San Juan 3 - Ti Biblia (1973)

Ni Jesus makisao ken Nicodemo iti maipapan iti baro a pannacayanac.

¹ Ket adda idi maysa a tao cadagiti Fariseo a managan Nicodemo, panguloen dagiti Judio:

² Daytoy immay ken Jesus iti rabii, ket kinunana kencuana: Mannursuro, ammomi a maysaca a mannursuro a naggapu iti Dios; ta awan ti macabalin a mangaramid cadagitoy a pagilasinan nga aramiden, no awan ti Dios kencuana.

³ Simmungbat ni Jesus, ket kinunana kencuana: Pudno, pudno, cunac kenca, no ti maysa a tao saan a mayanac a mabaliwan, saanna a mabalin a kitaen ti pagarian ti Dios.

⁴ Cuna kencuana ni Nicodemo: Casano ti pannacabalin ti tao a mayanac idinto a lacayen? mabalinna aya ti sumrec manen iti aanacan ni inana, ken mayanac?

⁵ Simmungbat ni Jesus: Pudno, pudno, cunac kenca, no ti maysa saan a mayanac iti danum ken iti Espiritu, saanna a mabalin ti sumrec iti pagarian ti Dios.

⁶ Ti mayanac iti lasag, isu lasag; ket ti mayanac iti Espiritu, isu espiritu.

⁷ Dica pagsiddaawan a kinunac kenca; Masapul cadacayo ti mayanac a mabaliwan.

⁸ Ti angin agpuyupuy iti pagayatanna, ket mangngegmo ti awerna; ngem dica ammo no adino ti paggapuanna ken adino ti papananna: casta ti amin a mayanac iti Espiritu.

⁹ Simmungbat ni Nicodemo, ket kinunana kencuana; Casano ti pannacabalinna a maaramid dagitoy?

¹⁰ Simmungbat ni Jesus, ket kinunana kencuana: Sica ti mannursuro ti Israel, ket dica ammo dagitoy?

¹¹ Pudno, pudno, cunac kenca a ti ammomi saoenmi, ket ti nakitami, sacsianmi; ket dicay awaten ti pangpanecnecmi.

¹² No imbagac cadacayo dagiti banag a naidagaan, ket dicay patien, casanonto la ket ti pammatiyon no ibagac cadacayo dagiti nailangitan?

¹³ Ket awan ti immuli sadi langit, no di ti bimmaba nanipud langit, ti Anac ti tao.

¹⁴ Ket no casano iti panangibayog ni Moises iti uleg idiay let-ang, casta met a masapul a ti Anac ti tao maibayog;

¹⁵ Tapno amin a mamati kencuana maaddaan ti biag nga agnanayon.

¹⁶ Ta casta la unay ti panagayat ti Dios iti lubong; nga intedna ti Anacna a Bugbugtong, tapno amin a mamati kencuana, saan a mapucaw, no di ket adda biagna nga agnanayon.

¹⁷ Ta saan nga imbaon ti Dios ti Anacna iti lubong, a mangocom iti lubong; no di ket tapno ti lubong, maisalacan gapu kencuana.

¹⁸ Ti mamati kencuana, saan a maocom; ngem ti di mamati kencuana, naocomen, agsipud ta saan a namati iti nagan ti Bugbugtong nga Anac ti Dios.

¹⁹ Ket daytoy ti pacaocoman, ta ti silaw immay iti lubong, ket dagiti tao inayatda ti sipnget a nangnangrona ngem iti lawag; ta dakes idi dagiti aramidda.

²⁰ Ta amin nga agaramid ti dakes, guraenna ti lawag ket saan nga umay iti lawag, di la ket ta dagiti aramidna mababalaw.

²¹ Ngem ti agaramid iti pudno, umay iti lawag, tapno dagiti aramidna maiparangarang a naaramidda a mayannurot iti Dios.

Baro a pangpanecnec ni Juan a Bautista.

²² Idi nalpas dagitoy, immay ni Jesus ken dagiti adalanna iti daga ti Judea; ket idiay nakipaggian cadacuada, ket nangbautizar.

²³ Ket nangbabautizar met ni Juan idiay Enon, iti dinna ti Salim, ta adda idiay idi ti adu a danum: ket immayda idi ket nabautizaranda.

²⁴ Ta ni Juan saan pay idi a naipisoc iti pagbaludan.

²⁵ Nabangon ngarud ti maysa a suppiat idi cadagiti adalan ni Juan ken ti maysa a Judio a maipapan iti panaggugor.

²⁶ Ket immayda ken Juan ket kinunada kencuana: Mannursuro, daydi adda idi a naicuyog kenca idiay labes ti Jordan, isu a pinanecnecam, adtoy nga isu mamautizar ket amin a tattao umayda kencuana.

²⁷ Simmungbat ni Juan ket kinunana: Ti maysa a tao saanna a mabalin ti umawat ti uray ania no saan a naited kencuana nanipud langit.

²⁸ Dacayo met laeng masacsiandac a kinunac: Saan a siac ti Cristo, no di ket naibaonac iti casangoananna.

²⁹ Ti makinasawa iti novia, isu ti novio; ngem ti gayyem ti novio nga umimimatang ket mangngegna, agragrag-o unay gapu ti timec ti novio: Ngarud daytoy rag-oc nagdanunan.

³⁰ Isu masapul a dumackel, ngem siac masapul a bumassitac.

³¹ Ti umay manipud ngato, nangatngato ngem cadagiti isu-amin: ti taga daga, isu naindagaan; ket banbanag a naidagaan dagiti saoenna: ti umay manipud langit, nangatngato ngem cadagiti isu-amin.

³² Ti nakitana ken nangngegna, isu ti sacsianna; ket awan ti umawat ti pangpanecnecna.

³³ Ti umawat ti pangpanecnecna, pinanecnecanna a ti Dios pudno.

³⁴ Ta ti imbaon ti Dios, saoenna dagiti sao ti Dios; ta ti Dios saanna a rucrucoden ti Espiritu nga itdenna.

³⁵ Ti Ama ayatenna ti Anac, ket amin dagiti banag impaimanan kencuana.

³⁶ Ti mamati iti Anac, adda biagna nga agnanayon; ngem ti saan nga agtulnog iti Anac, saannanto a makita ti biag, no di ket ti pungtot ti Dios agtaeng kencuana.