San Juan 18 - Ti Biblia (1973)

Pannacatiliw ni Jesus idiay Getsemani.

¹ Idi naisao ni Jesus dagitoy napan agraman dagiti adalanna iti labes ti waig a Cedron, nga yan ti maysa a minuyungan, a sinercanna, isu ken dagiti adalanna.

² Ket ni Judas, a mangyawat kencuana idi, ammona met daydi a disso: ta naminadu a ni Jesus nakium-ummong idiay cadagiti adalanna.

³ Ni Judas ngarud, idi a naawatna ti compania ti solsoldado ken dagiti oficial iti biang dagiti cangatoan a papadi ken dagiti Fariseo, napan idiay a nangicuyog ti farfarol ken silsilaw, ken ig-igam.

⁴ Ni Jesus idinto nga ammoma amin dagiti mapasamacnanto, rimmuar ket cunana cadacuada: Asino ti sapulenyo?

⁵ Simmungbatda kencuana: ni Jesus a Nazareno. Cuna cadacuada ni Jesus: Siac. Ket sitatacder met a naicuyog cadacuada ni Judas, a nangliput kencuana.

⁶ Idi ngarud nasaona cadacuada: Siac; nagsanudda ket napasagda iti daga.

⁷ Inintuudna manen ngarud cadacuada: Siasino ti birukenyo? Ket kinunada: Ni Jesus a Nazareno.

⁸ Simmungbat ni Jesus: Kinunac cadacayo a siac: no siac ngarud ti sapulenyo, baybayanyo a pumanaw dagitoy:

⁹ Tapno matungpal idi ti sao nga insaona. Cadagiti intedmo caniac, awan cadacuada ti pinucawco.

¹⁰ Ni Simon Pedro ngarud ta adda campilanna, inasutna, ket sinugatna daydi adipen ti cangatoan a padi ket piningasna ti macanawan a lapayagna. Ket Malco ti nagan daydi adipen.

¹¹ Ni Jesus kinunana ngarud ken Pedro: Isublim ta campilanmo iti bainana: ti copa nga inted ni Ama caniac, diac aya rebbeng nga inuman?

Ni Jesus iti sangoanan ti Sanedrin (wenno cangatoan a pangacoman dagiti Judio).—Ni Pedro isu ilibacna.

¹² Iti casta, ti compania ken ti coronel ken dagiti policia dagiti Judio, tiniliwda ni Jesus ket pinarautanda.

¹³ Ket impanda nga immuna ken Anas ta catugangan a lalaki ni Caifas, cangatoan a padi idi a taoen.

¹⁴ Ket ni Caifas isu idi ti nangbalacad cadagiti Judio, a maipaay idi a matay ti maysa a tao gapu cadagiti umili.

¹⁵ Ket ni Simon Pedro, ken ti sabali nga adalan simmursurotda ken Jesus: ket daydi nga adalan am-ammo ti cangatoan a padi, ket simrec a kimmuyog ken Jesus iti paraangan ti cangatoan a padi:

¹⁶ Ngem ni Pedro sitatacder idi iti ruar ti ruangan: rimmuar ngarud daydi sabali nga adalan nga amammo ti cangatoan a padi ket kinasaona daydi babai a nagaywan ti ruangan, ket inserrecna ni Pedro,

¹⁷ Daydi adipen a babai ngarud a nagaywan ti ruangan, cunana ken Pedro: Saan a sica met ti maysa cadagiti adalan daytay a tao? Cunana: Saan a siac.

¹⁸ Ket agtatacder idi dagiti adipen ken policia a nangaramid ti paginudoan a beggang, ta nalam-ec idi ket agininudoda: Ket ni met Pedro adda cadacuada nga agtatacder ken makiininudo.

¹⁹ Ti cangatoan a padi ngarud inintuudna ken Jesus ti maipapan cadagiti adalanna ken ti maipapan iti isursurona.

²⁰ Ni Jesus simmungbat kencuana: Siac nagsaoac iti napanayag iti lubong: siac agnanayon a nangisursuroac idiay sinagoga ken idiay Templo, isu a paguurnongan amin dagiti Judio: ket awan ti sinaoc iti nalemmeng.

²¹ Apayapay siac ti pagintuudam? Intuudem cadagiti nagdengngeg no ania ti insaoc cadacuada: adtoy, dagitoy ammoda ti sinaoc.

²² Ket idi naisaona dagitoy, maysa cadagidi oficial nga agtatacder iti asideg, tinungpana ni Jesus, a kinunana; Casta ti isusungbatmo iti cangatoan a padi?

²³ Ni Jesus simmungbat kencuana: No dakes ti pinagsaoc, panecnecam ti kinadakesna; ngem no naimbag, apayapay dunorennac?

²⁴ Ni Anas ngarud imbaonna a sirereppet ken Caifas a cangatoan a padi.

²⁵ Ket adda idi ni Simon Pedro a sitatacder ken agininudo. Kinunada ngarud kencuana: Sica met saanca aya a maysa cadagiti adalanna? Inlibacna ket kinunana: Saan a Siac.

²⁶ Maysa cadagiti adipen ti cangatoan a padi, cabagian daydi piningasan ni Pedro; kinunana kencuana: Siac, saanca aya a nakita idiay minuyungan a nakicuyog kencuana?

²⁷ Ni Pedro ngarud naglibac manen: ket naigiddato a nagtaraoc ti cawitan.

Ni Jesus iti sangoanan ni Pilato.

²⁸ Impanda ngarud ni Jesus nanipud ken Caifas, idiay Pretorio: ket agsapa idi: ket saanda a simrec idiay Pretorio, tapno dida matulawan tapno mabalinda coma a canen ti pascua.

²⁹ Rimmuar ngarud ni Pilato cadacuada, ket kinunana: Ania ti pangipulongan a yegyo a macapadakes itoy tao?

³⁰ Simmungbatda ket kinunada kencuana: No daytoy a tao saan coma a managdacdakes saanmi coma nga inyawat kenca.

³¹ Kinuna ngarud cadacuada ni Pilato: Isu alaenyo ket ocomenyo cas iti lintegyo. Kinuna kencuana dagiti Judio: Saan a maipalubos cadacami ti mamapatay iti uray siasino a tao:

³² Tapno matungpal coma ti sao ni Jesus nga insaona idi impacdaarna no ania nga ipapatay ti ipapataynanto.

³³ Ni Pilato ngarud simrec manen idi Pretorio, ket inayabanna ni Jesus, ket kinunana kencuana; Sica ti Ari dagiti Judio?

³⁴ Ni Jesus simmungbat: Cunam a sicsica dayta? Wenno dagiti sabsabali imbagada kenca a maipapan caniac?

³⁵ Ni Pilato simmungbat; Maysaac aya a Judio? Ti nacionmo met laeng ken dagiti cangatoan a padi inyawatdaca caniac: ania aya ti inaramidmo?

³⁶ Simmungbat ni Jesus: Ti pagariac saan a ditoy a lubong: ta no ditoy a lubong coma ti pagariac, dagiti adipenco makibacalda coma tapno saanac a maiyawat coma cadagiti Judio; ngem ita, ti pagariac saan a ditoy.

³⁷ Kinuna ngarud ni Pilato kencuana: No casta ngarud, arica? Simmungbat ni Jesus; Cunam nga ariac, Nayanacac gapu itoy, ken gapu itoy immayac ditoy lubong, tapno panecnecac ti pudno, Isu-amin nga aggapu iti pudno, denggenna ti timecco.

³⁸ Cuna kencuana ni Pilato: Ania ti pudno? Ket idi naisaona daytoy, rimmuar manen cadagidi Judio ket cunana cadacuada: Awan ti babac a masaracac kencuana.

³⁹ Ngem adda cadawyanyo a maysa ti ibbatac cadacayo iti pascua; cayatyo ngarud nga ibbatac cadacayo ti Ari dagiti Judio?

⁴⁰ Nagariwawada ngarud manen, a kinunada: Saan a daytoy, no di ni Barrabas. Ket ni Barrabas maysa idi a tulisan.