San Juan 1 - Ti Biblia (1973)

Ti Verbo agbalin a lasag.

¹ Idi punganay adda ti Verbo, ket ti Verbo adda iti Dios, ket ti Verbo isu, Dios.

² Isu met laeng adda idi punganay iti Dios.

³ Dagiti isu-amin napaaddada gapu kencuana, ket no isu awan, awan ti napaadda cadagiti adda.

⁴ Adda idi kencuana ti biag, ket ti biag isu idi ti silaw dagiti tao.

⁵ Ket ti silaw aglawag iti sipnget, ket ti sipnget isu dina inawat.

⁶ Adda idi ti maysa a tao nga imbaon ti Dios, a managan, Juan.

⁷ Daytoy immay maipoon iti pangpanecnec, tapno panecnecanna ti maipapan iti silaw, tapno amin a tattao mamatida coma gapu kencuana.

⁸ Saan nga isu idi ti silaw, no di ket immay tapno mapanecnecanna ti maipapan iti silaw.

⁹ Adda idi ti silaw a pudno, a manglawag iti amin a tao nga umay ditoy lubong.

¹⁰ Isu adda idi iti lubong ket ti lubong napaadda gapu kencuana; ket ti lubong dina nailasin.

¹¹ Immay cadagiti cucuana, ket dagiti taona isu saanda nga inawat.

¹² Ngem cadagiti amin nga immawat kencuana, iniccanna ida ti calintegan nga agbalin nga anac ti Dios cadagidiay a mamati iti naganna:

¹³ Nga saan nga agtaud iti dara wenno iti nakem ti lasag wenno iti nakem ti lalaki, no di ket nayanacda iti Dios.

¹⁴ Ket daydi a Verbo nagbalin a lasag, ket nakipaggian cadatayo: (ket nakitami ti dayagna, a cas la iti dayag ti Bugbugtong nga Anac ti Ama), napno ti parabur ken pudno.

Pangpanecnec ni Juan a Bautista.

¹⁵ Ni Juan panecnecanna ti maipapan kencuana, ket nagickis a cuncunana: Daytoy isu daydi kinunac: Dayta umay sumaruno caniac, una-annac, ta immununa idi ngem siac.

¹⁶ Ta iti pannacapunnona immawattay amin, ket parabur a mainayon iti parabur.

¹⁷ Ta ti linteg naited gapu ken ni Moises; ti parabur ken ti kinapudno immayda gapu ken Jesu-Cristo.

¹⁸ Awan ti nacakita iti Dios uray caano: ti Bugbugtong nga Anac, nga adda iti saclot ti Ama, isu ti nangipacaammo kencuana.

¹⁹ Ket daytoy ti pangpanecnec ni Juan, idi nangibaon dagiti Judio cadagiti papadi ken Levita nanipud Jerusalem a mangintuud kencuana: Siasinoca?

²⁰ Ket nagpudno ket saan a nagsukir; ket impudnona: Saan a siac ti Cristo.

²¹ Ket inintuudda kencuana: Ania ngarud? Sica ni Elias? Ket kinunana: Saan a siac. Sica daydi mammadto? Ket simmungbat: Saan.

²² Kinunada ngarud kencuana: Asinoca? tapno maitedmi ti sungbat cadagiti nangibaon cadacami. Ania ti cunam iti maipapan kenca met laeng?

²³ Kinunana; siac ti timec ti maysa nga agawawag iti let-ang; Palintegenyo ti dalan ti Apo, cas kinuna ni mammadto nga Isaias.

²⁴ Ket dagiti naibaon naggapuda cadagiti Fariseo.

²⁵ Ket inintuudda ket kinunada kencuana: Apayapay ngarud a mamautizarca, no saan a sica ti Cristo, wenno ni Elias wenno daydi mammadto?

²⁶ Ni Juan simmungbat cadacuada, a cunana; Siac mamautizarac iti danum, ngem iti nagtengngaanyo agtatacder ti maysa a saanyo nga amammo,

²⁷ Daytoy umay sumaruno caniac saanac a maicari a mangwarwar ti galut ti zapatosna.

²⁸ Dagitoy a banag naaramidda idiay Betania, idiay labes ti Jordan, isu a pangbabautizaran idi ni Juan.

²⁹ Iti sumuno nga aldaw makitana ni Jesus nga umay kencuana, ket cunana: Adtoy, ti Cordero ti Dios, a mangiccat ti basol ti lubong!

³⁰ Daytoy isu daydi kinunac: Sumaruno caniac nga umay ti maysa a lalaki, isu a nagbalin nga umuna ngem siac, ta nangnangrona ngem siac idi.

³¹ Ket isu diac amammo idi: ngem tapno maiparangarang iti Israel gapuna immayac mangbautizar iti danum.

³² Ket ni Juan pinanecnecanna a cunana: Naimatangac ti Espiritu a bumabbaba idi nanipud langit a cas la calapati, ket nagtaeng kencuana.

³³ Ket isu diac amammo idi; ngem daydi nangibaon caniac a mamautizar iti danum, kinunana caniac. Ti makitamto a babaan ti Espiritu ket agtaeng kencuana, daytoy met laeng ti mamautizar iti Espiritu Santo.

³⁴ Ket siac nakitac ket pinanecnecac a daytoy ti Anac ti Dios.

Dagiti immun-una nga adalan ni Jesus.

³⁵ Iti sumuno nga aldaw agtatacder manen ni Juan ken dua cadagiti adalanna;

³⁶ Ket kinitana ni Jesus a magmagna ket cunana: Adtoy ti Cordero ti Dios!

³⁷ Ket dagidi dua nga adalan a nacangngeg ti panagsaona simmurotda ken Jesus.

³⁸ Ket timmaliaw ni Jesus ket nakitana ida a sumursurot, cunana cadacuada: Ania ti sapulenyo? ket kinunada kencuana: Rabi, (a no maipatarus, cayatna a saoen, Mannursuro), adino ti pagtaengam?

³⁹ Cunana cadacuada: Umaycayo ket kitaenyonto. Napanda ngarud ket nakitada ti pagtaenganna, ket nakipagtaengda kencuana ti daydi nga aldaw: ta nganngani horas a maicasangapulo.

⁴⁰ Maysa cadagiti dua a nagdengngeg ken Juan ken simmurot ken Jesus isu ni Andres, cabsat ni Simon Pedro.

⁴¹ Isu birukenna nga umuna ni cabsatna a Simon ket cunana kencuana: Nazaracanmi ti Mesias, (a no maipataros, Cristo).

⁴² Isu inyegna ken Jesus. Ket ni Jesus, minatmatanna ket kinunana: Sica ni Simon, anac ni Jonas: sica managancanto ti Cefas, (a cayatna a saoen, Pedro),

⁴³ Iti sumuno nga aldaw kinayat ni Jesus ti mapan idiay Galilea, ket masaracanna ni Felipe, ket cunana kencuana: Surutennac.

⁴⁴ Ket ni Felipe taga Betsaida, ili ni Andres ken ni Pedro.

⁴⁵ Ni Felipe sapulenna ni Natanael, ket cunana kencuana: Nasaracanmi daydi insurat ni Moises iti linteg, ken dagiti mammadto: Ni Jesus, a taga Nazaret nga anac ni Jose.

⁴⁶ Ket kinuna kencuana ni Natanel; Mabalin aya nga agtaud idiay Nazaret ti aniaman a banag a naimbag? Cuna kencuana ni Felipe: Umayca ket kitaem.

⁴⁷ Ni Jesus nakitana nga agturong kencuana ni Natanael, ket kinunana iti maipapan kencuana: Adtoy ti maysa a napudno nga Israelita, a kencuana awan ti ulbod!

⁴⁸ Cuna kencuana ni Natanael: Casano ti pannacaammom caniac? Simmungbat ni Jesus ket kinunana kencuana: Casangoanan ti panangayab ni Felipe kenca, idi addaca iti siroc ti cayo nga higos, nakitaca.

⁴⁹ Ni Natanael simmungbat kencuana: Rabbi, sica ti Anac ti Dios; sica ti Ari ti Israel.

⁵⁰ Simmungbat ni Jesus ket kinunana kencuana: Gapu ta kinunac kenca: Nakitaca iti siroc ti cayo nga higos, mamatica? Banbanag a daddadackel ngem dagitoy ti makitamto.

⁵¹ Ket cunana kencuana: Pudno, pudno cunac cadacayo; makitayonto ti langit a silulucat, ken dagiti angel ti Dios nga umuli ken bumaba itoy Anac ti tao.