San Juan 5 - Ti Biblia (1973)

Pannacaagas ti saan a macagunay idiay Betesda.

¹ Idi nalpas dagitoy, adda maysa a rambac dagiti Judio ket ni Jesus simmangat idiay Jerusalem.

² Ket adda idiay Jerusalem iti abay ti ruangan dagiti carnero ti maysa a tanke, a managan Betesda iti sao ti Hebreo, isu nga adda lima nga arcona a sercan,

³ Cadagitoy adda a nagididda dagiti adu a masacsakit, bulbulsec, pilpilay, saan a macagunay, (nga agur-uray iti ti panaggaraw ti danum.

⁴ Ta maysa nga angel bumaba idi iti maysa a canito idi tanke ket kiburenna ti danum; ti umuna ngarud a sumrec idi tanke iti calpasan ti pannacakibur ti danum, maagasan iti uray ania a sakit nga adda kencuana.)

⁵ Ket adda idiay idi ti maysa a tao nga adda tal-lo pulo ket walo a tawenen a masakit.

⁶ Idi makita ni Jesus daytoy a naidalit, ken naammoanna nga adda idiay a nabayagen iti daydi a casasaad, kinunana kencuana: Cayatmo ti mapaimbag?

⁷ Simmungbat kencuana di masakit: Apo, awan ti tao a mangipisoc caniac idiay tanke no makibur ti danum; na no mapmapanac pay laeng, nacababan ti sabali nga umununa ngem siac.

⁸ Cuna ni Jesus kencuana: Tumacderca, bagcatem ta iddam ket magnaca.

⁹ Ket naigiddato a daydi tao napaimbag, ket binagcatna di iddana ket nagna. Ngem aldaw a panaginana idi.

¹⁰ Kinuna ngarud dagiti Judio idi napaimbag: aldaw a panaginana ket di maipalubos kenca a bagcatem ti iddam.

¹¹ Ngem isu simmungbat cadacuada: Ti nangpaimbag caniac, kinunana caniac: Bagcatem ti iddam ket magnaca.

¹² Inintuudda kencuana: Asino a tao ti nagcuna kenca; Bagcatem ti iddam ket magnaca?

¹³ Ngem daydi napaimbag dina ammo no asino; ta ni Jesus immadayu ta adda adu unay a tattao iti daydi a disso.

¹⁴ Idi cuan masaracan ni Jesus idiay Templo, ket kinunana kencuana: Adtoy, a napaimbagcan: dica agbasolen, di la ket ta mapasamac kenca ti dacdakes.

¹⁵ Ti tao pimmanaw, ket impacaammona cadagidi Judio a ni Jesus ti nangpaimbag kencuana.

Ni Jesus ipacaammona nga isu Anac ti Dios, a maymaysada iti Ama.

¹⁶ Ket gapu itoy, dagidi Judio amamsada ni Jesus, agsipud ta aramidenna dagitoy a banag iti aldaw a panaginana.

¹⁷ Ngem ni Jesus simmungbat cadacuada: Ni Amac agingga ita agar-aramid, ket agararamidac met.

¹⁸ Gapu itoy ngarud dagidi Judio naagagawada a mangpatay kencuana; ta saan laeng a dina ngilinen ti aldaw a panaginana no di ket cunana pay a ti Dios isu ti Amana, nga impadana ti bagina iti Dios.

¹⁹ Simmungbat ngarud ni Jesus ket kinunana cadacuada: Pudno, pudno cunac cadacayo: Ti Anac saanna a mabalinan ti agbucbucod nga agaramid iti uray ania no di ket ti makitana nga aramiden ti Ama, ta amin nga aramiden ti Ama dagitoy ti Anac aramidenna met a casta.

²⁰ Ta ti Ama ayatenna ti Anac, ket ipakitana kencuana dagiti amin nga aramidenna: ket ipakitananto kencuana dagiti dacdackel pay nga ar-aramid ngem dagitoy, tapno agsiddaawcayo.

²¹ Ta cas ti Ama pagungarenna dagiti natay ket iccanna ida ti biag, casta met ti Anac iccanna ti biag dagiti cayatna.

²² Ta ti Ama awan ti ocomenna, no di ket isu-amin a panangocom intedna iti Anac;

²³ Tapno dagiti isu-amin padayawanda ti Anac a cas met iti panangpadayawda iti Ama. Ti saan a mangpadayaw iti Anac, saanna a padayawan ti Ama a nangibaon kencuana.

²⁴ Pudno, pudno, cunac cadacayo: Ti dumngeg iti saoc ket patienna ti nangibaon caniac, adda biagna nga agnanayon; ket saanto nga umay iti pannacaocom, no di ket nanipud ken patay immalis iti biag.

²⁵ Pudno, pudno, cunac cadacayo. Umay ti horas, ket adda itan, a dagiti natay mangngegdanto ti timec ti Anac ti Dios; ket dagiti agdengngeg, agbiagdanto.

²⁶ Ta cas ti Ama adda kencuana met laeng ti biag, casta met impaayna nga ti Anac adda biag kencuana met laeng;

²⁷ Ket intedna met kencuana ti kinaturay a mangocom, agsipud ta isu Anac ti tao.

²⁸ Dicay pagsiddaawan daytoy, ta umay ti horas a dagiti amin nga adda cadagiti tanem mangngegdanto ti timecna,

²⁹ Ket rummuardanto: dagiti nagaramid ti naimbag, iti panagungar ti biag; ken dagiti nagaramid ti dakes, iti panagungar ti pannacaocom.

³⁰ Awan ti pannacabalinco nga agaramid a sisiac iti uray ania; cas iti mangngegco, mangocomac, ket ti panangocomco nalinteg, ta diac sapulen ti nakemco, no di ket ti nakem ti nangibaon caniac.

³¹ No panecnecac ti maipapan caniac met laeng, ti pangpanecnecco saan a pudno.

³² Sabali ti mangpanecnec iti maipapan caniac; ket ammoc a ti panecnec a pangpanecnecna iti maipapan caniac pudno.

³³ Nangibaoncayo ken Juan, ket pinanecnecanna ti pudno.

³⁴ Ngem siac diac awaten ti pangpanecnec a nataoan; ngem cunac dagitoy, tapno maisalacancayo.

³⁵ Isu idi ti silaw a sumged ken manglawag: ket kinayatyo ti nagrag-o iti apagbiit iti lawagna.

³⁶ Ngem adda dacdackel a pangpanecnecco ngem iti pangpanecnec ni Juan, ta dagiti aramid nga inted ni Ama caniac a leppasec, dagita met laeng nga aramid nga aramidec, panecnecanda ti maipapan caniac a ti Ama imbaonnac.

³⁷ Ket ni Ama a nangibaon caniac, panecnecanna ti maipapan caniac. Dacayo uray caano dicay nangngeg ti timecna ket dicay met nakita ti langana.

³⁸ Ket ti saona saan nga agtaeng cadacayo, ta ti imbaonna, dicayo patien.

³⁹ Dacayo sukimatenyo dagiti Sursurat, agsipud ta pagarupenyo nga adda cadacuada ti biagyo nga agnanayon; ket dagitoy isuda ti mangpanecnec ti maipapan caniac;

⁴⁰ Ket nupay casta madicayo nga umay caniac, tapno maaddaancayo coma ti biag.

⁴¹ Diac awaten ti dayaw a nataoan.

⁴² Ngem siac amammocayo nga awan cadacayo ti panagayat iti Dios.

⁴³ Immayac iti nagan ti Amac ket saandac nga awaten: no sabali ti umay coma iti naganna met laeng, isu awatenyonto.

⁴⁴ Casano ti pannacabalinna a mamaticayo, nga awatenyo ti dayaw iti maysa ken maysa, ket dicay biruken ti dayaw nga aggapu iti maymaysa laeng a Dios?

⁴⁵ Dicay pagarupen nga siac ipulongcayto iti sangoanan ni Ama; adda maysa a mangipulong cadacayo, ni Moises, a panginanamaanyo.

⁴⁶ Ta no pinatiyo ni Moises, pinatidac coma, ta isu nagsurat iti maipapan caniac.

⁴⁷ Ngem no dicay patien dagiti sursuratna, casanonto ti pammatiyo cadagiti saoc?