Josue 4 - Ti Biblia (1973)

Dagiti batbato a pacalaglagipan naalada iti Jordan ket naipatacderda idiay Gilgal.

¹ Ket naaramid, nga idi nga amin ti nacion nalpasda a nagballasiw ti Jordan, a ni Jehova nagsao ken ni Josue, a kinunana,

² Mangalacayo iti sangapulo ket dua a tattao iti umili, iti tunggal caputotan maysa a tao,

³ Ket ibilinyo cadacuada, a cunayo, Mangalacayo manipud iti tengnga ti Jordan, iti lugar a nagtacderan a siiintec dagiti sacsaca dagiti papadi, iti sangapulo ket dua a batbato, ket icuyogyo ida cadacayo ket idissoyo ida, iti pagdagusanyo isu a pagdagusanyonto itoy a rabii.

⁴ Idin ni Josue inayabanna dagiti sangapulo ket dua a tattao nga insaganana cadagiti annac ti Israel, iti tunggal caputotan maysa a tao:

⁵ Ket ni Josue kinunana cadacuada, Magnacayo iti sangoanan ti lacasa ni Jehova a Diosyo iti tengnga ti Jordan, ket tunggal tao cadacayo mangibaclay coma iti maysa a bato, a cas mayalubog iti bilang dagiti caputotan dagiti annac ti Israel;

⁶ Tapno daytoy isu coma ti maysa a pagilasinan cadacayo, nga intono dagiti annacyo agsalsaludsudda iti mapasungad a tiempo, a cunaenda, Ania aya ti pangipapananyo cadagitoy a batbato?

⁷ Iti casta cunayonto cadacuada, Agsipud ta dagiti dandanum ti Jordan nagbisngayda iti sangoanan ti lacasa ti tulag ni Jehova; idi naiballasiw idiay Jordan, dagiti dandanum ti Jordan nagbisngayda: ket dagitoy a batbato isudanto ti pacalaglagipan cadagiti annac ti Israel iti agnanayon.

⁸ Ket dagiti annac ti Israel inaramidda a casta cas imbilin ni Josue, ket nangalada iti sangapulo ket dua a batbato iti tengnga ti Jordan, cas ni Jehova sinaona ken ni Josue, cas iti bilang dagiti caputotan dagiti annac ti Israel; ket intogotda ida iti nagdagusanda, ket indissoda ida sadiay.

⁹ Ket ni Josue nangicabil iti sangapulo ket dua a batbato iti tengnga ti Jordan iti disso a nagtacderan dagiti sacsaca dagiti papadi a nangawit idi lacasa ti tulag: ket addada idiay agingga itoy nga aldaw.

¹⁰ Ta dagiti papadi a nangawit idi lacasa nagtacderda iti tengnga ti Jordan, aginggana iti naturpos amin a banag a ni Jehova imbilinna ken Josue a saoenna cadagiti tattao, cas mayalubog cadagiti isu-amin a ni Moises imbilinna idi ken ni Josue: ket dagiti tattao nagdarasda ket nagballasiwda.

¹¹ Ket naaramid, nga idi amin dagiti tattao nalpasdan ti nagballasiw, a di lacasa ni Jehova naiballasiw, ken dagiti papadi, iti saclang dagiti tattao.

¹² Ket dagiti annac ni Ruben, ken dagiti annac ni Gad, ken ti cagudua ti caputotan ni Manases nagballasiwda a siiigam iti sangoanan dagiti annac ti Israel, cas ni Moises imbagana cadacuada:

¹³ Aguppat a pulo a ribu dagiti nasagana a siiigam a makigubat nagballasiwda iti sango ni Jehova a napan iti pagbabacalan, cadagiti tay-ac ti Jerico.

¹⁴ Iti daydi nga aldaw ni Jehova intan-ocna ni Josue iti imatang ti isu-amin nga Israel; ket nagbutengda kencuana a cas iti panagbutengda ken Moises iti amin nga al-aldaw ti panagbiagna.

¹⁵ Ket ni Jehova nagsao ken Josue, a kinunana,

¹⁶ Bilinem dagiti papadi nga agawit iti lacasa ti tulag, a sumang-atda iti Jordan.

¹⁷ Ni Josue ngarud binilinna dagiti papadi, a kinunana, Sumang-atcayo iti Jordan.

¹⁸ Ket naaramid, nga idi a dagiti papadi a nangawit idi lacasa ti tulag ni Jehova simmang-atda nanipud iti tengnga ti Jordan, ket dagiti dapdapan dagiti sacsaca dagiti papadi naitacdangdan iti namaga a daga, a dagiti dandanum ti Jordan nagsublida iti lugarda, ket naglippiasda cadagiti isu-amin a tepteppangna a cas met la idi casisigudna.

¹⁹ Ket dagiti tattao simmang-atda idiay Jordan iti maicasangapulo nga aldaw ti umuna a bulan, ket nagpacarsoda idiay Gilgal, iti beddeng a daya ti Jerico.

²⁰ Ket dagidi sangapulo ket dua a batbato, nga innalada idiay Jordan, ni Josue insaadna ida idiay Gilgal.

²¹ Ket nagsao cadagiti annac ti Israel, a kinunana, Intono dagiti annacyo saludsodendanto cadagiti ammada iti mapasungad a tiempo, a cunaenda, Ania ti caipapananda dagitoy a batbato?

²² Isu ti panangipacaammoyonton coma cadagiti annacyo, a cunaenyo, Ti Israel nagballasiw ditoy Jordan iti namaga a daga.

²³ Ta ni Jehova a Diosyo pinagmagana dagiti dandanum ti Jordan nanipud iti sangoyo, inggana iti nacaballasiwcayo, cas ni Jehova a Diosyo inaramidna iti Baybay a Nalabaga, isu a pingmagana iti sangoananmi, inggana idi nacaballasiwcami,

²⁴ Tapno isu-amin a tattao ditoy lubong maammoanda coma ti ima ni Jehova, nga isu mannacabalin: tapno agbutengcayo coma ken Jehova a Diosyo iti agnanayon.