San Juan 15 - Ti Biblia (1973)

Dagiti camaudianan a bilbilinna cadagiti adalan (canayon): Panagcaycaysa a nauneg da Jesus ken dagiti insalacanna.

¹ Siac ti pudno a poon ti uvas, ket ni Amac ti agtaltalon.

² Isu-amin a santacco a di agbunga iccatennanto: ket amin dagiti sanga nga agbunga isu ti dalusanna, tapno mangted coma ti adadu a bunga.

³ Dacayo nadaluscayon gapu iti sao nga isaoc cadacayo.

⁴ Agiancay caniac, ket siac cadacayo. Cas ti santac saanna a mabalin ti agbunga nga isisu, no di maicamang iti uvas, casta met a dicay mabalin, no saancayo nga agtaeng caniac.

⁵ Siac ti uvas, dacayo dagiti santac: ti agnaed caniac ket siac kencuana, daytoy ti agbunga ti adu: ta no awanac, awan ti mabalinyo nga aramiden.

⁶ No adda saan nga agnaed caniac, maibel-lengto iti ruar a cas ti santac ket magangonto: ket urnungendanto ken ibel-leng iti apuy, ket mapuuranto:

⁷ No agnaedcayo caniac, ket dagiti saoc agtaengda cadacayo, dawatenyo ti aniaman a cayatyo ket maaramidto cadacayo.

⁸ Daytoy ti pacaidaydayawan ni Amac, nga agbungacayo ti adu, ket agbalincay coma nga adalac.

⁹ Cas iti panagayat ni Ama caniac, casta met ti panagayatco cadacayo: agtaengcay iti ayatco.

¹⁰ No tungpalenyo dagiti bilbilinco, agtaengcayto iti ayatco; cas la iti panagtungpalco cadagiti bilbilin ni Amac, ket agtaengac iti ayatna.

¹¹ Dagitoy sinaoc cadacayo, tapno ti rag-oc agtaeng coma cadacayo, ket ti rag-oyo agdanunan coma.

¹² Daytoy ti bilinco: Nga agayanayatcayo iti maysa ken maysa, a cas ti panagayatco cadacayo.

¹³ Awan ti addaan dacdackel nga ayat ngem daytoy: ti mangted ti biagna gapu cadagiti gagayyemna.

¹⁴ Dacayo ti gagayemco, no aramidenyo dagiti ibilinco cadacayo.

¹⁵ Dicay naganenen ti adadipen, ta ti adipen dina ammo ti aramiden ni apona: ngem ninagancayo ti pagpagayam, ta isu-amin dagiti nangngegco ken Amac, impacaammoc cadacayo.

¹⁶ Dacayo didac pinili, ngem siac pinilicayo; ken incabilcayo tapno incayo ket agbungacayo coma: ket ti bungayo manayon coma: tapno ti amin a dawatenyonto ken Ama iti naganco, itdenna coma cadacayo.

¹⁷ Dagitoy ibilinco cadacayo; Tapno agayan-ayatcayo coma iti maysa ken maysa.

¹⁸ No ti lubong guraennacayo, ammoyo a ginuranac nga immun-una ngem dacayo.

¹⁹ No taga lubongcay coma, ti lubong ayatenna coma ti cucuana; ngem gapu ta saancay a taga lubong, no di ket pinilicayo iti lubong, gapuna guraennacay ti lubong.

²⁰ Laglagipenyo ti sao nga imbagac cadacayo: Saan a dacdackel ti adipen ngem ti apona. No inrurumendac, irurumendacayto met: no sinalimetmetanda ti saoc, salimetmetandanto met ti saoyo,

²¹ Ngem amin dagitoy aramidendanto cadacayo gapu iti naganco, ta dida ammo ti nangibaon caniac.

²² No saanac coma nga immay ken diac coma kinasao ida, awan coma ti basolda; ngem ita awan ti pagpambarda iti basolda.

²³ Ti gumura caniac, guraenna met ni Amac.

²⁴ No diac coma nagaramid cadacuada cadagiti ar-aramid nga awan sabali a nacaaramid, awan coma ti basolda; ngem ita nakitada ket ginurada, saan laeng a siac, no di ket ni Amac pay.

²⁵ Ngem maaramid daytoy tapno matungpal ti sao nga adda a naisurat iti lintegda: Ginuradac nga awan ti gapuna.

²⁶ Ngem inton umay ti Manangliuliwa, nga ibaonconto cadacayo manipud ken Ama, ti Espiritu ti kinapudno, nga aggapu ken Ama, panecnecannanto ti maipapan caniac:

²⁷ Ket mangpanecneccayto met gapu ta addacayo a naicuyog caniac nanipud idi damo.