San Juan 4 - Ti Biblia (1973)

Ti babai a taga Samaria.

¹ Idi ngarud maamad ni Jesus a dagiti Fariseo nangngegda nga isu agararamid ken mangbabautizar ti adadu nga adalan ngem ni Juan

² (uray ni Jesus saan a nangbabautizar, no di ket dagiti adalanna,)

³ Pinanawanna ti Judea, ket napan manen idiay Galilea.

⁴ Ket masapul idi a lumabas idiay Samaria.

⁵ Iti casta napan iti maysa nga ili ti Samaria a managan Sicar, iti asideg ti daga nga inted ni Jacob ken Jose nga anacna:

⁶ Ket adda idiay idi ti bubon ni Jacob. Ni Jesus ngarud a nabannogan iti dalan iti casta nagtugaw iti ngarab ti bubon. Cas la horas idi a maicanem.

⁷ Umay ti maysa a babai a taga Samaria a sumacdu: ni Jesus cunana kencuana: Iccannac ti inumen.

⁸ Ta dagiti adalanna napanda iti ili a gumatang ti pagtaraon.

⁹ Daydi babai a taga Samaria, cunana ngarud kencuana: Casano a sica, idinto a Judioca, dumawatca caniac ti inumen, idinto a babaiac a taga Samaria? Ta awan ti panangicancano dagiti Judio cadagiti taga Samaria.

¹⁰ Simmungbat ni Jesus ket kinunana kencuana: No mailasinmo coma ti sagut ti Dios, ken no siasino ti agcuna kenca: Iccannac ti inumen, dimmawatca coma kencuana, ket iniccannaca coma ti danum a nabiag.

¹¹ Ti babai cunana kencuana: Apo, awan ti pagsacdum ket ti bubon nauneg, adino ngarud ti pangpaaddaam ti danum a nabiag?

¹² Dacdackelca aya ngem ni amatayo a Jacob, a nangted cadacayo ti bubon, isu nga ininumanna ken dagiti annacna ken dagiti animalna?

¹³ Simmungbat ni Jesus ket kinunana kencuana: Isu-amin nga uminum itoy a danum, mawawto manen:

¹⁴ Ngem siasinoman nga uminum iti danum nga itdecto kencuana, uray caano saanto a mawawen; no di ket ti danum nga itdecto kencuana agbalinto kencuana nga ubbog ti danum nga agburayoc a maipaay iti biag nga agnanayon.

¹⁵ Ti babai cunana kencuana: Apo, itedmo caniac daytoy a danum, tapno saanac a mawaw, ken tapno diac umayen ditoy a sumacdu.

¹⁶ Ni Jesus cunana kencuana: Inca, ayabam ni asawam, ket umayca ditoy.

¹⁷ Simmungbat ti babai ket kinunana: Awan asawac: Ni Jesus cunana kencuana: Naimbag ti panagcunam: Awan asawac:

¹⁸ Ta naaddaanca ti lima nga asawa: ket ti adda ita kenca, saanmo nga asawa: daytoy sinaom a sipupudno.

¹⁹ Ti babai cunana kencuana: Apo, makitac a sica mammadtoca.

²⁰ Dagiti ammami nagdaydayawda ditoy a bantay ket dacayo, cunayo nga idiay Jerusalem isu ti disso a masapul a pagdaydayawan dagiti tao.

²¹ Cuna kencuana ni Jesus: Patiennac, babai, nga umay ti haras nga uray ditoy a bantay, uray idiay Jerusalem, dicayto agdaydayaw ken Ama.

²² Agdaydayawcayo iti dicay ammo: agdaydayawcami iti ammomi, ta ti pannacaisalacan aggapu cadagiti Judio.

²³ Ngem ti horas umay, ket adda itan, a dagiti pudno nga agdaydayaw agdaydayawdanto iti Ama iti espiritu ken iti kinapudno; ta ni Ama sapulenna dagiti cacasta nga agdaydayaw kencuana.

²⁴ Ti Dios maysa nga Espiritu; ket dagiti agdaydayaw kencuana, masapul nga agdaydayawda iti espiritu ken kinapudno.

²⁵ Cuna kencuana ti babai: Ammoc a ti Mesias umay, isu a managan ti Cristo: Inton isu umay, ipalawagnanto cadatayo dagiti amin a banag.

²⁶ Cuna kencuana ni Jesus: Siac met laeng a makisasao kenca.

²⁷ Ket iti daydi dimteng dagiti adalanna, ket nagsiddaawda ta makisasao iti maysa a babai; ngem awan ti nagcuna; Ania ti sapulem? Wenno: Ania ti sasaoem kencuana?

²⁸ Iti casta daydi babai pinanawanna ti carambana ket napan iti ili, ket cunana cadagiti tao:

²⁹ Umaycayo; kitaenyo ti maysa a tao nga imbagana caniac ti amin nga inaramidco: Saan ngata nga isu ti Cristo?

³⁰ Rimmuarda iti ili ket immayda kencuana.

Ti catrigoan ken dagiti mangmangged.

³¹ Idi dagiti adalan kiniddawda, a cuncunada: Mannursuro, manganca.

³² Ngem kinunana cadacuada: Adda taraonco a dicay ammo.

³³ Dagiti adalan ngarud kinunada iti maysa ken maysa: Adda ngata nangyeg kencuana ti macan?

³⁴ Ni Jesus cunana cadacuada: Ti taraonco isu ti panangaramidco iti pagayatan ti nangibaon caniac, ken panangturpos ti aramidna.

³⁵ Dicay cuna aya nga adda pay uppat a bulan ket santo dumteng ti panagani? Adtoy, cunac cadacayo: Itannawagyo dagiti matayo ket matmatanyo dagiti taltalon, ta natangkenandan a maani.

³⁶ Ti agani umawat ti tangdan, ket agurnong ti bunga a maipaay iti biag nga agnanayon; tapno ti agmula ken ti agani aggiddanda nga agrag-o.

³⁷ Ta iti daytoy, pudno ti masasao: Maysa ti agmula, ket sabali ti agani.

³⁸ Siac imbaoncayo nga agani iti dicay tinalon: sabali dagiti nagtalon, ket dacayo simreccayo cadagiti tinalonda.

³⁹ Ket adu cadagiti taga Samaria iti daydi a ili, namatida kencuana agsipud iti sao ti babai a nangpanecnec a cunana: Imbagana caniac dagiti amin nga inaramidco.

⁴⁰ Gapuna nga idi immay dagiti taga Samaria kencuana, inuyutanda nga agbati cadacuada: ket nagbati sadiay iti dua nga aldaw.

⁴¹ Ket namati dagiti adadu pay agsipud iti saona;

⁴² Ket kinunada iti babai: Ita mamaticami, saan a gapu iti saom; ta dacami met laeng nangngegmi, ket ammomi a pudno a daytoy ti Manangisalacan ti lubong.

Pannacaagas ti anac ti maysa nga panguloen ti Corte.

⁴³ Ket idi napalabas ti dua nga aldaw, pimmanaw idiay a napan sadi Galilea.

⁴⁴ Ta ni Jesus met laeng pinanecnecanna a ti maysa a mammadto saan a mapadayawan idiay dagana.

⁴⁵ Gapuna nga idi dimteng idiay Galilea, dagiti taga Galilea inawatda, agsipud ta nakitada dagiti amin a banag nga inaramidna idiay Jerusalem idi fiesta; ta napanda met iti fiesta.

⁴⁶ Immay ngarud manen ni Jesus idiay Cana ti Galilea, isu a namagbalinanna ti danum nga arac. Ket adda ti maysa a tao ti ari, a ti anacna adda idi a masakit idiay Capernaum.

⁴⁷ Daytoy, idi nangngegna a ni Jesus immay idiay Galilea nanipud Judea, napan kencuana ket kinararaganna a sumalog coma, ket agasanna ti anacna, ta nganngani matay.

⁴⁸ Kinuna ngarud ni Jesus kencuana: No dicay coma macakita cadagiti pagilasinan ken datdatlag, pulos coma a dicayto mamati.

⁴⁹ Ti tao ti ari kinunana kencuana: Apo, sumalogca cadi, ita ta di pay matay ti anacco.

⁵⁰ Ni Jesus cunana kencuana: Agawidcan, ti anacmo agbiag. Ti tao pinatina ti sao nga imbaga kencuana ni Jesus ket nagawid.

⁵¹ Ket idi madama a sumalog, dagiti adipen simmabetda a nangipadamag kencuana: Ti anacmo a lalaki sibibiag.

⁵² Inintuudna ngarud cadacuada no ania nga horas idi nangrugi a pimmipia. Kinunada ngarud kencuana: Idi calman iti maicapito nga horas pinanawan ti gorigor.

⁵³ Ti ama naawatanna ngarud, a daydi nga horas isu ti pinagcuna ni Jesus kencuana: Ti anacmo agbiag: ket namati isu ken amin a cabbalayna.

⁵⁴ Daytoy manen ti maicadua a pagilasinan nga inaramid ni Jesus idi immay nanipud Judea idiay Galilea.