San Juan 2 - Ti Biblia (1973)

Ti boda idiay Cana, immuna a milagro, ti danum a nagbalin nga arac.

¹ Ket iti maicatlo nga aldaw naaramid ti maysa a panagpaboda idiay Cana ti Galilea; ket adda idiay idi ti ina ni Jesus.

² Ket naawis met ni Jesus ken dagiti adalanna idi pagbodaan.

³ Ket idi agcurang ti arac, ti ina ni Jesus kinunana kencuana: Awan ti aracda.

⁴ Ket cuna ni Jesus kencuana: Ania ti pacaibiangac kenca, babai? ti horasco di pay dimteng.

⁵ Ni inana cunana cadagiti tumultulong: Aniaman nga ibagana cadacayo, aramidenyo.

⁶ Ket naicabil idiay idi, cas iti ugali a panaggugor dagiti Judio, ti innem a burnay nga aglaon ti dua wenno tal-lo a caramba ti danum ti tunggal maysa.

⁷ Cuna cadacuada ni Jesus: Punnoenyo dagiti burnay iti danum. Ket pinunnoda ida nga agingga iti ngarab.

⁸ Ket cunana cadacuada: Tacoenyon ket ipanyo iti panguloen ti rambac. Ket impanda.

⁹ Ket idi rinamanan ti panguloen ti rambac daydi danum a nagbalinen nga arac, dina ammo no adino ti naggapuanna (ngem ammo dagiti tumultulong a nangala idi danum), ti pangulo ti rambac ayabanna ti novio,

¹⁰ Ket cunana kencuana: Tunggal tao unaenna ti nasayaat nga arac, ket inton macainumda ti adun sa isango ti dacdakes: sica indulinmo ti nasayaat nga arac agingga ita.

¹¹ Daytoy a pangrugian dagiti datdatlag a inaramid ni Jesus idiay Cana ti Galilea, ket impakitana ti dayagna; ket dagiti adalanna namatida kencuana.

¹² Calpasan daytoy, simmalog idiay Capernaum, isu ken ni inana ken dagiti cacabsatna ken adalanna ket naggianda idiay iti saan nga adu nga aldaw.

Ni Jesus gugoranna ti Templo.

¹³ Ket asidegen idi ti pascua dagiti Judio; ket simmang-at ni Jesus idiay Jerusalem.

¹⁴ Ket nasaracanna ti Templo dagiti aglaclaco ti vacvaca ken carcarnero, ken calcalapati, ken dagiti agsucsucat ti pirac nga agtutugaw:

¹⁵ Ket nangaramid ti pagbaot a taltali, ket pinaruarna ida amin iti Templo, ken dagiti carcarnero ken vacvaca; ket impuruacna dagiti pirac dagiti agsucsucat ti pirac, ket tinuangna dagiti lamlamisaanda;

¹⁶ Ket cadagiti agtagtagilaco ti calcalapati, kinunana: Iccatenyo ditoy dagitoy, dicay aramiden ti balay ni Amac a balay a pagtagtagilacoan.

¹⁷ Idin nalagip dagiti adalanna nga adda a naisurat: Ti ganetget ti balaymo alun-unennacto.

¹⁸ Dagiti Judio ngarud simmungbatda ket kinunada kencuana; Ania ti pagilasinan nga ipakitam cadacami, idinto nga aramiden dagitoy?

¹⁹ Simmungbat ni Jesus ket kinunana cadacuada: Rebbaenyo daytoy Templo, ket iti uneg ti tal-lo nga aldaw, bangonecto.

²⁰ Kinuna ngarud dagiti Judio: Uppat a pulo ket innem a taoen ti pannacabangon daytoy a Templo, ket sica bangonemto iti tal-lo nga aldaw?

²¹ Ngem isu nagsao idi iti maipapan ti Templo ti bagina.

²² Idi ngarud nagungar cadagiti natay, dagiti adalanna nalagipda a sinaona daytoy: ket namatida cadagiti Sursurat ken ti sao nga insao ni Jesus.

²³ Ket bayat ti caaddana idiay Jerusalem iti rambac ti pascua adu dagiti namati iti naganna, idi kitkitaenda dagiti pagilasinan nga araramidenna.

²⁴ Ngem ni met laeng Jesus saan a nagtalec cadacuada, ta amammona amin a tattao.

²⁵ Ken gapu ta awan ti pacasapulanna nga adda mangpanecnec kencuana iti maipapan iti tao; ta isu met laeng ammona ti adda idi iti tao.