San Juan 7 - Ti Biblia (1973)

Saan a pammati dagiti cacabsat ni Jesus.

¹ Ket idi nalpas dagitoy, nagna ni Jesus idiay Galilea: ta dina kinayat ti magna idiay Judea, ta dagiti Judio isu sinapsapulda a papatayen.

² Ket asideg idi ti fiesta dagiti Judio, ti fiesta dagiti abong-abong.

³ Kinunada ngarud kencuana dagiti cacabsatna: Pumanawca ditoy ket inca idiay Judea, tapno dagiti adalam makitada met dagiti aramidmo nga aramidem.

⁴ Ta awan ti tao nga agaramid ti uray ania a nalimed, idinto a tarigagayanna a mailatac. No aramidem dagitoy, agparangca iti lubong.

⁵ Ta uray dagiti cacabsatna saanda a mamati idi kencuana.

⁶ Cuna ngarud ni Jesus cadacuada: Ti aldawco saan pay a dimteng; ngem ti aldawyo cancanayon a sisa sagana.

⁷ Ti lubong saannacayo a mabalin a guraen, ngem siac guraennac, ta sacsiac ti maipapan kencuana, a dakes dagiti aramidna.

⁸ Sumang-atcayo iti fiesta; siac diac pay sumang-at itoy a fiesta, ta ti aldawco saan pay a dimteng.

⁹ Ket idi naisaona dagitoy cadacuada, nagbati idiay Galilea.

Ni Jesus mangisuro idiay Templo iti fiesta dagiti abong-abong. Panagsusuppiat dagiti Judio a gapu kencuana.—Agawaanda a tilawin.

¹⁰ Ngem idi nacasang-aten dagiti cacabsatna a makifiesta, simmang-at met, a saan a nalatac, no di ket cas la nalimed.

¹¹ Dagiti Judio ngarud sinapsapulda iti pagrarambacan, ket cuncunada: Adino ti yanna?

¹² Ket adda idi dackel a tanabutob cadagiti adu a tao iti maipapan kencuana, ta kinuna dagiti dadduma: Isu naimbag a tao. Ket dagiti sabsabali cunada: Saan, no di ket iyawawanna dagiti adu a tao.

¹³ Ngem awan ti nagsao a nalatac iti maipapan kencuana gapu ti butengda cadagiti Judio.

¹⁴ Ket idi ngalayen ti fiesta, simmang-at ni Jesus iti Templo ket nangisuro.

¹⁵ Nasnasdaaw ngarud dagiti Judio, a cuncunada: Casano ti pannacaammo daytoy a tao cadagiti pagbasaan idin to a di nagadal?

¹⁶ Simmungbat ngarub cadacuada ni Jesus, ket kinunana: Ti isursuroc saanco a cucua, no di cucua ti nangibaon caniac.

¹⁷ No adda agpanggep nga agaramid ti pagayatanna, maammoannanto ti maipapan iti isursuroc, no aggapu iti Dios, wenno no agsaoac a sisiac.

¹⁸ Ti mangibunannag iti saona met laeng sapulenna ti pacaidayawanna, ngem ti agsapul ti pacaidayawan ti nangibaon kencuana, isu met laeng ti napudno ket awan kencuana ti kinakil-lo.

¹⁹ Dinacayo aya iniccan ni Moises ti linteg, ket awan pay cadacayo ti mangaramid ti linteg? Apayapay agawaandac a papatayen?

²⁰ Simmungbat dagiti adu a tao: Adda sairom: asino ti manggayagay a mamapatay kenca?

²¹ Ni Jesus simmungbat ket kinunana cadacuada: Maysa nga aramid ti inaramidco, ket agsidsiddaawcay amin gapu iti dayta.

²² Ni Moises intedna cadacayo ti pannacacugit (saan a gapu ta nagtaud ken Moises, no di ket cadagidi amma); ket iti aldaw a panaginana cugitenyo ti tao.

²³ No ti tao awatenna ti pannacacugit iti aldaw a panaginana tapno ti linteg ni Moises saan a masalungasing, marurodcayo aya caniac agsipud ta pinaimbagco nga awan pagcuranganna ti maysa a tao iti aldaw a panaginana?

²⁴ Saancayo nga agipato a cas ti langa, no di ket agipatocayo iti maysa a nalinteg a panangipato.

²⁵ Kinuna ngarud dagiti dadduma a taga Jerusalem: Saan aya nga daytoy ti sapsapulenda a papatayen?

²⁶ Ket adtoy, agsasao iti nalatac ket awan ti cunaenda kencuana. Saan a pudno aya a dagiti agturay ammoda a daytoy ti Cristo?

²⁷ Ngem daytoy a tao, ammomi no adino ti naggapuanna: ngem ti Cristo, inton umay, awanto ti macaammo no adino ti paggapuanna.

²⁸ Ni Jesus ngarud a mangisursuro iti templo impigsana ti timecna a cuncunana: Amammodac ket ammoyo met ti naggapuac; ket saanac a naggapu caniac met laeng; ngem ti nangibaon caniac napudno, isu a dicay amammo.

²⁹ Siac ammoc, ta naggapuac kencuana, ket isu imbaonnac.

³⁰ Isu inagawaanda ngarud a tiliwen; ngem awan ti nangipatay kencuana ti imana, ta saan pay a dimteng ti horasna.

³¹ Ngem cadagiti adu unay a tao, adu cadacuada ti namati kencuana ket kinunada: Ni Cristo, inton umay, agaramidto ngata ti adadda a pagilasinan ngem cadagiti inaramid daytoy a tao?

³² Dagiti Fariseo nangngegda dagiti adu a tao a tantanabutubenda dagitoy a maipapan kencuana: ket dagiti cangatoan a papadi ken dagiti Fariseo nangibaonda cadagiti policia a mangtiliw kencuana.

³³ Ni Jesus kinunana ngarud: Adda pay bassit a tiempo a makipagianac cadacayo, saacto mapan iti nangibaon caniac.

³⁴ Sapulendacto ket didacto masaracan; ket ti pagianac, dicay mabalin ti umay.

³⁵ Dagiti Judio ngarud kinuncunada nga isuda; Adinonto ti papanan daytoy a ditayto masaracan? Mapanto ngata cadagiti naiwara cadagiti Griego ken mangisuro cadagiti Griego?

³⁶ Ania a sao daytoy a kinunana: Sapulendacto ket didacto masaracan; ket no adino ti yanco, dicay mabalin ti umay?

³⁷ Idi camaudianan ken dackel nga aldaw ti rambac, ni Jesus nagtacder ket nagpuccaw a kinunana: No adda mawaw, umay caniac ket uminum.

³⁸ Ti mamati caniac, cas cunaen ti Surat, carcarayan ti danum a nabiag ti agayusto manipud iti unegna.

³⁹ Ngem sinaona daytoy a maipapan iti Espiritu nga awatento dagiti mamati kencuana, ta saan pay idi a naited ti Espiritu, ta ni Jesus saan pay idi a naipanayag.

⁴⁰ Dadduma ngarud cadagidi adu a tao, idi mangegda dagitoy a sao, kinunada: pudno a daytoy ti mammadto.

⁴¹ Dagiti sabsabali kinunada: Daytoy ti Cristo. Ngem kinuna dagiti dadduma: Ania! Idiay Galilea aya ti paggapuan ti Cristo?

⁴² Saan a kinuna aya ti Surat: Nga iti caputotan ni David ken idiay Bet-lehem, puroc a tinaudan ni David, ti paggapuan ti Cristo?

⁴³ Iti casta napataud ti panagsusupadi dagiti adu a tao a gapu kencuana.

⁴⁴ Ket dadduma cadacuada cayatda coman a tiliwen, ngem awan ti nangipatay cadagiti imada kencuana.

⁴⁵ Dagiti ngarud policia nagsublida cadagiti cangatoan a papadi ken Fariseo; ket dagitoy kinunada cadacuada: Apayapay isu dicay inyeg?

⁴⁶ Dagiti policia simmungbatda: Uray caano awan ti tao a nagsao ti castoy.

⁴⁷ Dagiti Fariseo ngarud simmungbatda cadacuada: Napayaw-awancayo met aya?

⁴⁸ Adda aya namati kencuana cadagiti agturay wenno cadagiti Fariseo?

⁴⁹ Ngem dagitoy adu a tao a dida ammo ti linteg, mailunodda.

⁵⁰ Cuna cadacuada ni Nicodemo, daydi immay kencuana idi, ta maysa met cadacuada:

⁵¹ Ocomen aya ti lintegtayo ti tao, no dina umuna a denggen, ken ammoen ti aramidenna?

⁵² Simmungbatda ket kinunada kencuana: Sica met taga Galileaca aya? Sukimatem ket kitaem a manipud idiay Galilea awan ti tumaud a mammadto.

Ti babai a nakiabig iti dina asawa.

⁵³ Ket nagawidda, tunggal maysa iti balayna.