dayta agwaras iti cudil, ti padi ngarud ibatadnanto a saan a nadalus: dayta ti sacsakiten.

²³ Ngem no ti lasilas adda laeng iti tinaudanna, ket saan a nagpacpakilo, dayta ti nagpiglatan ti letteg; ket ti padi ibatadnanto a nadalus.

²⁴ Wenno no ti lasag iti yan ti cudil a nasinit iti apuy, ket ti nasalunat a lasag ti nasinit aglasilas a lumabaga ken pumuraw, wenno puraw;

²⁵ No casta ti padi ammirisennanto daydiay; ket, adtoy, no ti dutdut iti yan ti lasilas agpuraw, ket ti nagparanganna nalenlennec ngem ti cudil; dayta ti cucutel, timmaud iti yan ti nasinit: ket ti padi ibatadnanto a saan a nadalus: dayta ti sakit a cucutel.

²⁶ Ngem no ti padi ammirisennanto daydiay, ket, adtoy, awan puraw a dutdut iti yan ti lasilas, ket saan a nalenlennec ngem ti cudil, ngem nalitem; ti padi ngarud ipaingnanto bayat dagiti pito nga aldaw:

²⁷ Ket ti padi ammirisennanto iti maicapito nga aldaw: no nagwaras iti cudil, ti padi ngarud ibatadnanto nga saan a nadalus: dayta ti sacsakiten a cucutel.

²⁸ Ket no ti lasilas adda laeng iti nagsaadanna, ket saan a nagsacnap iti cudil, ngem nalitem; dayta ti letteg ti nasinit, ket ti padi ibatadnanto a nadalus: ta dayta ti pagpiglatan ti nasinit.

²⁹ Ket no ti maysa a lalaki wenno babai adda sacsakitenna iti olo wenno timid,

³⁰ Iti casta ti padi imatangannanto ti sacsakiten; ket, adtoy, no ti langana nalenlennec ngem ti cudil, ket adda boocna nga amarillo a nalapat, no casta ti padi ibatadnanto a saan a nadalus: isu dayta ti dogoldogol, dayta ti cucutel ti olo wenno timid.

³¹ Ket no ti padi maimatanganna ti sacsakiten a dogoldogol, ket, adtoy, ti langana saan a nalenlennec ngem ti cudil, ket awan ti boocna a nangisit, ti padi ngarud ipaingnanto ni agsacsakit iti dogoldogol iti pito nga aldaw:

³² Ket iti maicapito nga aldaw ti padi imatangannanto ti sacsakiten; ket, adtoy, no ti dogoldogol saan a nagwaras, ket awan ti amarillo a boocna, ket ti langa ti dogoldogol saan a nalenlennec ngem ti cudil.

³³ Makiskisanto ngarud, ngem saan a kiskisan ti dogoldogol; ket ti padi ipaingnanto pay laeng ni agsacsakit iti dogoldogol cadagiti pito nga aldaw.

³⁴ Ket iti maicapito nga aldaw ti padi imatangannanto ti dogoldogol, ket adtoy, no ti dogoldogol saan a nagwaras iti cudil, ket ti langana saan a nalenlennec ngem ti cudil; ti sacerdote ibatadnanto ngarud a nadalus: ket labaannanto dagiti pagananayna, ket nadalus.

³⁵ Ngem no ti dogoldogol nagwaras iti cudil, calpasan ti panagdalusna,

³⁶ Iti casta ti padi imatangannanto; ket, adtoy, no ti dogoldogol nagwaras iti cudil, ti padi dinanto sapulen ti amarillo a booc; isu saan a nadalus.

³⁷ Ngem no iti pannacaimatangna saan a nagpacpakilo ti dogoldogol, ket tinuboan ti nangisit a booc; ti dogoldogol immimbagen isu nadalus: ket ti padi ibatadnanto a nadalus.

³⁸ Ket no lalaki wenno babai ti adda lasilasna iti cudil ti lasagna, uray pay puraw a lasilas;

³⁹ Iti casta ti padi imatangannanto; ket, adtoy, no dagiti lasilas iti cudil ti lasagda nalitem a puraw, dayta ti curad, nagtaud iti cudil, isu nadalus.

⁴⁰ Ket no ti booc ti tao nagparut iti olona, isu ti calbo; nupay casta nadalus.

⁴¹ Ket no ti boocna nagparut iti akinsango a paset ti olona, isu ti ludingas nupay casta nadalus.

⁴² Ngem no iti calbo, wenno iti ludingas adda lumabaga a puraw a sacsakiten; dayta ti cucutel a tumaud iti calbo, wenno iti ludingas.

⁴³ Imatanganto ngarud ti padi, ket, adtoy, no ti letteg ti sacsakiten lumabaga a puraw iti calbona wenno ludingasna, cas iti langa ti cucutel iti cudil ti lasag;

⁴⁴ Isu ti tao nga agcucutel, saan a nadalus: ti padi ibatadnanto nga ipatalged nga isu saan a nadalus; ti sacsakitenna adda iti olona.

⁴⁵ Ket ti agcucutel nga agsacsakit, dagiti pagan-anayna maray-abdanto, ket ti booc ti olona mawacrayto, ket abbongannanto ti akingato a bibigna, ket agpuccawto, Saan a nadalus, saan a nadalus.

⁴⁶ Dagup dagiti aldaw a panagbayag kencuana ti sacsakiten, maibilangto a saan a nadalus; isu saan a nadalus: agwaywayasto iti pagnaedanna; iti ruar ti pacarso ti pagtaengannanto.

⁴⁷ Ti met pagan-anay nga adda cucutel, pagan-anay man a de lana wenno pagan-anay a lienzo;

⁴⁸ Uray pay iti gan-ay, wenno iti pacan; ti lienzo, wenno ti de lana, uray iti lalat, wenno uray isu-amin a naaramid iti lalat;

⁴⁹ No ti sakit bumerde wenno lumabaga iti pagan-anay wenno iti lalat, wenno iti gan-ay wenno ti pacan, wenno iti uray ania nga aruaten a lalat; dayta ti sakit a cucutel, ket rebbengna ti maiparang iti padi:

⁵⁰ Ket ti padi imatangannanto ti sakit, ket ipacni daydiay a nagsakit cadagiti pito nga al-aldaw:

⁵¹ Ket iti maicapito nga aldaw imatangannanto ti sakit: no ti sakit nagwaras iti pagan-anay, uray iti gan-ay, wenno iti pacan, wenno iti lalat, nga uray ania a pacaaramatan ti lalat; ti sakit isu ti cucutel a mamagrucop; isu saan a nadalus.

⁵² Ket puurannanto ti pagan-anay, uray ti gan-ay wenno pacan, ti de lana wenno lienzo, wenno ti uray ania nga aruaten a lalat, a pagyanan ti sakit: ta dayta isu ti cucutel a mamagrucop; mapuuranto iti apuy.

⁵³ Ket no ti padi kitaennanto, ket adtoy, ti sakit saan a nagwaras iti pagan-anay, uray iti gan-ay, wenno iti pacan, wenno iti uray ania nga aruaten a lalat;

⁵⁴ Ti padi ngarud ibilinnanto a labaandanto ti aruaten nga yan ti saket, ket ipacninanto pay iti pito nga aldaw:

⁵⁵ Ket ti padi kitaennanto iti calpasan ti pannacaugas ti sakit; ket, adtoy, no ti sakit saan a nagusaw, ket ti sakit saan a nagwaras, saan a nadalus; ipuurmonto iti apuy: isu ti maysa a panagrucop nupay no ti panagcalbo adda iti ruar man wenno iti uneg.

⁵⁶ Ket no ti padi kitaenna, ket, adtoy, ti sakit nagusaw calpasan ti pannacaugasna, iccatennanto ngarud iti aruaten, wenno iti lalat, wenno iti gay-ay wenno iti pacan:

⁵⁷ Ket no agparang pay laeng iti aruaten, uray iti gan-ay, wenno iti pacan, wenno iti uray ania nga aruaten a lalat, agwarwaras: puuramto iti apuy dayta a yan ti sakit.

⁵⁸ Ket ti pagan-anay, uray ti gan-ay, wenno pacan, wenno ania nga aruaten a lalat nga labaamto, no maiccat ti sakit, ipiduamto a labaan, ket nadaluston.

⁵⁹ Daytoy ti alagaden ti sakit a cucutel iti pagan-anay a de lana wenno lienzo, uray iti gan-ay wenno iti pacan, wenno iti uray ania nga aruaten a lalat, tapno pangibatad iti kinadalus, wenno saanna a kinadalus.