San Juan 13 - Ti Biblia (1973)

Ni Jesus buggoanna dagiti sacsaca dagiti adalanna.

¹ Ket casangoanan ti rambac ti pascua, idi nga ammo ni Jesus a ti horasna dimtengen tapno manipud itoy lubong umalis ken Ama, idinto nga inayatna dagiti taona nga addada ditoy lubong idi, inayatna ida agingga iti panungpalan.

² Ket idi madama ti panangrabii, agsipud ta ti sairo naipastrecnan iti puso ni Judas Iscariote, nga anac ni Simon, nga isu liputanna.

³ Idinto nga ammo ni Jesus a ti Ama intedna kencuana dagiti amin a banag cadagiti imimana ken naggapu iti Dios ket mapan iti Dios.

⁴ Timmacder idi pangrabiian, ket iniccatna dagiti pagan-anayna, ket nangala ti maysa a tohalla, ket imbarikesna.

⁵ Sa mangibuyat idi ti danum iti maysa a bacca, ket rinugianna a buggoan dagiti sacsaca dagidi adalanna, ken punasanna ida iti tohalla nga imbarikesna.

⁶ Immay ngarud ken Simon Pedro, ni Pedro cunana kencuana: Apo, buggoam dagitoy sacsacac?

⁷ Ni Jesus simmungbat, ket kinunana kencuana: Ti aramidec dica maawatan ita: ngem maawatamto no calpasanna.

⁸ Cuna kencuana ni Pedro: Uray caano dicanto buggoan dagitoy sacsacac. Ni Jesus simmungbat kencuana: No saanca a buggoan, awanto ti pannacabagim canian.

⁹ Cuna kencuana ni Simon Pedro: Apo, saan laeng a dagitoy sacsacac, ngem dagiti pay im-imac ken ti oloc.

¹⁰ Cuna kencuana ni Jesus: Ti nabuggoanen saan a masapul a buggoanen no di laeng dagiti sacsaca, ngem adda amin a sidadalus: ket dacayo nadaluscayo: ngem saan a dacay amin.

¹¹ Ta ammona idi no siasino ti mangliputto kencuana; gapuna kinunana: Saancayo a nadalus amin.

¹² Idi ngarud nalpasna a binuggoan dagiti sacsacada, ken naalana dagidi pagananayna, ken simmango manen, kinunana cadacuada: Ammoyo ti inaramidco cadacayo?

¹³ Dacayo naganendac ti Mannursuro ken Apo: ket naimbag ti panagcunayo: ta siac a pudno.

¹⁴ No ngarud siac nga Apo ken Mannursuro, binuggoac dagiti sacsacayo, dacayo rebbengyo met ti agbibinnuggo cadagiti sacsaca ti maysa ken maysa.

¹⁵ Ta iniccancayo ti pagtuladan, tapno aramidenyo met coma cas iti inaramidco cadacayo.

¹⁶ Pudno, pudno cunac cadacayo: ti adipen saan a dacdackel ngem iti apona, ket saan met a dacdackel ti maysa a naibaon ngem iti nangibaon kencuana.

¹⁷ No ammoyo dagitoy, nagasatcayo no aramidenyo ida.

¹⁸ Saanac nga agsao ti maipapan cadacay amin: ammoc dagiti pinilic; ngem tapno matungpal ti Surat: Ti makipangan caniac iti tinapay, kinusayannac ti mucodna.

¹⁹ Manipud ita ibagac cadacayo casangoanan ti pannacaaramidna, tapno, inton, maaramid, patienyo a siac ni Cristo.

²⁰ Pudno, pudno, cunac cadacayo, ti umawat iti ibaonconto, siac ti awatenna; ket ti umawat caniac, awatenna ti nangibaon caniac.

Ni Jesus ipacaammona ti panangliput ni Judas.

²¹ Idi nasao daytoy ni Jesus, nariribuc ti pakinakemna ket pinanecnecanna a kinuna: Pudno, pudno, cunac cadacayo a maysa cadacayo liputannacto.

²² Dagiti adalan nagkikinnitada iti maysa ken maysa, a pagduaduaanda no siasino ti nagcunaanna.

²³ Ket maysa cadagiti adalanna, daydi dinungdungngo ni Jesus, adda a nagsadag iti barucong ni Jesus.

²⁴ Ni Simon Pedro sininasanna daytoy ket cunana kencuana: Asino daydiay pagcunaanna.

²⁵ Isu idi a sisasadag iti barucong ni Jesus, cunana kencuana: Apo, siasino?

²⁶ Ni Jesus sumungbat kencuana; Isu dayta pangtedacto ti naibabasa a tinapay. Idi ngarud nga naibabasana ti tinapay itedna ken Judas, nga anac ni Simon Iscariote.

²⁷ Ket iti calpasan ti panangisacmolna simrec kencuana ni Satanas. Ni Jesus ngarud cunana kencuana: Ti aramidem, aramidem iti madaras.

²⁸ Ngem awan cadagiti adda idi panganan ti nacaawat no ania ti gapu a kinunana kencuana daytoy.

²⁹ Ta dagiti dadduma ipappapanda idi nga agsipud ta ni Judas ti agiggem idi ti supot ti cuarta, kinuna ni Jesus kencuana; Gatangem ti masapultayo a maipaay iti fiesta: wenno iccanna coma idi ti bassit dagiti napanglaw.

³⁰ Ket idi nacannan ti insacmolna, dagus a rimmuar: ket rabii idi.

Dagiti camaudianan a bilbilin ni Jesus cadagiti adalanna.—No apayapay a mapanen.—Cari a maipapan iti Manangliuliwa.

³¹ Idi ngarud rimmuaren, cuna ni Jesus: Ita maidaydayaw ti Anac ti tao, ket ti Dios maidaydayaw kencuana;

³² No ti Dios maidaydayaw kencuana casta met ti Dios idaydayawnanto kencuana met laeng, ket idaydayawnanto a dagus.

³³ Ubbing, bassit pay a tiempo a makipagianac cadacayo. Sapulendacto; ket cas kinunac cadagiti Judio: No adino ti papanac, dicay mabalin ti umay; cunac met cadacay ita.

³⁴ Maysa a bilin a baro ti itdec cadacayo, tapno agayanayatcayo iti maysa ken maysa; cas iti panagayatco cadacayo, casta met agayanayatcay coma iti maysa ken maysa.

³⁵ Gapu itoy mailasindanto a dacayo ti adalac, no adda ayatyo iti maysa ken maysa.

³⁶ Cuna kencuana ni Simon Pedro: Apo, adino ti papanam? Simmungbat ni Jesus: No adino ti papanac, saannac a mabalin a suruten ita; ngem surutennacto no calpasanna.

³⁷ Cuna kencuana ni Pedro: Apo, apayapay saanca a mabalin a suruten ita? ti biagco itedconto gapu kenca.

³⁸ Simmungbat ni Jesus: Itedmonto ti biagmo gapu caniac? Pudno, pudno cunac kenca, saanto pay nga agtaraoc ti cawitan namitlonton nga nailibacnac.