San Juan 21 - Ti Biblia (1973)

Ti panagparang ni Jesus iti igid ti baybay ti Tiberias.

¹ Idi nalabes dagitoy, nagparang manen ni Jesus cadagiti adalanna iti igid ti baybay ti Tiberias: ket castoy ti pinagparangna.

² Addada idi a nagtitipon da Simon Pedro ken ni Tomas, a managan ti Didimo, ken ni Natanael a taga Cana ti Galilea, ken dagiti annac ni Zebedeo ken dua a sabali cadagiti adalanna.

³ Cuna ni Simon Pedro cadacuada. Innac agdaclis. Cunada kencuana: Umaycami met sumurot kenca. Napanda ket limmuganda iti barangay, ket daydi a rabii awan ti naalada.

⁴ Ngem idi bumigaten, ni Jesus nagtacder iti iigid: ngem dagiti adalan saanda a nailasin nga ni Jesus.

⁵ Ni Jesus ngarud cunana cadacuada; Annacco, adda cadacayo ti aniaman a macan? simmungbatda kencuana: Awan.

⁶ Ket cunana cadacuada: Iwayatyo ti iket iti bacrang a macanawan ti barangay ket macaalacayto. Inwayatda ngarud, ket saanda a mabalinen idi nga guyuden a maipoon iti caadu dagiti ican.

⁷ Daydi adalan ngarud a dinungdungngo ni Jesus cunana ken Pedro: Isu ti Apo. Ni Simon Pedro, idi mangngegna nga isu ti Apo, imbarikesna ti pagan-anayna, (ta adda idi a lamolamo), ket timmapuac iti baybay.

⁸ Ngem dagiti dadduma nga adalan immayda iti bilog (ta saan nga adayu iti daga, no di agdua gasut a casico) a guyguyudenda ti iket a napno iti ic-ican.

⁹ Idi simmang-atda ngarud iti daga, makitada a naisagana dagiti dumardarang a beggang ken maysa nga ican a naiparabaw, ken tinapay.

¹⁰ Cuna ni Jesus cadacuada: Mangyegcayo cadagiti ican a naalayo ita.

¹¹ Limmugan ngarud ni Simon Pedro, ket ginuyodna iti daga di iket, a napno cadagiti dadackel nga ic-ican, sangagasut lima pulo ket tallo: ket uray aduda, di iket saan a nabsang.

¹² Cuna cadacuada ni Jesus: Umaycayo, mamigatcayo. Ket awan cadagiti adalan ti macaitured idi a mangintuud kencuana: Siasinoca? idinto nga ammoda nga isu ti Apo.

¹³ Umay ni Jesus, ket idi innalana ti tinapay iniccanna ida: ken casta met idi ican.

¹⁴ Daytoyen ti maicatlo a panagparang ni Jesus cadagiti adalanna, idi nalpas a nagungar cadagiti natay.

¹⁵ Idi ngarud nacapamigatda, ni Jesus cunana ken Simon Pedro: Simon, anac ni Juan, adadda ti panagayatmo caniac ngem dagitoy? Cunana kencuana: Wen, Apo: sica ammom nga ayatenca. Cunana kencuana: Pacanem dagiti corderoc.

¹⁶ Cunana kencuana iti maicadua: Simon, nga anac ni Juan, ayatennac? Simmungbat kencuana: Wen, Apo, sica ammom nga ayatenca Cunana kencuana; Ipaarabmo dagiti carneroc.

¹⁷ Cunana kencuana iti maicatlo: Simon, anac ni Juan, ayatennac? Nagladingit ni Pedro gapu ta kinunana kencuana a namitlo: Ayatennac? ket kinunana kencuana: Apo, sica ammon dagiti isu-amin: sica ammom nga ayatenca. Cuna kencuana ni Jesus: Pacanem dagiti carneroc.

¹⁸ Pudno, pudno, cunac kenca, idi ubingca agbarikesca ket magmagnaca idi iti cayatmo; ngem inton lacaycan, unnatemto dagiti imimam ket baricsannacanto ti sabali, ket ipannacanto iti dica cayat.

¹⁹ Ket kinunana daytoy nga impaawatna no anianto nga ipapatay ti pangidaydayawnanto iti Dios. Ket idi naisaona daytoy, cunana kencuana: Surutennac.

²⁰ Idi a timmaliw ni Pedro, makitana a sumursurot daydi adalan a dinungdungngo ni Jesus, daydi nagsadag met iti barucongna idi pinangrabii ken nagcuna iti Apo, asino ti mangyawatto kenca?

²¹ Idi a makita ngarud ni Pedro daytoy, cunana ken Jesus: Apo, ket daytoy ngay?

²² Cuna kencuana ni Jesus: No cayatco nga agbati nga agingga iti umayac, ania dayta kenca? Surutennac.

²³ Nagwara ngarud daytoy a sao cadagiti agcacabsat, a daydi nga adalan saanto a matay. Ngem ni Jesus saanna a sinao kencuana a saanto a matay, no di ket: No cayatco nga agbati nga agingga iti umayac, ania dayta kenca?

²⁴ Daytoy isu daydi adalan a mangpanecnec cadagitoy; ket insuratna dagitoy: ket ammomi a ti pangpanecnecna pudno.

²⁵ Ket adda pay adu a sabsabali nga inaramid ni Jesus, a no maisuratda coma a masaggaysa, pagarupec nga uray daytoy lubong saanna a malaon dagiti libro a pacaisuratanda coma.