Josue 9 - Ti Biblia (1973)

Dagiti Cananeos agsaganada a maibusor ken Josue. Ti sicap dagiti Gabaonitas; dagiti Gabaonitas maadipenda.

¹ Ket naaramid, nga idi nga isu-amin dagiti ar-ari nga addada idi iti ballasiw ti Jordan, iti caturodan, ken cadagiti tantanap, ken iti isu-amin nga igid ti dackel a taaw iti sango ti Libano, dagiti Heteos, Amorreos, Cananeos, Perezeos, Heveos, ken Jebuseos, nadamagda;

² A naguummongda, tapno makigubatda ken Josue ken iti Israel iti maymaysa a timpuyog.

³ Ngem idi a dagiti agnaed iti Gabaon natimudda no ania ti inaramid idi ni Josue iti Jerico ken iti Ai,

⁴ Isuda nangaramatda met iti sicap, ket napanda ket nagaramidda a casda la nabaon, ket nangalada cadagiti supsupot a daan nga imparabao cadagiti asnoda, ken cadagiti lallalat a pagiccan ti arac, daan ken napigis, ken napunggos,

⁵ Ken zapzapatos a daan ken tacup-tacup cadagiti sacsacada, ken cawcawes a daan cadacuada; ken isu-amin a tinapay a balonda namagaanen ken binuoten.

⁶ Ket immayda idi ken Josue idiay pacarso idiay Gilgal, ket kinunada kencuana, ken cadagiti tattao ti Israel, Dacami naggapucami iti adayu unay a daga: makinomocayo ngarud ita cadacami.

⁷ Ket dagiti tattao ti Israel kinunada idi cadagiti Heveos, Nalabit ngata nga agnaedcayo iti nagtengngaanmi; ket casano ngarud ti pannakinomomi cadacayo?

⁸ Ket isuda kinunada ken Josue, Dacami dagiti ad-adipenmo. Ket ni Josue kinunana cadacuada, Siasinocayo aya? ken sadino aya ti naggapuanyo?

⁹ Ket isuda kinunada kencuana, Nanipud iti adayu unay a daga dagiti ad-adipenmo immayda a gapu iti nagan ni Jehova a Diosmo: ta nangegmi ti damagna, ken isu-amin a banag nga inar-aramidna idiay Egipto,

¹⁰ Ken isu-amin nga inaramidna cadagiti dua nga ar-ari dagiti Amorreos, nga addada idi iti ballasiw ti Jordan, ken Sejon nga ari ti Jesebon, ken ni Og nga ari ti Basan, nga addada idi sadi Astarot.

¹¹ Ket dagiti lallacaymi ken amin dagiti agnaed iti dagami nagsaoda cadacami, a cunada, Mangiggemcayo Mangiggemcayo iti balon nga agpaay iti dalan, ket incayo a sumabet cadacuada, ket cunaenyo cadacuada, Dacami dagiti ad-adipenyo: ket makinomocayo ita cadacami.

¹² Daytoy tinapaymi innalami idi a nabara cadagiti balbalaymi a maipaay iti dalan iti daydi aldaw, nga iruruarmi a umay cadacayo; ngem ita, adtoy, namagan, ken binuoten;

¹³ Dagitoy lallalat ti arac, a pinunnomi, babbaroda idi: adtoy, ket napigisdan: ket dagitoy cawcawesmi ken zapzapatosmi daandan a gapu iti caunday ti pannagna.

¹⁴ Ket dagiti tattao ti Israel innalada idi ti balonda, ket dida nagsalsaludsod iti patigmaan iti ngiwat ni Jehova.

¹⁵ Ket ni Josue nakicappia cadacuada, ken nakinomo cadacuada a tiddaenna ida a sibibiag. Ket dagiti pangpanguloen ti gimong nagsapatada cadacuada.

¹⁶ Ket naaramid idi naturpos dagiti tallo nga al-aldaw iti calpasan ti pannakitulagda cadacuada, nangegda nga isuda idi dagiti carcarrubada, ket agnaedda iti nagtengngaanda.

¹⁷ Ket dagiti annac ti Israel nagnada, ket dimtengda cadagiti il-ilida iti maicatlo nga aldaw. Ket dagiti il-ilida isuda idi ti Gabaon, ken Cafira, ken Berot, ken Kiryat-jearim.

¹⁸ Ket dagiti annac ti Israel saanda a kinabil ida, agsipud ta dagiti pangpanguloen ti gimong insapatada cadacuada gapu ken Jehova, a Dios ti Israel. Ket isu-amin a gimong nagtanabutob idi a maibusor cadagiti pangpanguloen.

¹⁹ Ngem isu-amin dagiti pangpanguloen kinunada iti isu-amin a gimong, Dacami insapatami cadacuada a gapu ken Jehova, a Dios ti Israel: gapuna itatta ditay mabalin a sagiden ida.

²⁰ Daytoy ti aramidentayonto cadacuada, ket baybay-antayo ida nga agbiag: di la ket ta umay ti pungtot cadatayo, a gapu iti sapata nga insapatami cadacuada.

²¹ Ket dagiti pangpanguloen kinunada cadacuada, Agbiagda coma: ngem isuda dagiti agpucpucan iti sungrod ken agsacsacdo a maipaay iti amin a gimong, cas dagiti pangpanguloen insaoda idi cadacuada.

²² Ket ni Josue inayabanna ida, ket nagsao cadacuada, a cunana, Apayapay aya nga inallilawdacami, a kinunayo, Adayucami unay cadacayo: idinto a makipagtaengcayo cadacami?

²³ Gapuna ita mailunodcayo, ket dinto agcurang cadacayo ti adipen, agpada agpucan iti sungrod, ken agsacsacdo a maipaay iti balay ti Diosco.

²⁴ Ket isuda simmungbatda ken Josue, ket kinunada, Agsipud ta pudno a naibaga cadagiti adipenmo, no casano daydi a ni Jehova a Diosmo imbilinna idi ken ni Moises nga adipenna nga itedna cadacayo amin a daga, ken pucawenna amin dagiti agnaed iti daga iti sangoananyo; iti casta nagbutengcami unay cadacayo iti maipaay cadagiti biagmi ket inaramidmi daytoy a banag.

²⁵ Ket itatta, adtoy, addacami ita imam: cas iti pagarupemto coma a naimbag ken nalinteg a maaramid cadacami, aramidem.

²⁶ Ket inaramidna cadacuada a casta, ket incanawana ida iti ima dagiti annac ti Israel, tapno dida papatayen ida.

²⁷ Ket ni Josue pinagbalinna ida iti daydi nga aldaw nga agpucpucan iti sungrod ken agsacsacdo a maipaay iti gimong, ken maipaay iti altar ni Jehova inggana ita nga aldaw, iti disso nga isu pilienna idi.