San Juan 9 - Ti Biblia (1973)

Pannacaagas ti maysa a bulsec nanipud idi nayanac.

¹ Ket idi a limmabas ni Jesus, nakitana ti maysa a tao a bulsec nanipud idi pannacayanacna.

² Ket dagiti adalanna inintuudda kencuana, a cuncunada: Mannursuro, asino ti nacabasol, daytoy wenno dagiti dadackelna, iti casta nayanac a bulsec?

³ Simmungbat ni Jesus: Saan a nagbasol uray daytoy, uray dagiti dadackelna; ngem tapno dagiti aramid ti Dios maiparangarangda kencuana.

⁴ Rebbengtayo nga aramiden dagiti aramid ti nangibaon caniac bayat ti aldaw: ti rabii umay, inton awan ti macabalin nga agaramid.

⁵ Bayat ti caaddac ditoy lubong, siac ti silaw ti lubong.

⁶ Idi naisaona dagitoy, timmupra iti daga, ket nangaramid ti pitac iti natupraan ket sinapsapoanna iti pitac dagiti matana:

⁷ Ket kinunana kencuana: Inca, agdiram-osca idiay tanke ti Siloe, (a cayatna a saoen, Naibaon.) Napan ngarud, ket nagdiram-os ket nagawid a macakitan.

⁸ Dagiti carcarruba ngarud, ken dagiti nacakita idi damo kencuana a makilimlimos, kinunada: Saan a daytoy aya daydi agtugtugaw ken makilimlimos?

⁹ Dagiti dadduma kinunada: Isu daytoy, dagiti sabsabali kinunada: Saan, no di ket umasping kencuana. Isu kinunana: Siac.

¹⁰ Kinunada ngarud kencuana: Casano ngarud ti pannacalucat dagiti matam?

¹¹ Isu simmungbat: Ti tao a managan Jesus nangaramid ti pitac, ket sinapsapoanna dagiti matac ket kinunana caniac: Inca idiay Siloe, ket agdiram-osca: Napanac ngarud, nagdiram-osac ket nacakitaac.

¹² Ket kinunada kencuana: Adino ti yanna? Isu cunana: Diac ammo.

¹³ Impanda cadagiti Fariseo daydi nga bulsec idi.

¹⁴ Ket aldaw ti panaginana idi inaramid ni Jesus ti pitac ken linuctanna dagiti matana.

¹⁵ Inintuudda manen ngarud kencuana dagiti Fariseo no casano ti pannacakitana. Ket kinunana cadacuada: Nangicabil ti pitac cadagiti matac, ket nagdiram-osac ket macakitaac.

¹⁶ Dadduma ngarud cadagiti Fariseo kinunada: Daytoy a tao saan a naggapu iti Dios, ta saanna a ngilinen ti aldaw a panaginana. Ngem dagiti sabsabali kinunada: Casano ti pannacabalin ti maysa a tao a managbasol a mangaramid cadagiti cacasta a pagilasinan? Ket adda panagsusupadi cadacuada.

¹⁷ Kinunada ngarud manen idi bulsec: Sica, ania ti cunaem kencuana, idinto a linuctanna dagiti matam? Ket kinunana: Isu ti maysa a mammadto.

¹⁸ Dagidi Judio ngarud saanda a namati iti maipapan kencuana, a bulsec idi damo ket nacakita, agingga idi naayabanda dagiti dadackel daydi immawat ti pannacakitana,

¹⁹ Ket inintuudda cadacuada a cuncunada: Isu daytoy ti anacyo, daydi cunayo a nayanac a bulsec? Casano ngarud a makakita ita?

²⁰ Simmungbat dagiti dadackelna ket kinunada: Ammomi a daytoy ti anacmi ken nayanac a bulsec;

²¹ Ngem dicam ammo no casano ti pannacakitana ita: ken no asino ti nanglucat cadagiti matana, dicam ammo: isu ti pagintuudanyo; nataenganen: isu agsaanto iti maipapan kencuana.

²² Dagitoy kinuna dagiti dadackelna, ta cabutengda idi dagiti Judio: ta dagiti Judio nagnunumoandan a no adda mangipudno nga isu ti Cristo, maparuar iti sinagoga.

²³ Gapuna kinuna dagiti dadackelna: Nataenganen, isu ti pagintuudanyo.

²⁴ Inayabanda manen ngarud ti tao a bulsec idi, ket kinunada kencuana: Iccam ti pammadayaw iti Dios: ammomi a daytoy a tao managbasol.

²⁵ Isu simmungbat ngarud: No managbasol, diac ammo: maysa a banag ti ammoc, isu nga idinto a bulsecac idi, ita macakitaac.

²⁶ Kinunada, ngarud kencuana: Ania ti inaramidna aya kenca? Casano ti pananglucatna cadagiti matam?

²⁷ Sinungbatanna ida: Imbagacon cadacayo, ket dicay impangag: apay-apay cayatyo manen a denggen? Cayatyo met aya ti agbalin nga adalanna?

²⁸ Ket isu nagsasaoanda ket kinunada: Sica ti adalanna ngem dacami adalannacam ni Moises.

²⁹ Ammomi a ti Dios nakisao ken Moises; ngem daytoy a tao dicam ammo no adino ti naggapuanna.

³⁰ Simmungbat daydi tao, ket kinunana cadacuada: adtoy ti nacascasdaaw a banag, a dicay ammo no adino ti naggapuanna, ket idinto a linuctanna pay dagiti matac.

³¹ Ammotayo a ti Dios dina ipangag dagiti managbasol; ngem no adda managdayaw iti Dios ket aramidenna ti pagayatanna, isu ti denggenna.

³² Nanipud idi panangrugi ti lubong awan pay nangngegan a nanglucat cadagiti mata ti maysa a tao a nayanac a bulsec.

³³ No daytoy a tao saan coma a naggapu iti Dios, awan coma ti mabalinna nga inaramid,

³⁴ Simmungbatda ket kinunada ken cuana: Naigamer iti basol ti pannacabukelmo, ket isuronacami? Ket pinaruarda.

³⁵ Nangngeg ni Jesus nga pinaruarda: ket idi nasaracanna, kinunana: Mamatica iti Anac ti Dios?

³⁶ Isu simmungbat ket kinunana: Ket asino, Apo, tapno mamatiac kencuana?

³⁷ Ket kinuna kencuana ni Jesus: Nakitamon ket isu met laeng ti makisasao kenca.

³⁸ Ket kinunana: Mamatiac, Apo; ket nagdayaw kencuana.

³⁹ Ket kinuna ni Jesus: Siac immayac ditoy lubong a maipaay iti panacaocom: tapno dagiti saan a macakita, macakitada, ket dagiti macakita, agbalinda a bulsec.

⁴⁰ Dagiti Fariseo a naital-laong kencuana, nangngegda dagitoy ket kinunada kencuana: Bulseccami met aya?

⁴¹ Kinuna ni Jesus cadacuada: No bulseccay coma, awan coma ti basolyo: ngem ita cunayo: Macakitacami; iti casta ti basolyo mataginayon.