San Juan 6 - Ti Biblia (1973)

Ti yaada dagiti tinapay.

¹ Idi nalpas dagitoy, napan ni Jesus idiay bal-lasiw ti baybay ti Galilea nga isu ti baybay ti Tiberias.

² Ket simmurot kencuana ti adu a tao, ta nakitada dagiti pagilasinan nga inaramidna cadagiti masacsakit.

³ Ket simmang-at ni Jesus iti maysa a bantay, ket nagtugaw sadiay agraman dagidi adalanna.

⁴ Ket asideg idi ti pascua a fiesta dagiti Judio.

⁵ Ni Jesus ngarud, idi intannawagna dagiti matana, ket makitana nga umay kencuana ti adu a tao, cunana ken Felipe: Adino ti gatangantayo ti tinapay tapno macapangan dagitoy?

⁶ Ngem kinunana daytoy, tapno suutenna; ta isu met laeng ammona ti aramidennanto.

⁷ Simmungbat kencuana ni Felipe: Dua gasut a denario a tinapay saan nga umanay cadacuada, tapno tunggal maysa cadacuada macapangan bassit.

⁸ Cuna kencuana ti maysa cadagidi adalanna, ni Andres a cabsat ni Simon Pedro.

⁹ Adda ditoy ti maysa nga agtutubo a lalaki nga adda lima a tinapayna a cebada ken dua nga ican; ngem aniada, dagitoy, iti castoy nga caadu ti tattao?

¹⁰ Kinuna ni Jesus: Pagtugawenyo dagiti tao. Ket adda idi ti adu a root iti daydi a disso: nagtugaw ngarud dagidi lallaki a cas bilang ti lima ribo.

¹¹ Ni Jesus ngarud innalana dagiti tinapay, ket idi nalpas a nagyaman, binununganna dagidi situtugaw; ket casta met cadagidi ic-ican iti cas caadu ti kinayatda.

¹² Ket idi napnecdan, kinunana cadagiti adalanna: Urnungenyo dagiti pispisi a natda tapno awan ti mapucaw.

¹³ Nagpidutda ngarud, ket pinunnoda ti sangapulo ket dua nga alat cadagiti pispisi dagiti lima a tinapay a cebada, a natidda cadagiti nangan.

¹⁴ Dagiti tao idi makitada ngarud daydi pagilasinan nga inaramidna, kinunada: Kinapudnona a daytoy ti mammadto nga umay ditoy lubong.

¹⁵ Ni Jesus ngarud idi a naawatanna a ngannganida umay ket alaenda a piliten, tapdo aramidenda nga ari, napan manen nga isisu idiay bantay.

Ni Jesus magna iti rabaw ti baybay.

¹⁶ Ket idi rumabiin dagiti adalanna simmalogda iti baybay;

¹⁷ Ket limmuganda iti maysa a barangay, bumalbal-lasiwda iti baybay nga agturong idiay Capernaum. Ket nasipnget idin, ket ni Jesus saan pay nga immay cadacuada.

¹⁸ Ket ti baybay nagdawel agsipud ta nagangin iti napigsa.

¹⁹ Idi nacapaggaodda ngarud, ti cas la lima wenno pito a kilometro, makitada ni Jesus a magmagna iti rabaw ti baybay, ket umasideg iti barangay: ket nagbutengda.

²⁰ Ngem isu cunana cadacuada: Siac; dicay agbuteng.

²¹ Nagayatanda ngarud nga inawat iti barangay: ket iti apagbiit ti barangay dimteng iti daga a papananda.

Ni Jesus isu ti tinapay ti biag a maipaay cadagiti mammati.

²² Iti sumuno nga aldaw, dagidi adu a tao nga agtatacder iti sabali a bangir ti baybay, nakitada nga awan ti sabali a barangay no di maymaysa, ket ni Jesus saan a simrec iti barangay a naicuyog cadagiti adalanna, no di ket dagidi adalanna napanda nga isisuda.

²³ (Nupay casta, adda barbarangay a naggapu idiay Tiberias, a dimteng iti asideg ti disso a nangananda ti tinapay, idi calpasan ti panagyaman ti Apo):

²⁴ Idi ngarud, nakita dagiti tao a ni Jesus awan sadiay, ken uray dagiti adalanna, simrecda cadagiti barangay ket napanda idiay Capernaum a nangsapsapul ken Jesus.

²⁵ Ket idi nasaracanda iti sabali a bangir ti baybay, kinunada kencuana: Mannursuro, caano ti idadatengmo ditoy?

²⁶ Ni Jesus simmungbat cadacuada, ket kinunana: Pudno, pudno, cunac cadacayo: Sapulendac, saan a gapu ta nacakitacayo cadagiti pagilasinan, no di ket gapu ta nangancayo cadagiti tinapay ket nabsogcayo.

²⁷ Agtrabajocayo, saan a gapu ti taraon a mapucaw, no di ket gapu iti taraon a mataginayon a maipaay iti biag nga agnanayon, nga itedto cadacayo ti Anac ti tao: ta isu pinanecnecan ti Ama a Dios.

²⁸ Kinunada ngarud kencuana: Ania ti rebbengmi nga aramiden, tapno maaramidmi dagiti aramid ti Dios?

²⁹ Simmungbat ni Jesus ket kinunana cadacuada: Daytoy ti aramid ti Dios mamaticayo iti daydiay nga imbaonna.

³⁰ Kinunada ngarud, kencuana; Ania ngarud ti pagilasinan nga aramidem, tapno makitami ket patiendaca? Ania ti aramidem?

³¹ Dagiti ammatayo kinnanda ti mana idiay let-ang cas adda a naisurat: Tinapay a nailangitan intedna cadacuada a canen.

³² Ni Jesus ngarud kinunana cadacuada: Pudno, pudno, cunac cadacayo; Saan a ni Moises ti nangted cadacayo ti tinapay a nailangitan; no di ket ni Amac itedna cadacayo ti pudno a tinapay nga aggapu sadi langit.

³³ Ta ti tinapay ti Dios isu dayta bumaba manipud langit ket mangted ti biag iti lubong.

³⁴ Kinunada ngarud kencuana: Apo, itedmo cadacami a patinayon daytoy a tinapay.

³⁵ Ni Jesus kinunana cadacuada; Siac ti tinapay ti biag: ti umay caniac, saanto nga agbisin; ket ti mamati caniac, uray caano saanto a mawaw.

³⁶ Ngem kinunac cadacayo a nakitadac, ket nupay casta, dicay mamati.

³⁷ Isu-amin nga ited caniac ni Ama, umayto caniac; ket ti umay caniac, diacto pagtalawen.

³⁸ Ta bimmabaac nanipud langit, saan a tapno aramidec ti pagayatac, no di ti pagayatan ti nangibaon caniac.

³⁹ Ket daytoy ti pagayatan ti nangibaon caniac: Nga amin nga intedna caniac, awan coma ti pucawec, no di ket pagungarec iti camaudianan nga aldaw.

⁴⁰ Ta daytoy ti pagayatan ni Amac: Nga tunggal maysa a macakita iti Anac ket mamati kencuana, adda coma biagna nga agnanayon: ket isu pagungarecto iti camaudianan nga aldaw.

⁴¹ Agtantanabutob ngarud dagiti Judio iti maipapan kencuana agsipud ta kinunana: Siac ti tinapay a bimmaba nanipud langit.

⁴² Ket kinunada: Saan aya a daytoy Jesus ti anac ni Jose, a da ama ken inana amammotayo? Casano ita ti panagcunana: Nanipud langit immulogac?

⁴³ Ni Jesus simmungbat ket kinunana cadacuada: Dicay agtatanabutob.

⁴⁴ Awan ti tao a macabalin nga umay caniac, no saan a guyuguyen ni Ama a nangibaon caniac, ket isu pagungarecto iti camaudianan nga aldaw.

⁴⁵ Adda nga insurat dagiti mammadto: Ket maisurodanto amin iti Dios. Tunggal maysa nga dimngeg iti Ama ket nacasursuro, umay caniac.

⁴⁶ Awan ti tao a nacakita ken Ama, no di ket ti naggapu iti Dios, isu ti nakakita ken Ama.

⁴⁷ Pudno, pudno, cunac cadacayo: Ti mamati, caniac addaan biag nga agnanayon.

⁴⁸ Siac ti tinapay ti biag.

⁴⁹ Dagidi ammayo kinnanda ti mana idiay let-ang, ket natayda.

⁵⁰ Daytoy ti tinapay a bumaba manipud langit, tapno ti siasinoman a macapangan coma kencuana, saan coma a matay.

⁵¹ Siac ti tinapay a sibibiag a bimmaba nanipud langit: no adda mangan itoy a tinapay, agbiagto nga agnanayon, ket ti tinapay nga itdecto, a pacabiagan ti lubong isu ti lasagco.

⁵² Dagiti Judio ngarud nagsusuppiat ti maysa ken maysa a cuncunada: Casano ti pannacabalin daytoy a tao a mangted cadatayo ti lasagna a canen?

⁵³ Ni Jesus ngarud kinunana cadacuada: Pudno, pudno; cunac cadacayo no saancayo a mangan iti lasag ti Anac ti tao, ken uminum iti darana, awanancayo iti biag.

⁵⁴ Ti mangan iti lasagco, ken uminum iti darac, adda biagna nga agnanayon: ket isu pagungarecto iti camaudianan nga aldaw.

⁵⁵ Ta ti lasagco pudno a pagtaraon, ket ti darac pudno nga inumen.

⁵⁶ Ti mangan iti lasagco ken uminum iti darac, aggian caniac ket siac kencuana.

⁵⁷ Cas ti Ama a sibibiag imbaonnac, ket agbiagac gapu iti Ama; casta met a ti mangan caniac, agbiagto gapu caniac.

⁵⁸ Daytoy ti tinapay a bimmaba nanipud langit: Saan a cas cadagidi ammayo a nanganda ti mana ket natayda; ti mangan itoy a tinapay, agbiagto nga agnanayon.

⁵⁹ Dagitoy sinaona idi nanursuro iti sinagoga idiay Capernaum.

Ni Jesus panawan dagiti adu cadagidi adalanna. Panangammo ni Pedro.

⁶⁰ Adu ngarud cadagidi adalanna, idi mangngegda kinunada; Naricut daytoy a sao, asino ti macabalin a dumngeg kencuana?

⁶¹ Ngem ni Jesus, agsipud ta naammoanna met laeng a dagiti adalanna agtantanabutobda gapu iti daytoy, kinunana cadacuada: Pacaitibcolanyo aya daytoy?

⁶² Anianto ketdin, no makitayonto ti Anac ti tao nga umuli idiay yanna nga immuna?

⁶³ Ti espiritu ti mangted iti biag; ti lasag awan ti maitedna: dagiti sao nga insaoc cadacayo, espirituda ken biag.

⁶⁴ Ngem adda dadduma cadacayo a saan a mamati. Ta ni Jesus nanipud idi damo ammona no siasino dagiti saan a mamati, ken no siasino ti mangliputto kencuana.

⁶⁵ Ket kinunana: Gapuna kinunac cadacayo nga awan ti macabalin nga umay caniac, no saan nga impaay kencuana ti Ama.

⁶⁶ Nanipud idin, adu cadagiti adalanna nagsanudda, ket saanda a nakicuyogen kencuana.

⁶⁷ Kinuna ngarud ni Jesus cadagiti sangapulo ket dua: Dacayo pumanawcayo met aya?

⁶⁸ Ket simmungbat kencuana ni Simon Pedro: Apo, asinonto ti papananmi? Sica addaanca cadagiti sao ti biag nga agnanayon.

⁶⁹ Ket dacami namaticami ket naammoanmi a sica ti Santo ti Dios.

⁷⁰ Ni Jesus simmungbat kencuana: Dicay aya pinili a sangapulo ket dua, ket maysa cadacayo isu diablo?

⁷¹ Ket ni Judas ti kinunana, anac ni Simon Iscariote, isu ti mangliputto kencuana, ta isu maysa met cadagiti sangapulo ket dua.