San Juan 11 - Ti Biblia (1973)

Ti panagungar ni Lazaro.

¹ Ket masakit idi ti maysa a tao, ni Lazaro, taga Betania, a puroc da Maria ken ni cabsatna a Marta.

² Ket ni Maria, nga akincabsat ken Lazaro a masakit, isu daydi nangsapsapo iti bangbanglo iti Apo ken nangpunas cadagiti sacana cadagiti boocna.

³ Nangibaon ngarud dagiti cacabsatna a babbai kencuana a cuncunada: Apo, ti dungdungoem, masakit.

⁴ Ngem idi nangngeg ni Jesus daytoy, kinunana: Daytoy a sakit saan nga ipatay ngem pacaidayawan ti Dios, tapno ti Anac ti Dios madaydayaw iti dayta.

⁵ Ket ni Jesus ay-ayatenna idi da Marta, ken ni cabsatna ken ni Lazaro.

⁶ Idi mangngegna ngarud nga isu masakit, nagbati pay laeng idiay yanna iti dua nga aldaw.

⁷ Calpasanna, cunana cadagiti adalanna; Intay manen idiay Judea.

⁸ Cuna kencuana dagiti adalan: Mannursuro, ita ngayangayendaca a batoen dagiti Judio, ket inca manen idiay?

⁹ Simmungbat ni Jesus: awan aya ti sangapulo ket dua nga horas iti aldaw? No ti maysa a tao magna iti aldaw, saan a maitibcol agsipud ta makitana ti lawag daytoy a lubong.

¹⁰ Ngem no ti maysa a tao magna iti rabii, maitibcol, ta awan silaw kencuana.

¹¹ Sinaona dagitoy: ket calpasanna, cunana cadacuada: Ni Lazaro a gayyemtayo matmaturog; ngem innac tapno riingec iti turogna.

¹² Kinuna ngarud dagiti adalan kencuana: Apo, no matmaturog, umimbagto.

¹³ Ngem ni Jesus nagsao a maipapan iti ipapatayna; ngem impapanda a nagsao iti panaginana iti turog.

¹⁴ Idin kinuna ngarud ni Jesus a silalawag cadacuada: Ni Lazaro natay.

¹⁵ Ket agragsacac gapu cadacayo ta siac awanac idiay tapno patienyo: nupay casta intay kencuana.

¹⁶ Kinuna ngarud ni Tomas, a managan ti Didimo, cadagiti caadalanna: Intayo met tapno mataytayo a maicanunong kencuana.

¹⁷ Ket idi immay ni Jesus, nasaracanna nga isu adda iti tanem iti uppat nga aldawen.

¹⁸ Ti Betania asideg iti Jerusalem, a cas sangapulo ket lima nga estadio ti caadayona.

¹⁹ Ket adu cadagiti Judio ti immay cada Marta ken ni Maria, tapno liuliwaenda ida maipoon ken ni cabsatda.

²⁰ Ni Marta ngarud, idi nangngegna nga umumay ni Jesus napan simmabet kencuana; ngem ni Maria situtugaw iti balay.

²¹ Ni Marta kinunana ngarud ken Jesus: Apo, no addaca coma ditoy idi, ni cabsatco saan coma a natay.

²² Ket uray ta ammoc a ti aniaman a dawatem iti Dios, ti Dios itednanto kenca.

²³ Cuna kencuana ni Jesus: Agungarto ni cabsatmo.

²⁴ Ni Marta cunana kencuana: Ammoc nga agungarto inton panagungar iti camaudianan nga aldaw.

²⁵ Cuna kencuana ni Jesus: Siac ti panagungar ken ti biag: ti mamati caniac, uray no matay, agbiagto pay.

²⁶ Ket siasinoman nga agbiag ken mamati caniac, saanto a matay a pulos. Patiem daytoy?

²⁷ Cunana kencuana: Wen, Apo; siac pinatic a sica ti Cristo, ti Anac ti Dios, nga umay ditoy lubong.

²⁸ Ket idi nasaonan daytoy, napan ket inayabanna iti nalimed ni Maria a cabsatna, a cuncunana: Ti Mannursuro adda ditoy ket ayabannaca.

²⁹ Ket isu, idi nangngegna daytoy, timmacder a dagus ket napan kencuana.

³⁰ (Ngem ni Jesus saan pay a dimteng iti puroc no di ket adda pay laeng iti nangsabatan ni Marta kencuana.)

³¹ Dagiti Judio ngarud a cadduana iti balay ken mangliuliwa kencuana, idi nakitada a timmacder ni Maria iti napardas, ken rimmuar, sinurotda, nga ipappapanda a mapan idiay tanem tapno agsangit sadiay.

³² Ni Maria ngarud idi dimteng idi yan ni Jesus, ket makitana, nagrucnoy cadagiti sacsacana, a cuncunana kencuana: Apo, no addaca coma ditoy idi, saan coma a natay ni cabsatco.

³³ Idi nakita ngarud ni Jesus nga isu agsangsangit, ken agsangsangit met dagiti Judio nga nanguyog kencuana, nagladingit iti nakemna ket nagsennaay,

³⁴ Ket kinunana: Adino ti nangicabilanyo kencuana? Cunada kencuana; Apo, umayca ket kitaem.

³⁵ Nagsangit ni Jesus.

³⁶ Kinuna ngarud dagiti Judio: Kitaenyo no casano ti panangdungngona kencuana!

³⁷ Ngem dadduma cadacuada kinunada: Saan aya a nabalinan daytoy a tao, a nanglucat cadagiti mata ti bulsec, nga aramiden met nga daytoy a tao saan coma a natay?

³⁸ Ni Jesus ngarud a nagsennaay manen iti pusona dimteng iti tanem. Isu idi ti maysa a rukib ket naserraan iti maysa a bato.

³⁹ Cuna ni Jesus: Iccatenyo ti bato. Ni Marta, a cabsat ti natay, cunana kencuana: Apo, nabuyoken, ta maicapat nga aldaw a natayen.

⁴⁰ Ni Jesus cunana kencuana: Diac aya kinuna kenca, a no mamatica, makitam ti dayag ti Dios?

⁴¹ Iniccatda ngarud ti bato. Ket ni Jesus, intangadna dagiti matana, ket kinunana: Ama, agyamanac kenca ta impangagnac.

⁴² Ket ammoc nga ipangagnac iti agnanayon; ngem gapu cadagitoy adu a tao nga agtatacder iti aglawlaw nagsaoac tapno patienda a sica imbaonnac.

⁴³ Ket idi nasaona dagitoy, pimmuccaw iti napigsa a timec: Lazaro, rumuarca.

⁴⁴ Daydi natay rimmuar a sipapatapat dagiti imima ken sacsacana cadagiti bedbed, ket ti rupana adda a nabungon iti maysa nga luput. Cuna ni Jesus cadacuada: Warwaranyo ket baybayanyo a mapan.

⁴⁵ Adu ngarud cadagidi Judio nga immay ken Maria, ken nacakita iti inaramid ni Jesus, namatida kencuana.

⁴⁶ Ngem dadduma cadacuada napanda cadagiti Fariseo ket sinaritada cadacuada dagiti inaramid ni Jesus.

Dagiti Fariseo nagsisinnaludsudda no papatayenda ni Jesus.

⁴⁷ Dagiti cangatoan a papadi ken dagiti Fariseo nangurnongda ti maysa a paguumanan ket kinunada: Ania ti aramidentayo? ta daytoy a tao agaramid cadagiti adu a pagilasinan.

⁴⁸ No baybay-antayo laeng, mamatinto amin dagiti tao kencuana; ket umayto dagiti taga Roma, ket iccatendanto ti saadtayo ken ti ili pay.

⁴⁹ Ngem ti maysa cadacuada, ni Caifas, cangatoan a padi iti daydi a tawen, kinunana cadacuada: Awan ti ammoyo a pulos;

⁵⁰ Ket dicay panpanunuten a maipaay cadacayo a matay ti maysa a tao gapu cadagiti umili, ket saan ket a mapucaw ti sangcadagaan.

⁵¹ Ngem daytoy saanna a sinao, gapu kencuana nga isisu; no di ket, idinto nga isu ti cangatoan a padi iti daydi a tawen, impadtona a ni Jesus matayto gapu iti ili;

⁵² Ket saan laeng a maipoon iti ili, no di ket tapno isu maurnongna met nga agmaymaysa dagiti annac ti Dios a naiwarawara idi.

⁵³ Nanipud ngarud idi nga aldaw ninumoda nga papatayenda.

⁵⁴ Ni Jesus ngarud saanen a nagna a nalatac iti yan dagiti Judio; no di ket nanipud idiay napan iti away nga asideg iti let-ang, iti maysa nga ili a managan Efraim: ket nagian idiay agraman dagiti adalanna.

⁵⁵ Ket ti pascua dagiti Judio asidegen idi: ket adu ti napan sadi Jerusalem a naggapuda cadagiti awaway idi masangoanan ti pascua, tapno aggugorda.

⁵⁶ Sinapulda ngarud ni Jesus, ket cuncuna ti maysa ken maysa idi agtatacderda idiay Templo: Ania ti pagarupenyo, dinto umay iti fiesta?

⁵⁷ Ket dagiti cangatoan a papadi ken dagiti Fariseo nagbilinda, a no adda macaammo ti yanna, ibagana coma tapno tiliwenda.