San Juan 16 - Ti Biblia (1973)

Dagiti naud-udi a bilbilinna cadagiti adalan (panungpalan): ni Jesus baliwanna manen ti mangicari iti Manangliuliwa ken ti iyaayna met laeng.

¹ Dagitoy sinaoc cadacayo, tapno dicay coma maitibcol.

² Paruarendacayto cadagiti sinagoga: Ngem umay pay ti horas a siasinoman a mamapatayto cadacayo, panunutennanto a mangidaton ti pagservina iti Dios.

³ Ket dagitoy aramidendanto, ta dida amammo ni Ama uray siac.

⁴ Ngem sinaoc cadacayo dagitoy, tapno inton umay ti horasda, malagipyo ida, nga insaoc cadacayo. Ngem dagitoy saanco nga insao cadacayo idi damo, ta addaac pay idi cadacayo.

⁵ Ngem ita innacon iti nangibaon caniac, ket awan cadacayo ti mangintuud caniac: Adino ti papanam?

⁶ Ngem, agsipud ta sinaoc cadacayo dagitoy, ti ladingit pinunnona ti pusoyo.

⁷ Nupay casta ibagac cadacayo ti pudno: Maipaay cadacayo a mapanac: ta no diac mapan, ti Manangliuliwa dinto umay cadacayo; ngem no mapanac, ibaonconto cadacayo.

⁸ Ket isu, inton umay, babalawennanto ti lubong ti maipapan iti basol, ken ti kinalinteg ken ti panangocom:

⁹ Ti maipapan iti basol, gapu ta dida namati caniac;

¹⁰ Ti maipapan iti kinalinteg, ta innac ken Ama ket dacayo didacto makitan;

¹¹ Ken ti maipapan iti panangocom, gapu ta ti principe daytoy a lubong naocomen.

¹² Adda pay adu nga ibagac cadacayo, ngem dicay mabalin nga awiten ita.

¹³ Ngem inton umay daydiay, ti Espiritu ti kinapudno, idalannacayto iti amin a kinapudno: ta saanto nga agsao nga isisu, no di ket saoennanto ti aniaman a mangngegnanto, ket ipacaammonanto cadacayo dagiti banbanag a mapasamacto.

¹⁴ Isu idaydayawnacto, ta mangalanto iti cucuac, ket ipacaammonanto cadacayo.

¹⁵ Isu-amin dagiti adda ken Ama, cucuac ida gapuna kinunac a mangalanto iti cucuac, ket ipacaammonanto cadacayo.

¹⁶ Iti apagbassit pay, ket didac makitan: ken iti apagbassit manen, ket makitadacto.

¹⁷ Ngarud dadduma cadagiti adalanna nagsasaoda iti maysa ken maysa: Ania daytoy a cunana cadatayo; Iti apagbassit pay, ket didac makitan: ken iti apagbassit manen, ket makitadacto; ken daytoy: Gapu ta mapanac ken Ama?

¹⁸ Kinunada ngarud: Ania daytoy a cunana: Apagbassit? Saanmi a maawat ti saoenna.

¹⁹ Ket ni Jesus naawatanna nga cayatda idi a pagintuudan, ket kinunana cadacuada: Agiinnintuudcayo iti maipapan itoy sinaoc: Iti apagbassit pay, ket didac makitan, ken iti apagbassit manen, ket makitadacto?

²⁰ Pudno, pudno, cunac cadacayo nga agsangitcayto ket agsainneccayto; ngem ti lubong agragsacto: Naladingitcayto, ngem ti ladingityo agbalinto a rag-o.

²¹ Ti babai, no aganac, adda ladingitna, ta dimteng ti horasna; ngem inton naipasngayna ti ubing, saanna a malagipen ti rigat, gapu iti rag-o, ta nayanac ti maysa a tao itoy lubong.

²² Ket dacay ngarud ita adda ladingityo: ngem makitacayto manen ket agragsacto ti pusoyo, ket awanto ti macaiccat cadacayo ti ragsacyo.

²³ Ket iti dayta nga aldaw awanto ti intuudenyo caniac. Pudno, pudno, cunac cadacayo: Nga amin a dawatenyonto ken Ama iti naganco itdennanto cadacayo,

²⁴ Agingga ita awan pay ti dinawatyo iti naganco: dumawatcayo ket umawatcayo, tapno maananay ti ragsacyo.

²⁵ Dagitoy insaoc idi cadacayo cadagiti pangngarig: umay ti horas a diacto agsaon cadacayo cadagiti pangngarig; no di ket ipacaammocto a silalawag cadacayo ti maipapan ken Ama.

²⁶ Iti dayta nga aldaw dumawatcayto iti naganco; ket diac cuna cadacayo nga icacaasicayto ken Ama:

²⁷ Ta ni met laeng Ama ayatennacayo, gapu ta dacayo inayatdac ket pinatiyo a naggapuac iti Dios.

²⁸ Naggapuac ken Ama, ket immayac ditoy lubong: panawac manen ti lubong, ket mapanac ken Ama.

²⁹ Dagiti adalanna cunada kencuana: Adtoy, ita agsaoca a silalawag, ket awan ti pangngarig a saoem.

³⁰ Ita maawatanmi nga ammom dagiti isu-amin, ket di masapul ti siasinoman ti agintuud kenca: daytoy ti pamatianmi a naggapuca iti Dios.

³¹ Ni Jesus simmungbat cadacuada: Mamaticay ita?

³² Adtoy, umay ti horas, ket dimtengen a maiwarawaracayto ket tunggal maysa mapanto iti dissona, ket baybayandacto a maymaysa: ngem saanac nga agmaymaysa, ta ni Ama adda caniac.

³³ Dagitoy insaoc idi cadacayo, tapno adda coma talnayo caniac: ditoy lubong addanto rigatyo: ngem manginanamacayo, siac pinarmecco ti lubong.