San Juan 14 - Ti Biblia (1973)

¹ Saan coma nga agpulcoc ti pusoyo; mamaticayo iti Dios, mamaticayo met caniac.

² Idiay balay ni Amac adda adu a pagianan: no coma no saan a casta, kinunac coma cadacayo, ta innac isaganaancayo ti pagianan.

³ Ket no innac coma ket isaganaancayto ti pagianan, umayacto manen, ket icuyogcayto caniac met laeng: tapno no adino ti yanco, addacay met coma.

⁴ Ket no adino ti papanac, ammoyo ti dalan.

⁵ Cuna kencuana ni Tomas: Apo, dicam ammo no adino ti papanam: casano ti pannacaammomi ti dalan?

⁶ Ni Jesus cunana kencuana: Siac ti dalan, ken ti pudno ken ti biag; awan ti umay ken Ama, no di magna caniac.

⁷ No nailasindac coma, nailasinyo met coma ni Amac, manipud ita isu ammoyo ket nakitayo.

⁸ Cuna kencuana ni Felipe: Apo, ipakitam cadacami ti Ama, ket umanayen cadacami.

⁹ Ni Jesus cunana kencuana: Nabayag nga aldaw nga addaac cadacayo, ket dinac nailasin. Felipe? Ti nacakita caniac, nakitana ni Ama, Apayapay a cunaem: Ipakitam cadacami ti Ama?

¹⁰ Dica patien aya nga addaac ken Ama ket ni Ama adda caniac? Dagiti sao a saoec cadacayo, saanco a saoen a sisiac: ngem ni Ama idinto nga adda caniac: aramidenna dagiti aramidna.

¹¹ Patiendac nga addaac ken Ama, ket ni Ama, adda caniac: wenno no saan, patiendac gapu cadagiti aramid met laeng.

¹² Pudno, pudno, cunac cadacayo, ti mamati caniac, dagiti aramid nga aramidec, aramidennanto met, ket dacdackelto pay ngem dagitoy ti aramidenna, ta innac ken Ama.

¹³ Ket ti aniaman a dawatenyonto iti naganco, dayta ti aramidecto, tapno ni Ama maidaydayaw iti Anac.

¹⁴ No adda aniaman a dawatenyonto iti naganco, dayta ti aramidecto.

¹⁵ No ayatendac, tungpalenyo dagiti bilbilinco.

¹⁶ Ket agdawdawatacto ken Ama, ket iccannacayto ti Manangliwliwa a sabali, tapno adda cadacayo nga agnanayon.

¹⁷ Nga isu ti Espiritu ti pudno, isu a ti lubong saanna a mabalin nga awaten, ta dina makita ket dina mailasin, dacayo ammoyo, ta makipagtaeng cadacayo, ken addanto iti unegyo.

¹⁸ Dicayto baybayan nga ululila: umayacto cadacayo.

¹⁹ Adda pay apagbassit, ket ti lubong dinacto makitan; ngem dacayo makitadacto; gapu ta agbiagac, agbiagcayto met.

²⁰ Iti dayta nga aldaw mailasinyonto nga addaac ken Amac, ket dacayo caniac, ket siac cadacayo.

²¹ Ti addaan cadagiti bilbilinco ket tungpalenna, ida isu dayta ti agayat caniac, ket ti agayat caniac, ayatento ni Amac, ken isu ayatecto, ket agparangacto kencuana.

²² Cuna kencuana ni Judas, (saan a daydi Iscariote): Apo, ania ti mapasamac, nga agparangcanto cadacami, ket saan nga iti sangalubongan?

²³ Simmungbat ni Jesus, ket kinunana kencuana: No adda agayat caniac, salimetmetannanto ti saoc ket ni Amac ayatennanto, ket umaycamto kencuana, ket makipagiancamto kencuana.

²⁴ Ti di agayat caniac, saanna a tungpalen dagiti saoc ket ti sao a nangngegyo, saanco a cucua, no di cucua ni Ama a nangibaon caniac.

²⁵ Dagitoy a banag insaoc cadacayo, ita ta addaac pay cadacayo.

²⁶ Ngem ti Manangliwliwa, ti Espiritu Santo, nga ibaonto ni Ama iti naganco, isu isuronanto cadacayo dagiti amin a banag, ket ipalagipnanto cadacayo dagiti isu-amin nga imbagac cadacayo.

²⁷ Ti talna ibatic cadacayo, ti talnac itdec cadacayo: saan a cas iti panangited ti lubong ti panangitedco cadacayo. Saan coma nga agpulcoc ti pusoyo ken di agbuteng.

²⁸ Nangngegyon no casano ti panagcunac cadacayo: Innac, ket agsubliac cadacayo. No inayayatdac coma nagrag-ocay coma a pudno ta innac ken Ama: ta ni Ama dacdackel ngem siac.

²⁹ Ket ita kinunac cadacayo ta dipay maaramid, tapno, inton maaramid, mamaticay coma.

³⁰ Diac makipagsaonton ti adu cadacayo: ta umay ti principe ti lubong; ket awan ti cucuana caniac;

³¹ Ngem tapno mailasin ti lubong nga ayatec ni Ama ken no casano ti panangited ni Ama iti bilin caniac casta ti aramidec, Tumacdercayo, pumanawtay ditoy.