San Juan 17 - Ti Biblia (1973)

Cararag ni Jesus gapu cadagiti adalanna.

¹ Ni Jesus sinaona dagitoy, ket idi intangadna dagiti matana sadi langit, kinunana: Ama, ti horas dimtengen; padayawam ti Anacmo, tapno ti Anacmo padayawannaca coma:

² Cas iti pannangtedmo kencuana ti pannacabalin iti amin a lasag, tapno dagiti amin nga intedmo kencuana iccana coma ida ti biag nga agnanayon.

³ Ket daytoy ti biag nga agnanayon: a maammoandaca coma a maymaysa a pudno a Dios, ken ni Jesu-Cristo nga imbaonmo.

⁴ Siac indaydayawca ditoy daga: naturposco ti aramid nga intedmo nga aramidec.

⁵ Ket ita, Ama, padayawannac kenca met laeng iti dayag nga adda caniac idi, iti dinnam, idi awan pay ti lubong.

⁶ Impalawagco ti naganmo cadagiti tao nga intedmo caniac, itoy lubong: cucuam ida idi ket intedmo ida caniac, ket sinalimetmetanda ti saom.

⁷ Ita ammodan nga amin dagiti intedmo caniac, naggapuda kenca:

⁸ Ta dagiti sao nga intedmo caniac, intedco cadacuada; ket inawatda, ket naammoanda a pudno a naggapuac kenca ket pinatida a sica imbaonnac.

⁹ Idawatac ida: diac idawatan ti lubong, no di ket dagiti intedmo caniac, ta cucuam ida.

¹⁰ Ket isu-amin dagiti cucuac cucuam ida, ket dagiti cucuam, cucuac: ket maidaydayawac cadacuada.

¹¹ Ket awanacon iti lubong; ket dagitoy addada iti lubong, ket umayac kenca. Ama a Nasantoan! aywanam iti naganmo dagiti intedmo caniac, tapno agmaymaysada, a cas cadata.

¹² Bayat ti caaddac idi cadacuada, inaywanac ida iti naganmo, dagiti intedmo caniac, ingagac ida ket awan cadacuada ti napucaw, no di ket daydi anac ti pacadadaelan; tapno ti Surat matungpal.

¹³ Ngem ita umayac kenca: ket saoec dagitoy ditoy lubong tapno adda cadacuada met laeng ti rag-oc a naananay.

¹⁴ Intedco cadacuada ti saom; ket ti lubong ginurana ida, ta saanda a taga lubong, a cas caniac a saanac a taga lubong.

¹⁵ Diac dawaten nga iccatem ida ditoy lubong, no di ket igagam coma ida iti dakes.

¹⁶ Saanda a taga lubong, a cas caniac a saanac a taga lubong.

¹⁷ Pagsantoem ida iti kinapudno: ti saom isu ti pudno.

¹⁸ Cas imbaonnac ditoy lubong, imbaonco met ida itoy lubong.

¹⁹ Ket gapu cadacuada pagsantoec ti bagic, tapno mapagsantoda coma met iti kinapudno.

²⁰ Ket saan laeng a dagitoy ti idawdawatac, no di ket dagiti pay mamati caniac gapu iti saoda:

²¹ Tapno isuda amin agmaymaysada coma: a cas met sica, Ama, caniac, ket siac kenca, tapno addada met coma cadata; tapno ti lubong patienna coma a sica imbaonnac.

²² Ket ti dayag nga intedmo caniac, intedco cadacuada; tapno agmaymaysada coma; a cas met coma cadata nga agmaymaysa;

²³ Siac cadacuada, ket sica caniac, tapno agmaymaysada nga awan pagcuranganna coma; ket ti lubong maammoanna coma a sica imbaonnac, ket inayatmo ida a cas met iti panangayatmo caniac.

²⁴ Ama, ti intedmo caniac cayatco a no adino ti yanco, addada met coma a maicuyog caniac; tapno makitada ti dayagco nga intedmo caniac: ta inayatnacon idi saan pay a nabangon ti lubong.

²⁵ O Ama a nalinteg, ti lubong, saannaca a naammoan, ngem siac naammoanca, ket dagitoy naammoanda a sica imbaonnac;

²⁶ Ket impacaammoc cadacuada ti naganmo ket ipacaammocto; tapno ti ayat a panangayatmo caniac, adda coma cadacuada, ken siac cadacuada.