San Juan 8 - Ti Biblia (1973)

¹ Ket ni Jesus napan idiay Bantay dagiti Olivo.

² Ket iti agsapa unay napan manen iti Templo, ket amin dagiti umili immayda kencuana; ket isu nagtugaw, ket insursurona ida.

³ Ket dagiti escriba ken Fariseo iyegda ti maysa a babai a nasaracanda iti pannakiabig iti dina asawa: ket idi incabilda iti tengnga.

⁴ Cunada kencuana: Mannursuro, daytoy a babai natiliw itay madama a makiabig iti dina asawa.

⁵ Ket iti Linteg ni Moises imbilinna cadacami nga uburenmi dagiti cacasta: Sica ngarud ania ti cunam?

⁶ Ngem daytoy kinunada a pangsuut kencuana, tapno adda pacabalinanda a mangidarum kencuana. Ngem ni Jesus nagdumog, ket pinagsuratna ti ramayna iti daga.

⁷ Ngem agsipud ta ulit-ulitanda a pagsaludsudan, naglinteg ket kinunana cadacuada: Ti awan basolna cadacayo, umuna a mangibacal coma ti bato kencuana.

⁸ Ket nagdumog manen, ket pinagsuratna ti ramayna iti daga.

⁹ Ket isuda, idi mangngegda daytoy, rimmuarda a nasaggaysa, manipud cadagiti calacayan agingga cadagiti naudi: ket napanawan a maymaysa ni Jesus, ken daydi babai nga adda iti tengnga.

¹⁰ Ket naglinteg ni Jesus, ket kinunana kencuana: Babai, adino ti yanda? Awan ti nangdusa kenca?

¹¹ Ket isu kinunana: Apo, awan. Ket ni Jesus kinunana: Uray siac saanca a dusaen: incan ket manipud ita dica agbasolen.

Palawag ni Jesus maipapan iti nadiasan a pannacaibaonna.

¹² Ni Jesus kinasaona manen ngarud idan, a cuncunana: Siac ti silaw ti lubong; ti sumurot caniac, saanto a magna iti sipnget; no di ket addanto kencuana ti silaw ti biag.

¹³ Dagiti Fariseo ngarud, kinunada kencuana: Sica sacsiam ti bagim: ti pangpanecnecmo saan a pudno.

¹⁴ Ni Jesus simmungbat ket kinunana cadacuada: Uray sacsiac ti maipapan caniac, pudno ti pangpanecnecco, ta ammoc no adino ti naggapuac ken no adino ti papanac; ngem dicay ammo no adino ti paggapuac ken no adino ti papanac.

¹⁵ Dacayo mangocomcayo a mayannurot iti lasag; ngem siac awan ti tao nga ocomec.

¹⁶ Ket uray no mangocomac ti panangipatoc pudno, ta saanac a maymaysa, no di ket siac ken ti Ama a nangibaon caniac.

¹⁷ Ket naisurat pay iti lintegyo a ti pangpanecnec ti dua a tao isu ti pudno.

¹⁸ Siac ti mangpanecnec iti bagic ken panecnecannac ti Ama a nangibaon caniac.

¹⁹ Kinunada ngarud, kencuana: Adino ti yan ti Amam? Simmungbat ni Jesus: Uray siac, uray ni Amac dicay ammo; no ammodac coma, ammoyo met coma ni Amac.

²⁰ Dagitoy a sao kinuna ni Jesus idiay tesoreria idi nangisursuro idiay Templo: ket awan ti nangtiliw kencuana, ta dipay dimteng ti horasna.

²¹ Kinuna ngarud manen ni Jesus cadacuada: Innacon ket sapulendacto, ket iti basolyo mataycayto: no adino ti papanac, dicayo mabalin ti umay.

²² Kinuna ngarud dagiti Judio: Papatayennanto ngata ti bagina, ta cunana: No adino ti papanac, dicayo mabalin ti umay?

²³ Ket kinunana cadacuada: Dacayo taga babacayo, siac taga ngatoac; taga ditoy a lubongcayo; siac saanac a taga ditoy a lubong.

²⁴ Kinunac ngarud cadacayo a mataycayo cadagiti basbasolyo; ta no dicayo patien a siac daydi, cadagiti basbasolyo mataycayto.

²⁵ Kinunada ngarud kencuana: Siasinoca? ni Jesus kinunana cadacuada: Daydi met laeng imbagac cadacayo idi damo.

²⁶ Adu dagiti masapul nga ibagac ken ipatoc iti maipapan cadacayo; ngem ti nangibaon caniac, napudno; ket siac, dagiti nangngegco kencuana, dagitoy ti saoec iti lubong.

²⁷ Saanda a naawatan nga isu casasaona ida iti maipapan iti Ama.

²⁸ Kinuna ngarud ni Jesus: Inton maibayogyon ti Anac ti tao, isunto ti pannacaammoyo a siac daydi ken awan ti aramidec a sisiac; no di ket cas iti insuro caniac ni Ama, dagitoy ti saoec.

²⁹ Ket ti nangibaon caniac adda caniac, saannac a binaybay-an a maymaysa, ta siac agnanayon nga aramidec dagiti macaay-ayo kencuana.

³⁰ Idi sasaoenna dagitoy, adu dagiti namati kencuana.

³¹ Kinuna ngarud ni Jesus cadagiti Judio a namati kencuana: No agtalinaedcayo coma iti saoc, pudno a dacayto ti adalac;

³² Ket maammoanyonto ti pudno, ket ti kinapudno luc-atannacayto.

³³ Simmungbatda kencuana: Caputotannacami ni Abraham, ket uray caano awan ti nacatagabuanmi: Casano ti panagkunam: Maluc-atancayto?

³⁴ Ni Jesus simmungbat cadacuada: Pudno, pudno, cunac cadacayo nga amin nga agaramid iti basol, tagabu ti basol.

³⁵ Ket ti tagabu saan nga agtaeng iti balay nga agnanayon: ti anac agtaeng nga agnanayon.

³⁶ No ngarud ti Anac luc-atannacayo, pudno nga agwayawayacayto.

³⁷ Ammoc a caputotannacayo ni Abraham, ngem agawaandac a papatayen, ta ti saoc awan pagiananna cadacayo.

³⁸ Siac saoec dagiti nakitami ken Ama, ket dacayo met aramidenyo dagiti nangngegyo ken amayo.

³⁹ Simmungbatda ket kinunada kencuana: Ti amami isu ni Abraham. Cuna cadacuada ni Jesus: No annacnacayo coma ni Abraham, dagiti aramid ni Abraham coma ti aramidenyo.

⁴⁰ Ngem ita agawaandac a papatayen, toy tao a nagsao cadacayo iti pudno, a nangegco iti Dios; daytoy saan nga inaramid ni Abraham.

⁴¹ Dacayo aramidenyo dagiti ar-aramid ni amayo. Kinunada kencuana: Dacami saancam a nayanac iti pannakicamalala; adda maymaysa nga amami, nga isu ti Dios.

⁴² Ni Jesus kinunana cadacuada: No ti Dios coma ti amayo ayatendac coma, ta immayac ken naggapuac iti Dios, ta saanac nga immay a nacnakemco laeng ngem isu imbaonnac.

⁴³ Ania ti gapu a dicay maawatan ti panagsaoc? ta awan pannacabalinyo a dumngeg ti saoc.

⁴⁴ Cucuanacayo ti diablo nga amayo, ket cayatyo nga aramiden dagiti calicagum ni amayo. Isu nacapapatay nanipud idi damo, ket saan a nagtalinaed iti pudno, ta awan ti pudno kencuana. No agsao ti ulbod, saoenna ti cababalinna met laeng ta isu manangulbod ket ama ti kinaulbod.

⁴⁵ Ngem siac agsipud ta saoec ti pudno, didac patien.

⁴⁶ Asino cadacayo ti mangbabalaw caniac iti basol? No saoec ti pudno, ania ti gapuna a didac patien?

⁴⁷ Ti agtaud iti Dios, denggenna dagiti sao ti Dios: gapu iti daytoy, dacayo dicay agdengngeg ta saancayo a nagtaud iti Dios.

⁴⁸ Simmungbat dagiti Judio ket kinunada kencuana: Saan aya a naimbag ti panagcunami a taga Samariaca ket adda sairom?

⁴⁹ Simmungbat ni Jesus: Siac awan ti sairoc, no di ket padayawac ni Amac; ket dacayo ibabaindac.

⁵⁰ Ngem siac diac sapulen ti pacaidayawac: adda maysa a mangdayaw ken mangipato caniac.

⁵¹ Pudno, pudno, cunac cadacayo: No adda mangsalimetmet iti saoc, saannanto a makita ni patay uray caano.

⁵² Dagiti Judio kinunada kencuana: Ita ammomi nga adda sairom. Ni Abraham natay casta met dagidi mammadto, ket kunam: No adda mangsalimetmet iti saoc, dinanto maramanan ni patay uray caano.

⁵³ Dacdackelca aya ngem ni amatayo nga Abraham, isu a natay? ken casta met dagiti mammadto natayda: asino ti panangipapanmo iti bagim?

⁵⁴ Simmungbat ni Jesus. No dayawec ti bagic met laeng, ti dayawco awan capapayanna; ni Amac ti mangidayaw caniac, nga isu ti cunayo a Diosyo:

⁵⁵ Ket isu dicay naammoan; ngem siac ammoc: ket no cunac coma nga diac ammo, caslaacto coma cadacayo, a naulbod: ngem isu ammoc, ket salimetmetac ti saona.

⁵⁶ Ni Abraham nga amayo nagragsac iti panangkitana iti aldawco, ket nakitana ket nagrag-o.

⁵⁷ Kinuna ngarud kencuana dagiti Judio: Awan pay lima pulo a tawenmo, ket nakitam aya ni Abraham?

⁵⁸ Kinuna cadacuada ni Jesus: Pudno, pudno, cunac cadacayo, idi casangoanan ti pannacayanac ni Abraham, addaacon.

⁵⁹ Pimmidutda ngarud ti batbato tapno uburenda; ngem ni Jesus naglemmeng ket rimmuar iti Templo.