San Juan 20 - Ti Biblia (1973)

Ti panagungarna.

¹ Ket iti umuna nga aldaw ti lawas ni Maria Magdalena napan a nasapa iti tanem idi nasipnget pay laeng; ket makitana ti bato a naligsayen idi tanem.

² Ngarud nagtartaray a napan ken Simon Pedro, ken iti daydi sabali nga adalan, a dinungdungngo idi ni Jesus, ket kinunana cadacuada: Iniccatda ti Apo idiay tanem, ket dicam ammo no adino ti nangicabilanda kencuana.

³ Rimmuar ngarud ni Pedro, ken ti sabali nga adalan, ket napanda idi tanem.

⁴ Ket tumartarayda idi a dua a nagcuyog; ngem ti sabali nga adalan inunaanna ni Pedro iti pinagtaray, ket dimteng nga immuna iti tanem:

⁵ Ket idi a nagrucob, nakitana dagidi lupot a naicabil; ngem saan a simrec iti uneg.

⁶ Dimteng met ngarud ni Simon Pedro a simmaruno kencuana ket simrec idi tanem, ket mamatmatanna dagiti lupot a naicabil.

⁷ Ket daydi lupot a naiparabaw iti rupana, saan a naitipon cadagiti sabali a lupot, no di ket nalucot a nailasin iti maysa a disso.

⁸ Idin simrec met ti sabali nga adalan daydi simmangpet nga immununa idi tanem; ket nakitana ket namati.

⁹ Agsipud ta dida pay naawatan idi ti Surat, a masapul nga isu agungarto cadagiti natay.

¹⁰ Gapuna a dagiti adalan nagsublida manen cadagiti balbalayda.

Ni Jesus agparang ken Maria Magdalena.

¹¹ Ngem ni Maria agtatacder nga agsangsangit idi iti ruar iti asideg ti tanem: ket idi adda nga agsangsangit, nagrucob a kimmita iti tanem;

¹² Ket mamatmatanna ti dua nga angel a nagtagipuraw nga agtutugaw, ti maysa iti oloan, ket ti sabali iti sacaanan, iti nacaicabilan di bagi ni Jesus.

¹³ Ket cunada kencuana: Babai, apayapay agsangitca? Cunana cadacuada: Agsipud ta iniccatda ditoy ti Apoc, ket diac ammo no adino ti nangicabilanda kencuana.

¹⁴ Idi naisaona dagitoy, timmaliaw iti licudan, ket mamatmatanna ni Jesus nga agtatacder idi, ngem dina impagarup nga ni Jesus.

¹⁵ Cuna kencuana ni Jesus: Babai, apayapay agsangitca? asino ti sapulem? Isu, idi ipappapanna nga isu ti managaywan iti minuyungan, cunana kencuana: Apo, no sica ti nangiccat ditoy ibagam caniac no adino ti nangicabilam kencuana, ket ipanawconto ditoy.

¹⁶ Cuna kencuana ni Jesus: Maria! Di babai simmango, ket cunana kencuana iti Hebreo: Rabboni! a cayatna a saoen, Mannursuro.

¹⁷ Cuna kencuana ni Jesus: Dinac sagiden, ta saanac pay nga immuli ken Amac: ngem inca cadagiti cacabsatco, ket cunam cadacuada: Umuliac ken Amac, ken Amayo, ken iti Diosco ken Diosyo.

¹⁸ Napan ni Maria Magdalena nga ipacaammona cadagiti adalan: Nakitac ti Apo; ket dagitoy ti imbagana caniac.

Ni Jesus agparang cadagiti sangapulo ket maysa. Saan a panamati ni Tomas.

¹⁹ Ket idi malemen iti daydi nga aldaw, ti umuna nga aldaw ti lawas, ken idi adda a sipupunit dagiti ruangan, iti daydi nacatiptiponan dagiti adalan gapu iti butengda cadagiti Judio, immay ni Jesus ket nagtacder iti tengnga ket cunana cadacuada: Talna coma cadacayo.

²⁰ Ket idi nasaona daytoy, impakitana cadacuada dagiti imimana ken ti bacrangna. Ket dagiti adalan nagrag-oda idi makitada ti Apo.

²¹ Ni Jesus ngarud kinunana manen cadacuada: Talna coma cadacayo: cas iti pinangibaon caniac ni Ama, casta met ti panangibaonco cadacayo.

²² Ket idi nasaona daytoy, sinang-awanna ida ket cunana cadacuada: Awatenyo ti Espiritu Santo;

²³ Cadagiti pamacawananyo cadagiti basbasol, mapacawan cadacuada; cadagiti pangigawidanyo, maigawidda.

²⁴ Ngem ni Tomas a managan Didimo, maysa cadagiti sangapulo ket dua, awan cadacuada idi immay ni Jesus.

²⁵ Kinunada kencuana ngarud dagiti sabsabali nga adalan: Nakitami ti Apo: Ngem isu kinunana cadacuada: No diac makita cadagiti imimana ti gapuanan dagiti lansa, ken iserrecco toy ramayco iti naggapuan dagiti lansa, ken iserreconto ti imac iti bacrangna, diacto mamati.

²⁶ Ket idi nalabes ti walo nga aldaw, addada manen dagiti adalanna iti uneg ket adda met cadacuada ni Tomas: Immay ni Jesus; idi a sipupunit dagiti ruangan, ket nagtacder iti tengnga, ket kinunana: Talna coma cadacayo.

²⁷ Sana cuna ken Tomas: Igawatmo ta ramaymo ditoy, ket kitaem dagiti imimac; ket iyegmo ditoy ta imam, ket iserrecmo iti bacrangco: ket saanca a di mammati, no di ket mammatica.

²⁸ Simmungbat ni Tomas, ket kinunana kencuana: Apoc ken Diosco.

²⁹ Cuna kencuana ni Jesus: Gapu ta nakitanac, Tomas, namatica: nagasat dagiti saan a nacakita ket namatida.

³⁰ Ket adu dagiti sabsabali a pagilasinan nga inaramid ni Jesus iti sangoanan dagiti adalan, a saan a naisurat itoy a libro:

³¹ Ngem dagitoy addada a naisurat, tapno patienyo a ni Jesus isu ti Cristo, ti Anac ti Dios; ken tapno gapu iti pammatiyo maaddaancayo ti biag iti naganna.