Josue 8 - Ti Biblia (1973)

Ti panagsagana ti maicaddua a gubat a pangparmec iti Hai. Ti pannacadadael ti Hai. Ti panagsurat ken panagbasa iti linteg idiay Ebal.

¹ Ket ni Jehova kinunana ken Josue, Dica agbuteng, ken dica met agcullayaw: alaem a cumuyog kenca amin a tattao ti gubat ket tumacderca, sumangatca idiay Ai; kitaem, nga inyawatco ita imam ti ari ti Ai, ken dagiti tattaona, ken ti ilina, ken ti dagana:

² Ket aramidemto iti Ai ken iti arina ti cas inaramidmo iti Jerico ken iti arina: isuna laeng ti samsamna, ken dagiti an-animalna, ti alaemto a cayawyo: mangisaadca iti maysa a pagsaneban a maipaay iti ili iti licudanna.

³ Iti casta ni Josue timmacder, ken amin dagiti tattao ti gubat, a mapan sumang-at idiay Ai: ket ni Josue pimmili iti tallo ribu a tattao, tattao a mamaingel, ket imbaonna ida iti rabii.

⁴ Ket imbilinna cadacuada, a cunana, Adtoy, agsanebcayto a maibusor iti ili iti licudan ti ili; dicayo adayuan unay ti ili, no di ket sisasaganacayo amin:

⁵ Ket siac, ken amin dagiti tattao nga adda caniac, umadanicamto iti ili. Ket maaramidto, nga intono rumuarda a sumaranget cadacami, a cas idi immuna, nga agtaraycaminto manipud iti sangoananda;

⁶ Ket surotendacaminto, inggana iti mayadayumi ida manipud iti ili; ta cunadanto, nagtarayda iti sangotayo a cas idi immun-una: iti casta agtaraycaminto manipud iti sangoananda.

⁷ Ket tumacdercayto iti pagsaneban, ket alaenyonto ti ili: ta ni Jehova a Diosyo yawatnanto ita imayo.

⁸ Ket isunto, nga intono malasudanyo ti ili, puuranyonto ti ili; cas iti sao ni Jehova ti aramidenyonto: kitaenyo, Siac imbilinco cadacayo.

⁹ Ket ni Josue imbaonna ida: ket napanda iti pagsaneban, ket nagyanda iti nagbaetan ti Bet-el ken Ai, iti deppaar a laud ti Ai: ngem ni Josue nakipagnaed cadagiti tattao iti daydi a rabii.

¹⁰ Ket ni Josue bimmangon a nasapa iti bigat, ket inurnosna dagiti tattao, ket simmang-atda, isu ken dagiti lallacay ti Israel, iti sango dagiti tattao sadi Ai.

¹¹ Ket isu-amin dagiti tattao, a dagiti met laeng tattao ti gubat nga adda kencuana, simmang-atda, ket dimtengda, ket immayda iti sango ti ili, ket nagpacarsoda iti abay nga amianan ti Ai: ket adda lobong a nagbaetanda isu ken iti Ai.

¹² Ket nangala iti aglima a ribu a tattao, ket incabilna ida iti pagsaneban iti nagbaetan ti Bet-el ken Ai, iti deppaar a laud ti ili.

¹³ Iti casta insaadna dagiti tattao, a ti met laeng amin a buyot nga adda iti deppaar nga amianan ti ili, ken dagiti agsaneb addada iti bangir a laud ti ili; ket ni Josue napan iti daydi a rabii iti nagtengngaan ti lobong.

¹⁴ Ket naaramid idi a ti ari ti Ai isu nakitana, nagdardaras ket bimmangon a nasapa, ket dagiti tattao ti ili rimmuarda a nanggubat a maibusor iti Israel, isu ken dagiti isu-amin a tattaona, iti tiempo a natudingan, iti sangoanan ti Araba; ngem dina ammo nga adda maysa a pagsaneban a maibusor kencuana iti licudan ti ili.

¹⁵ Ket ni Josue ken amin nga Israel inaramidda ti cas la no maabacda iti sangoananda, ket nagtarayda iti dalan nga agpalet-ang.

¹⁶ Ket isu-amin dagiti tattao nga adda iti ili naayabanda a naummong a cumamat cadacuada; ket sinurotda ni Josue, ket nairuarda iti ili.

¹⁷ Ket awan ti nabati a lalaki idiay Ai wenno idiay Beth-el, a saan a napan kimmamat iti Israel: ket pinanawanda ti ili a silulucat, ket kinamatda ti Israel.

¹⁸ Ket ni Jehova kinunana ken Josue. Itayagmo ta gayang nga adda ita imam a iturongmo iti Ai; ta isu yawatconto ita imam. Ket ni Josue intayagna di gayang nga adda idi imana a maiturong iti ili.

¹⁹ Ket dagiti agsaneb timmacderda a nasingdat iti yanda, ken nagdarisonda idi apaman nga intayagna di imana, ket sinerrecda di ili ket innalada: ket nagsiglatda, ket pinuuranda di ili.

²⁰ Ket idi a dagiti tattao ti Ai timmalliawda iti licudanda, kimmitada, ket, adtoy, a ti asoc ti ili nagpangato idi nga agpalangit, ket awan ti pannacabalinda nga agtalaw itoy a dalan wenno idiay a dalan; ket dagiti tattao a nagtalawda idi a nagpalet-ang simmangoda cadagidi agcamcamat.

²¹ Ket idi a ni Josue ken isu-amin nga Israel nakitada a dagiti agsaneb naaladan ti ili ken di asoc ti ili nagpangato idi, iti casta nagsublida manen, ket pinapatayda dagiti tattao ti Ai.

²² Ket dagiti dadduma rimmuarda iti ili a bumosor cadacuada; iti casta nga addada idi iti tengnga ti Israel, dagiti dadduma itoy a sikigan, ket dagiti dadduma idiay a sikigan: ket kinabilda ida, iti casta nga awan ti tiniddada cadacuada wenno nacatalaw.

²³ Ket ti ari ti Ai innalada a sibibiag ket isu inyegda ken Josue.

²⁴ Ket naaramid, idi a ti Israel nalpasnan ti panagpapatayna cadagiti isu-amin a naed ti Ai iti away, iti let-ang a nagsurotanda cadacuada, ket napasagda amin iti tadem ti campilan, inggana iti napucawda, ket iti casta nga isu-amin nga Israel nagsublida iti Ai ket isu kinabilda iti tadem ti campilan.

²⁵ Ket ti dagup ti napasag iti daydi nga aldaw, lallaki ken babbai, sangapulo ket dua a ribu, nga amin met laeng a tattao ti Ai.

²⁶ Ta ni Josue dina binaw-ing di imana isu a pinangitayagna idi gayang, inggana iti napucawna a natalipupus amin dagiti tattao ti Ai.

²⁷ Dagiti laeng an-animal ken dagiti sinamsam ti ili ti innala ti Israel a kinayawan a maipaay cadacuada, a mayalubog iti sao ni Jehova, nga imbilinna ken Josue.

²⁸ Iti casta ni Josue pinuuranna ti Ai, ket isu inaramidna a maysa a gabsuon nga agnanayon, maysa a kinawalangwalang met laeng, inggana ita nga aldaw.

²⁹ Ket binitayna ti ari ti Ai aginggana iti rumabii: ket idi a ti init bumaba ni Josue nagbilin, ket imbabada di bangcayna idi cayo, ket isu impalladawda iti ruangan ti ili, ket ginaburanda iti dackel a gabsuon dagiti batbato, aginggana ita nga aldaw.

³⁰ Idin ni Josue nangbangon iti altar ken Jehova, a Dios ti Israel, idiay bantay Ebal,

³¹ Cas ni Moises nga adipen ni Jehova imbilinna cadagiti annac ti Israel, cas naisurat iti libro ti linteg ni Moises, maysa nga altar a batbato a di natagaan, nga iti rabawda awan ti siasinoman a tao a nangingato iti landoc: ket kencuana nangidatonda ken Jehova cadagiti datdaton a mapuuran, ken nangirucbabda cadagiti datdaton ti cappia.

³² Ket idiay insuratna iti rabaw dagiti batbato ti maysa a copia ti linteg ni Moises, isu nga insuratna iti imatang dagiti annac ti Israel.

³³ Ket isu-amin nga Israel, ken dagiti lallacayda ken dagiti agturturay ken dagiti oc-ocomda, nagtacderda iti daytoy a sikigan ti lacasa ken iti dayta a sikigan iti sangoanan dagiti papadi a Levitas, a nangawit idi lacasa ti tulag ni Jehova, no casano cadagiti gangannaet casta met cadagiti umili; iti cagudduada iti sango ti bantay Gerizim, ket ti caguddua iti sango ti bantay Ebal; cas ni Moises nga adipen ni Jehova imbilinna idi unana, tapno bendicionanda coma dagiti tattao ti Israel.

³⁴ Ket sana insaganad nga imbasa dagiti isu-amin a sasao ti linteg, ti bendicion ken ti lunod, cas mayalubog iti amin nga adda a maisurat iti libro ti linteg.

³⁵ Awan idi ti sao cadagiti amin nga imbilin ni Moises a di-imbasa ni Josue iti sango ti isu-amin a gimong ti Israel, cadagiti babbai ken ububbing, ken cadagiti gangannaet nga adda cadacuada idi.