Levitico 10 - Ti Biblia (1973)

Ti basol da Nadab ken Abiu. Dagiti rebbeng ken binglay dagiti papadi.

¹ Ket ni Nadab ken ni Abiu, nga annac a lallaki ni Aaron, innalada tunggal maysa ti incensariona, ket iniccanda iti apuy, sada incabil ti incienso, ket indatonda ti sabali nga apuy ken Jehova, a dina imbilin cadacuada.

² Ket ti apuy rimmuar iti sango ni Jehova, ket inalun-unna ida, ket natayda iti sango ni Jehova.

³ Idin ni Moises kinunana ken Aaron, Daytoy ti imbaga ni Jehova a kinunana, Siac masantificaracto cadagiti umasideg caniac, ket iti sango ti amin nga umili maglorificaracto. Ket ni Aaron nagulimec.

⁴ Ket ni Moises inayabanna da Misael ken Elisafan, nga annac a lallaki ni Uzziel nga uliteg ni Aaron, ket kinunana cadacuada, Umasidegcayo, ket ipanawyo ditoy sango ti santuario iti ruar ti pacarso dagiti cacabsatyo.

⁵ Iti casta immasidegda, ket impanda ida a sicacawes iti ruar ti pacarso; cas sinao ni Moises.

⁶ Ket ni Moises kinunana ken Aaron, ken Eleazar, ken Itamar nga annacna a lallaki, Dicayo wacrayen ti booc ti oloyo, dicayo met pigisen ti cawcawesyo; tapno dicayo matay, ken tapno di-macapungtot iti dagup ti gimong: ngem baybay-anyo dagiti cacabsatyo, ti dagup ti ili nga Israel, leddaangenda ti puur a pinasged ni Jehova.

⁷ Ket dacayo dicay rumrumuar iti ruangan ti tolda ti gimong, di la ket ta mataycayo; gapu ta ti lana ni Jehova a pagsapsapo adda cadacayo. Ket inaramidda ti mayannurot iti sao ni Moises.

⁸ Ket ni Jehova nakisao ken Aaron a kinunana,

⁹ Sica wenno dagiti annacmo a lallaki agraman kenca, dicay uminum iti arac wenno naingel nga inumen no sumreccayo iti tolda ti gimong, tapno dicay matay: daytoy maalagadto nga agnanayon cadagiti caputotanyo:

¹⁰ Ken tapno mailasinyo ti nasantoan ken sapasap, ken ti saan a nadalus ken nadalus;

¹¹ Ken tapno isuroyo cadagiti annac ti Israel ti dagup dagiti al-alagaden nga imbaga ni Jehova iti ngiwat ni Moises.

¹² Ket ni Moises nakisao ken Aaron, ken Eleazar ken Itamar, nga annacna a lallaki a nabati, Alaenyo ti daton a macan a natda cadagiti datdaton a naaramid iti apuy ken Jehova, ket canenyo a di-nalevaduraan iti sibay ti altar; ta isu ti nasantoan unay;

¹³ Ket canenyonto iti maysa a disso a nasantoan, gapu ta isu ti pannacabagim, ken pannacabagi dagiti annacmo a lallaki, cadagiti datdaton a naaramid iti apuy ken Jehova: ta casta ti naibilin caniac.

¹⁴ Ket ti barucong a mailili ken ti maitayag a luppo canenyonto iti maysa a yan a nadalus; sica, ken dagiti annacmo a lallaki ken babbai agraman kenca: ta dagidiay maitedda a cas pannacabagim, ken pannacabagi dagiti annacmo, cadagiti sacrificio dagiti datdaton a maipaay iti cappia dagiti annac ti Israel.

¹⁵ Ti maitayag a luppo ken ti mailili a barucong yegdanto agraman cadagiti datdaton a maaramid iti apuy ti taba, tapno mailili nga agservi a maysa a daton a maitayag iti sango ni Jehova: ket cucuamto, ken cucua dagiti annacmo agraman kenca a maysa a pannacabagi iti agnanayon; cas imbilin ni Jehova.

¹⁶ Ket ni Moises sigaganetget a nagsapul iti calding ti daton gapu iti basol, ket, adtoy, napuuranen ket nagpungtot ken Eleazar ken Itamar, nabati nga annac a lallaki ni Aaron ket kinunana,

¹⁷ Ania ti gapuna a dicay nangan ti daton gapu iti basol iti disso ti santuario, idinto nga isu nasantoan unay, ket intedna cadacayo a mangawit iti kinadakes ti gimong, tapno aramidenyo ti pannacaabbongda iti sango ni Jehova?

¹⁸ Adtoy awan ti naiyeg nga darana: kinaagpaysona nacanyon coma a nayeg iti uneg ti santuario: iti santuario, cas imbilinco.

¹⁹ Ket ni Aaron kinunana ken Moises, Adtoy, daytoy nga aldaw impaayda ti datonda gapu iti basol ken ti datonda a mapuuran iti sango ni Jehova; ket naipaayda caniac cas cadagitoy: ket no kinnanco coma ita ti daton gapu iti basol, nacaay-ayonto ngata coma iti imatang ni Jehova?

²⁰ Ket idi a ni Moises nanggegna daytoy, naparagsacan met laeng.