San Juan 12 - Ti Biblia (1973)

Ni Maria sapsapoanna iti bangbanglo dagiti sacsaca ni Jesus.

¹ Ni Jesus ngarud innem nga aldaw iti casangoanan ti pascua, napan idiay Betania, isu nga yan idi ni Lazaro, a pinagungar ni Jesus cadagiti natay.

² Iti casta inyaramidanda idiay ti maysa a panangrabii; ket ni Marta nagrservi, ngem ni Lazaro maysa cadagidi nakisango kencuana iti panganan.

³ Ni Maria ngarud nangala ti maysa a libra ti bangbanglo a napulpulos a nardo, a napateg unay ket sinapsapoanna dagiti sacsaca ni Jesus, ket pinunasanna ida cadagidi boocna: ket ti balay napno ti ayamuum daydi bangbanglo.

⁴ Ngem ni Judas Iscariote, maysa cadagidi adalanna, nga isu a mangliputto kencuana, cunana;

⁵ Apayapay a saan a nalaco daytoy a bangbanglo iti tal-lo gasut a denario, ket naited coma cadagiti napanglaw?

⁶ Ngem kinunana daytoy, saan a gapu ta isakitna dagiti napanglaw, no di ket gapu ta mannanacaw, ket agsipud ta isu ti agiggem ti supot, innalana dagiti naipisoc.

⁷ Ni Jesus ngarud kinunana: Baybay-am, tapno idulinna daytoy a maipaay iti aldaw ti pannacaitabonco.

⁸ Ta dagiti napanglaw agnanayon nga addada cadacayo, ngem no siac saan nga agnanayon nga addaac cadacayo.

⁹ Dagiti adu unay a tao cadagiti Judio naammoanda nga isu adda idiay idi; ket immayda saan laeng a gapu ken Jesus, no di ket tapno kitaenda ni Lazaro, isu a pinagungarna cadagiti natay,

¹⁰ Ninumo dagidi cangatoan a papadi, a papatayenda met ni Lazaro;

¹¹ Ta gapu kencuana adu ti simmina cadagiti Judio ket namati ken Jesus.

Iseserrec a sibabal-ligi ni Jesus idiay Jerusalem.

¹² Iti sumuno nga aldaw, dagiti adu unay a tao nga immay iti fiesta, idi nangngegda a ni Jesus umumay idiay Jerusalem,

¹³ Nangalada cadagiti bulbulong dagiti cayo a palma, ket rimmuarda a simmabet kencuana, ket inpucpuccawda ti: Hosana: Madaydayaw ti umay iti nagan ti Apo, ti Ari ti Israel.

¹⁴ Ket idi nacasarac ni Jesus ti maysa nga urbon nga asno, nagsacay kencuana cas iti naisurat:

¹⁵ Dica agbuteng, babai nga anac ti Sion: adtoy, ti Arim umay a sisasacay iti maysa nga urbon ti asno.

¹⁶ Dagitoy saan a naawatan dagiti adalanna, idi damo; ngem idi ni Jesus naitan-oken, idin nalagipda a dagitoy naisuratda a maipapan kencuana, ken inaramidda dagitoy a banag kencuana.

¹⁷ Pinanecnecan ngarud dagiti adu a tao nga addada a naicuyog kencuana, daydi panangawagna ken Lazaro iti tanem ken pinagungarna kencuana cadagiti natay,

¹⁸ Gapu itoy met dagiti adu a tao napanda simmabet kencuana ta nangngegda nga isu inaramidna daytoy a pagilasinan.

¹⁹ Dagiti Fariseo ngarud kinunada iti maysa ken maysa: Makitayo nga awan ti pangabacanyo? adtoy, ti sangalubongan napan simmurot kencuana.

Dagiti dadduma a taga Grecia cayatda a kitaen ni Jesus.—Isu saoenna ti mabiit nga ipapataynan.—Maysa a timec ti langit.—Ni Jesus, silaw ti lubong.

²⁰ Ket adda idi dadduma a taga-Grecia cadagiti simmang-at a mapan makifiesta:

²¹ Dagitoy ngarud immayda ken Felipe, a taga Betsaida ti Galilea, ket nagdawatda a cuncunada kencuana: Apo, cayatmi coma a kitaen ni Jesus.

²² Napan ni Felipe ket ibagana ken Andres: napan da Andres ken ni Felipe, ket ibagada ken Jesus.

²³ Ket ni Jesus sumungbat cadacuada, a cuncunana; Dumtengen ti horas a ti Anac ti tao maitanoc.

²⁴ Pudno, pudno, cunac cadacayo: No ti bukel ti trigo saan nga agtinnag iti daga ket matay, isu agtaeng a maymaysa; ngem no matay, adu a bunga ti itedna.

²⁵ Ti mangipangpangrona iti biagna, isu ti mapucawna: ket ti gumura iti biagna ditoy lubong, isu ti idulinnanto a maipaay iti biag nga agnanayon.

²⁶ No adda agservi caniac, surutennac coma: ket no adino ti yanco, agianto met idiay ti adipenco; no adda agservi caniac, isu itan-octo ni Amac.

²⁷ Ita adda a naririboc ti cararuac: ket ania ti saoecto? Ama, isalacannac itoy nga horas. Ngem maipanggep itoy immayac iti daytoy nga horas.

²⁸ Ama, itan-ocmo ti naganmo. Immay ngarud ti timec a nanipud langit a nagcuna: Intan-occon ket itan-occonto manen.

²⁹ Dagiti adu a tao ngarud nga adda iddiay ken nacangngeg, kinunada a naggurrood. Dagiti sabsabali kinunada: Maysa nga angel nakisao kencuana.

³⁰ Simmungbat ni Jesus ket kinunana: Saan nga immay daytoy a timec gapu caniac no di ket gapu cadacayo.

³¹ Ita ti pannacaocom daytoy a lubong: ita ti principe daytoy a lubong maibel-lengto iti ruar.

³² Ket siac, no maipangatoac manipud iti daga, guyuguyecto caniac amin a tao.

³³ Ngem daytoy kinunana idi a pangipaawatna no ania a kita ti patay ti ipapataynanto,

³⁴ Simmungbat ngarud kencuana dagidi adu a tao: Nangngegmi iti Linteg, a ti Cristo mataginayonto: ket casano ti panagcunam: Masapul a ti Anac ti tao maipangato? Siasino daytoy Anac ti tao?

³⁵ Kinuna ngarud ni Jesus cadacuada: Agian pay iti bassit nga aldaw ti silaw cadacayo: magnacayo ita ta adda pay laeng ti silaw cadacayo tapno dinacay macamacam ti sipnget; ket ti magna iti sipnget saanna nga ammo no adino ti papananna.

³⁶ Ita ta adda pay laeng ti silaw cadacayo, mamaticayo iti silaw, tapno agbalincayo nga annac ti lawag. Dagitoy sinao ni Jesus, ket pimmanaw ket inlemmenganna ida.

³⁷ Ngem uray inaramidna iti sangoananda dagiti nagadu a pagilasinan, saanda pay a namati kencuana:

³⁸ Tapno matungpal idi ti sao nga insao ni mammadto nga Isaias: a kinunana: Apo, asino ti namati iti impadamagmi? Ket siasino ti nacaipakitaan ti tackiag ti Apo?

³⁹ Gapu itoy saanda a nabalin ti mamati, ta kinuna manen ni Isaias:

⁴⁰ Pinagbulsecna dagiti matada, ket pinatangkenna ti pusoda; Di la ket ta macakitada cadagiti matada, ken macaawatda iti pusoda, ket agbalbaliwda coma ket siac agasac coma ida.

⁴¹ Dagitoy sinao ni Isaias, ta nakitana ti dayagna, ket nagsao ti maipapan kencuana.

⁴² Nupay casta, uray cadagidi agturay adu dagiti namati kencuana: ngem gapu cadagidi Fariseo saanda nga imparangarang, amangan no maparuarda iti sinagoga:

⁴³ Ta adadda nga inayatda ti dayaw a nataoan ngem dayaw a nadiosan:

⁴⁴ Ket ni Jesus nagpucaw ket kinunana: Ti mamati caniac, saan a siac ti patienna no di ti nangibaon caniac.

⁴⁵ Ket ti macakita caniac, makitana ti nangibaon caniac.

⁴⁶ Siac immayac a silaw ditoy lubong tapno amin a mamati caniac, saanda nga agtaeng iti sipnget.

⁴⁷ Ket no ti siasinoman a tao dumngeg cadagiti saoc ket dina tungpalen ida, saan a siac ti mangocom kencuana; ta saanac nga immay tapno mangocom iti lubong, no di ket tapno mangisalacan iti lubong.

⁴⁸ Ti tumal-licod caniac ket dina awaten dagiti saoc adda mangocom kencuana; ti sao nga insaoc isu ti mangocomto kencuana iti camaudianan nga aldaw.

⁴⁹ Ta saanac a nagsao a sisiac; no di ni Ama a nangibaon caniac, isu imbilinna caniac, no ania ti ibagac ken saoec.

⁵⁰ Ket ammoc a ti bilinna isu ti biag nga agnanayon: dagiti ngarud saoec, cas iti panangibaga caniac ni Ama, casta ti panagsaoc.