San Juan 10 - Ti Biblia (1973)

Pangngarig iti naimbag a pastor.

¹ Pudno, pudno, cunac cadacayo, ti saan a sumrec iti ruangan ti pacayaponan dagiti carnero, no di ket cumalay-at iti sabali a dalanan isu met laeng ti mannanacaw ken tulisan.

² Ngem ti sumrec iti ruangan, isu ti pastor dagiti carnero.

³ Isu ilucatan ti agay-aywan iti ruangan, ket dagiti carnero denggenda ti timecna: ket ayabanna dagiti carnerona cadagiti nagnaganda, ket iruarna ida.

⁴ Ket inton nairuarnan amin ida, magna iti sangoananda; ket dagiti carnero sumurotda, ta mailasinda ti timecna.

⁵ Ngem ti dida amammo saandanto a suruten, no di ket itarayandanto: ta dida amammo ti timecna.

⁶ Daytoy a pangngarig insao ni Jesus cadacuada: ngem saanda a naawatan no ania dagidi a sinasaona cadacuada.

⁷ Kinuna manen, ngarud ni Jesus cadacuada; Pudno, pudno cunac cadacayo, siac ti ruangan dagiti carnero.

⁸ Isu-amin dagidi immay nga immununa ngem siac, mannanacaw ken tulisanda; ngem saan a dinengngeg ida dagiti carnero.

⁹ Siac ti ruangan; ti sumrec a magna caniac, maisalacanto, ket sumrec ken rumuarto ket macasaracto ti pagaraban.

¹⁰ Ti mannanacaw saan nga umay no di tapno agtacaw, ken agpatay, ken agdadael: siac immayac tapno maaddaanda ti biag ken tapno maaddaanda ti nawadwad unay.

¹¹ Siac ti naimbag a pastor: ti naimbag a pastor itedna ti biagna gapu cadagiti carnerona.

¹² Ti makitangtangdan a saan a pastor, a dina cucua dagiti carnero, no makitana ti lobo nga umay, itarayanna dagiti carnero, ken baybayanna ida; ket ti lobo rabsuten ken warawaraenna ida:—

¹³ Tumaray, agsipud ta isu patangtangdanan, ket saanna a patgen dagiti carnero—

¹⁴ Siac ti naimbag a pastor, ket ammoc dagiti cucuac ket dagiti cucuac ammodac,

¹⁵ A cas ti Ama amammonac, casta met siac amammoc ti Ama: ket itedco ti biagco maipoon cadagiti carneroc.

¹⁶ Adda met sabsabali a carneroc a saanda a naitipon itoy a pagtaracnan: dagidiay masapul nga iyegco ket denggendanto ti timecco; ket addanto maymaysa nga arban, ken maymaysa a pastor.

¹⁷ Gapu iti daytoy ayatennac ni Ama, ta itedco ti biagco, tapno awatecto manen.

¹⁸ Awan ti mangiccat caniac no di ket iyawatco a sisiac. Adda pannacabalinco a mangyawat ti biagco ken adda pannacabalinco met a mangawat manen, Daytoy a bilin inawatco ken Amac.

¹⁹ Naaramid manen ti panagsusupadi cadagiti Judio gapu cadagitoy a sao.

²⁰ Ket adu cadacuada kinunada: Adda sairona, ket mauyong; apayapay denggenyo?

²¹ Kinuna dagiti sabsabali: Dagitoy saanda a sao ti adda sairona: Cabaelan aya ti sairo a luctan dagiti mata dagiti bulsec?

Iti fiesta ti panangidaton, ni Jesus nagintuudan dagiti Judio, maiwarragawag ti Mesias, ti Anac ti Dios.—Cayatda a batoen, ket mapan iti labes ti Jordan.

²² Ket fiesta idi ti panangidaton idiay Jerusalem:

²³ Ket tiempo ti lam-ec idi; ket ni Jesus magmagna idiay Templo iti ruangan ni Salomon.

²⁴ Dagiti Judio ngarud linawlawda ket kinunada kencuana: Agingga ti caano a pagduaduaennacami? No sica ti Cristo, ibagam cadacami a silalawag.

²⁵ Simmungbat cadacuada ni Jesus: Imbagac cadacayo ket dicay mamati: dagiti aramid nga aramidec iti nagan ni Amac, dagita ti mangpanecnec iti maipapan caniac.

²⁶ Ngem dicay mamati, ta saandacayo a caddua dagiti carneroc.

²⁷ Dagiti carneroc denggenda ti timecco, ket ammoc ida ket surutendac;

²⁸ Ket siac iccac ida ti biag nga agnanayon: ket didanto mapucaw uray caano, ket awanto ti mangrabsut cadacuada itoy imac.

²⁹ Ni Amac a nangted caniac cadacuada, dacdakel ngem cadagiti isu-amin: ket awan ti macabalin a mangrabsut cadacuada iti ima ni Amac.

³⁰ Siac ken ti Ama maymaysacami.

³¹ Dagiti Judio pimmidutda manen ti batbato tapno uburenda.

³² Simmungbat cadacuada ni Jesus: Adu dagiti naimbag nga aramid a naggapu ken Amac nga impakitac cadacayo: ania cadagita nga aramid ti pangbatoanyo caniac?

³³ Simmungbat kencuana dagiti Judio: Saandaca a batoen gapu iti naimbag nga aramid, no di ket gapu iti tabbaawmo; ken gapu ta sica, idinto a taoca, aramidem ti bagim a Dios.

³⁴ Ni Jesus simmungbat cadacuada: Saan aya nga adda a naisurat iti lintegyo: Siac kinunac: Dacayo didioscayo?

³⁵ No ninaganna ida ti didios dagiti nacaisaoan ti sao ti Dios, (ket ti Surat saan a mabalin a paglibacan):

³⁶ Cunaenyo iti pinagsanto ti Ama, ken imbaonna ditoy lubong; agtabbaawca; agsipud ta kinunac: Siac ti Anac ti Dios?

³⁷ No diac agaramid cadagiti aramid ni Amac, didac patien.

³⁸ Ngem no aramidec ida, uray no didac patien, patienyo dagiti aramid, tapno maammoyo ken maawatanyo a ti Ama adda caniac, ket siac addaac kencuana.

³⁹ Gayagayenda manen nga tiliwen; ket isu naglapsut cadagiti im-imada.

⁴⁰ Ket napan manen idiay labes ti Jordan, iti disso nga immuna nga naggianan ni Juan a namamautizaran: ket nagian sadiay.

⁴¹ Ket adu dagiti immay kencuana, ken cuncunada: Ni Juan pudno nga awan ti pagilasinan nga inaramidna; ngem isu-amin nga insao ni Juan a maipapan itoy a tao, napudnona.

⁴² Ket adu dagiti namati kencuana idiay.