Levitico 11 - Ti Biblia (1973)

An-animal a nadalus ken narugit. Ti kinarugit dagiti an-animal a natay. Dagiti agcarcarayam a di macan.

¹ Ket ni Jehova nakisao cada Moises ken Aaron, a kinunana cadacuada,

² Ibagayo cadagiti annac ti Israel, a cunayo, Dagitoy dagiti nabiag a mabalinyo a canen cadagiti an-animal nga adda iti rabaw ti daga.

³ Uray ania cadagiti an-animal a nagpisi ti cucuda, ken naggudua ti dapanna, ken agngatingat, mabalinyo a sidaen.

⁴ Nupay casta dicayto sidsidaen dagitoy nga agngatingat, a nagpisi ti cucuda: ti camello, uray ta agngatingat, ngem saan a nagpisi ti cucuna, isu ti carugityo.

⁵ Ket ti connejo, uray ta agngatingat ngem saan a nagguddua ti cucuna, isu ti carugityo.

⁶ Ket ti liebre, ta agngatingat ngem saan a nagpisi ti cucuna, isu ti carugityo.

⁷ Ket ti babuy, ta nagguddua ti cucuna, ket nagpisi ti dapanna, ngem saan nga agngatingat, isu carugityo.

⁸ Iti lasag dagitoy dicayto agsida ket ti natay a bangcayda dicayto sagiden; carugityo ida.

⁹ Dagitoy dagiti adda cadagiti dandanum a mabalinyonto a canen nga uray ania nga adda pigar ken sicsicna cadagiti dandanum, cadagiti baybay, ken cadagiti carcarayan, mabalinyo a sidaen.

¹⁰ Ket dagup dagiti awan pigarna ken sicsicna iti baybay, ken iti carayan, iti dagup dagiti aggaraw cadagiti dandanum, ken iti amin dagiti nabiag nga adda cadagiti dandanum, carimonyo ida.

¹¹ Ket carimonyonto ida; dicayto sidaen dagiti lasagda, ket dagiti bangcayda a natay carimonyonto.

¹² Uray ania nga awanan pigar ken sicsicna cadagiti dandanum, dayta macarimon cadacayo.

¹³ Ket cadagiti tumatayab carimonyonto dagitoy; saandanto a masida, nacarimrimonda: ti aguila, ken ti azor, ken ti aguila ti taaw,

¹⁴ Ken ti gik-gik, ken ti sawi, ken ti cakitana,

¹⁵ Amin a wac ken cakitana,

¹⁶ Ken ti avestruz, ken ti calaw, ken ti garceta, ken ti cali ken cakitana,

¹⁷ Ken ti puec, ken ti catili ken ti cullaaw.

¹⁸ Ken ti calamon, ken ti pelicano, ken ti buitre,

¹⁹ Ken ti tic-babuy, ken ti cannaway ken cakitana, ken abubilla, ken ti panniki.

²⁰ Amin dagiti an-animal a nagpayac nga agcaradapda cadagiti uppat a sacsacada, carimonyo dagita.

²¹ Nupay casta mabalinyo a sidaen dagiti amin a nagpayac nga agcaradapda cadagiti uppat a sacada, nga adda luppoda, isu a paglagtoda iti daga;

²² Uray dagitoy mabalinyo a sidaen ida: ti dudon ken cakitana, ti pattanglod ken cakitana, ken ti curiat ken cakitana, ken ti pattinggi ken cakitana.

²³ Ngem amin a nagpayac nga agcaradap nga uppat dagiti sacsacada, carimonyo ida.

²⁴ Ket gapu cadagitoy agbalincayto a narugit: siasinoman a mangsagid iti bangcayda a natay, saanto a nadalus agingga iti rumabii;

²⁵ Ket siasinoman a mangala iti sangcabassit a bagi ti natay cadagidiay, labaannanto ti pagan-anayna, ket dinto nadalus agpapan iti rumabii.

²⁶ Tunggal animal a nagpisi ti cucuna ket saan a nagguddua ti dapanna, ket di met agngatingat, carugityonto; tunggal maysa a mangsagid cadacuada narugitto.

²⁷ Ket anyaman cadagiti an-animal a mangipagna cadagiti ramramay ti sacana nga uppat, narugit cadacayo dagita: siasinoman a tao a mangsagid iti bangcay a natay dagidiay, narugitto agingga iti rumabii.

²⁸ Ket ti mangawit iti bangcay a natay dagita labaannanto ti pagan-anayna ket dinto nadalus agpapan iti rumabii: dagita carugityo ida.

²⁹ Ket cadagiti agcarcarayam nga agay-ayam iti daga, dagitoy ti macarugit cadacayo: ti comadreja, ken ti bao, ken ti banias ken cakitana,

³⁰ Ken ti tecca, ken ti buaya, ken ti aluti-it, ken ti alibut, ken ti berroroco.

³¹ Dagitoy isuda ti carugityo cadagiti amin nga aguy-uyas: sianoman a mangsagid cadacuada no natayda, narugitto inggana iti rumabii.

³² Ket uray ania a nacaitinnagan dagidiay, no natayda, narugitto; uray no latoc a cayo, uray pagan-anay, uray lalat, uray supot, uray ania man nga alicamen a maaramat iti aramiden, rebbengdanto ti maicabil iti danum, ket saandanto a nadalus inggana ti rumabii, daytanto ti pannacadalusna.

³³ Ket tunggal damili a pacaipisocan ti maysa cadagidiay, uray ania nga adda iti unegna, saanto a nadalus, ket iboongyonto.

³⁴ Amin a taraon idiay a mabalin a canen, a madanuman, nacarugrugitto; ket amin a mabalin nga inumen nga agyan iti casdiay a damili saanto a nadalus.

³⁵ Ket amin a maiparabawto iti uray ania a paset ti bagida a natay narugitto; no horno wenno pagisaangan, mawarawaranto narugitda, ket carugityonto ida.

³⁶ Nupay ti maysa nga ubbog wenno bito a pagurnongan iti danum, nadalusto: ngem maisagid iti bagida a natay saanto a nadalus.

³⁷ Ket no ti sangcabassit iti bagida a natay agdisso iti bin-i a maimula, nadalus.

³⁸ Ngem no ti danum maicabil iti bin-i, ken no ti bassit iti bagida, a natay agdisso iti daydiay, narugitto cadacayo.

³⁹ Ket uray no ania nga animal, a mabalinyo a sidaen, matay; ti macasagid iti bagida a natay narugitto agpapan iti rumabii.

⁴⁰ Ket ti mangan iti bagi daydiay a natay, labaannanto dagiti pagan-anayna ket narugitto agingga iti rumabii.

⁴¹ Ket tunggal maysa nga animal nga aguyas nga agcarcarayam iti daga maysa a nacarimrimon; daytoy dinto macan.

⁴² Uray ania nga yuyusna ti bucsitna, ken uray ania a mangicarayam cadagiti uppat a sacsacana, wenno uray ania nga adu ti sacsacana, uray dagup amin nga agcarcarayam iti daga, dicayto mangan cadagita, ta dagita macarimonda.

⁴³ Dicayto agaramid iti pacarimonan cadacayo maipuon laeng iti maysa nga animal nga aguy-uyas; dicayto met mangar-aramid iti pacarugitanyo cadagidiay, tapno mamulitancayo gapu cadacuada.

⁴⁴ Ta siac ni Jehova a Diosyo: santificarenyo dagiti bagbagiyo, ket agsantocayo; ta siac santoac: dicayto met mulmulitan dagiti bagbagiyo iti uray-ania a kita cadagiti aguy-uyas nga aggaraw iti rabaw ti daga.

⁴⁵ Ta siac ni Jehova a nangaon cadacayo iti daga nga Egipto, ta siac ti Diosyo: isu ti gapuna nga agsantocayto, ta siac santoac.

⁴⁶ Daytoy ti alagaden maipapan iti animal, ken iti tumatayab, ken iti amin a parsua a nabiag nga aggaraw iti danum, ken iti amin a naparsua nga aguy-uyas iti daga,

⁴⁷ Tapno mailasin ti saan a nadalus ken ti nadalus, ken ti nabiag a parsua a mabalin a canen, ken ti naparsua a nabiag a saan a macan.