Josue 6 - Ti Biblia (1973)

Ti pannacalawlaw ken pannacadadael ti Jerico.

¹ Ti Jerico napunitan a naimbag a gapu cadagiti annac ti Israel: awan a pulos ti macaruar ket awan met ti macastrec.

² Ket ni Jehova kinunana ken Josue, Kitaem, inyawatco ita imam ti Jerico, ken iti arina, ken dagiti tattao a maingel.

³ Ket lawlawemto ti ili, amin dagiti tattao ti gubat, lawlawenyonto iti maminsan ti ili. Casta ti aramidemto cadagiti innem nga al-aldaw.

⁴ Ket pito a papadi mangicuyogdanto cadagiti pito a tangtangguyob a sara ti carcarnero a lallaki iti sango ti lacasa: ket iti maicapito nga aldaw lawlawenyonto ti ili iti maminpito a dardaras, ket dagiti papadi paguniendanto dagiti tangtangguyob.

⁵ Ket isunto, nga, intono pagtimkenda a napaut ti tangguyob a sara ti carnero a lalaki, ken intono mangegyo ti timec ti tangguyob, isu-amin a tattao agriawdanto iti natbag nga ariwawa; ket ti bacud ti ili margaayto a mairipap, ket dagiti tattao sumang-atdanto tunggal maysa a sililinteg iti sangoananna.

⁶ Ket ni Josue nga anac ni Nun inayabanna dagiti papadi, ket kinunana cadacuada, Alaenyo ti lacasa ti tulag, ket pito a papadi mangicuyogda coma cadagiti pito a tangtangguyob a sara ti carcarnero a lallaki iti sangoanan ti lacasa ni Jehova.

⁷ Ket isuda kinunada cadagiti tattao, Magnacayo, ket lawlawenyo ti ciudad, ket dagiti siiigam a tattao magnada coma iti sangoanan ti lacasa ni Jehova.

⁸ Ket idi a casta, nga, idi a ni Josue nagsao cadagiti tattao, dagiti pito a papadi a siiggem cadagiti pito a tangtangguyob a sara dagiti carcarnero a lallaki nagnada iti sangoanan ni Jehova, ket pagpagunienda dagiti tangtangguyob: ket ti lacasa ti tulag ni Jehova sinurotna ida.

⁹ Ket dagiti siiigam a tattao napanda iti sangoanan dagiti papadi nga agpagpaguni idi cadagiti tangtangguyob, ket dagiti buybuyot simmurotda idi lacasa, dagiti sacerdote pagpagunienda dagiti tangguyob idi a magmagnada.

¹⁰ Ket ni Josue binilinna dagiti tattao, a kinunana, Dicayto agririaw, saan coma a mangngeg ti timecyo, saanto a sumngaw ti uray ania a sao dita ngiwatyo, aginggana iti aldaw a panangibagac cadacayo nga agriawcayo; isunto ti panagriawyon.

¹¹ Iti casta pinailawlawna di lacasa ni Jehova iti ili, a linicmutda iti naminsan: ket napanda iti pacarso ket nagtaengda iti pacarso.

¹² Ket ni Josue bimmangon a nasapa unay iti bigat, ket dagidi papadi binagcatda di lacasa ni Jehova.

¹³ Ket dagiti pito a papadi a siiggem cadagiti pito a tangguyob a sara ti carcarnero a lallaki iti sangoanan ti lacasa ni Jehova napanda a cancanayon, ket pinagtimecda dagiti tangguyob: ket dagiti siiigam a tattao napanda iti sangoananda; ket dagiti buybuyot simmurotda iti lacasa ni Jehova, a dagiti papadi pagtimtimkenda dagiti tangguyobda idi a magmagnada.

¹⁴ Ket iti maicadua nga aldaw linawlawda ti ili iti naminsan, ket nagsublida iti pacarso: casta ti inaramidda iti innem nga aldaw.

¹⁵ Ket naaramid iti maicapito nga aldaw, a bimmangonda a nasapa unay iti parbangon, ket linawlawda di ili iti casdi met laeng iti naminpito a daras: daydi laeng nga aldaw ti pananglawlawda iti ili cadagiti naminpito a daras.

¹⁶ Ket naaramid idi maicapito a daras, idi a dagiti papadi pinagunida dagiti tangguyobda, a ni Josue kinunana cadagiti tattao, Agriawcayo; ta ni Jehova intedna cadacayo ti ili.

¹⁷ Ket ti ili maipaayto, isu met laeng ken dagiti isu-amin nga adda iti unegna, ken ni Jehova; ni laeng Raab a balangcantis ti agbiagto, isu ken isu-amin nga adda a cadduana iti balay, agsipud ta inlemmengna dagiti babaonen nga imbaontayo.

¹⁸ Ngem dacayo, isuna laeng a liclicanyo ti banag a naipaay, di la ket ta idi nga impaayyo, no mangalacayo iti naipaay; iti casta aramidenyo a mailunod ti pacarso ti Israel, ket isu ti riribukenyo.

¹⁹ Ngem isu-amin a pirac ken balitoc, ken al-alicamen a suer ken landoc nasantoandanto ken Jehova: maiyegdanto iti paggamengan ni Jehova.

²⁰ Iti casta dagiti tattao nagpuccawda, ket dagiti papadi pinagunida dagiti tangguyobda: ket naaramid, idi a dagiti tattao nangegda di aweng di tangguyob, a dagiti tattao nagriawda iti natbag nga ariwawa, ket di bacud nargaay a nasimpa, iti casta dagiti tattao simrecda iti ili, tunggal tao a nanglinteg iti sangona, ket innalada di ili.

²¹ Ket pinatayda nga inkisap amin nga adda iti uneg ti ili, lalaki man ken babai agpadpada, ubing man ken lacay agpadpada, ken vaca, ken carnero, ken asno, iti tadem ti campilan.

²² Ket ni Josue kinunana cadagiti dua a tattao a nagsiim iti daga, Sumreccayo iti balay ti babai a balangcantis, ket iruaryo ditoy ti babai, ken isu-amin a cucuana, a cas insapatayo kencuana.

²³ Ket dagiti agtutubo a lallaki a nagsiim simrecda, ket inruarda ni Raab, ken ni amana, ken ni inana, ken dagiti cacabsatna, ken isu-amin a cucuana; isu-amin a cacabagianna casta met nga inruarda; ket incabilda ida iti ruar ti pacarso ti Israel.

²⁴ Ket pinuuranda di ili iti apuy, ken isu-amin nga adda kencuana; ti laeng pirac, ken balitoc, ken dagiti al-alicamen a suer ken landoc, ti indulinda iti paggamengan ti balay ni Jehova.

²⁵ Ngem ni Raab a balangcantis, ken dagiti cabbalay ni amana, ken amin a cucuana, isuda laeng ti nabiag nga inispal ni Josue; ket ni Raab nagnaed iti tengnga ti Israel inggana ita nga aldaw, ta inlemmengna dagidi babaonen nga ni Josue imbaonna idi a mangsiim iti Jerico.

²⁶ Ket ni Josue incumitna cadacuada ti maysa a sapata iti daydi a tiempo, a kinunana, Mailunod ti tao iti saclang ni Jehova, ti tumacder ken mangbangon itoy ili a Jerico: ti mangicabilto iti cimientona matayto ti anacna nga inauna, ket ti mangicabilto cadagiti ruruanganna matayto ti anacna nga inaudi.

²⁷ Iti casta, ni Jehova adda idi ken ni Josue; ket ti damagna naisacnap iti isu-amin a daga.