Josue 3 - Ti Biblia (1973)

Ti ornos a maipapan iti panangballasiw iti Jordan. Dagiti tattao agballasiwda iti Jordan.

¹ Ket ni Josue bimmangon a nasapa iti bigat; ket immalisda nanipud Settim, ket immayda aginggana iti Jordan, isu, ken amin dagiti annac ti Israel; ket nagyanda sadiay iti sacbay ti ibaballasiwda.

² Ket naaramid idi calpasan dagiti tallo nga al-aldaw, a dagiti agturturay naglasatda idi iti nagtengngaan ti pacarso;

³ Ket nagbilinda cadagiti tattao, a cunada, Intono makitayo coma ti lacasa ti tulag ni Jehova a Diosyo, ken dagiti papadi a dagiti Levitas a sia-awit kencuana, dacayo pumanawcayto iti yanyo, ket sumurotcayo kencuana.

⁴ Ngem addanto pagbaetan isu ken cadacayo a cas iti rucod ti dua ribu a casico: dicayto dumenna kencuana: tapno maammoanyo coma ti dalan isu nga papananyo: agsipud ta dacayo dicay pay la naglasatan idi daytoy a dalan.

⁵ Ket ni Josue kinunana cadagiti tattao: Santificarenyo dagiti bagbagiyo, ta intono bigat ni Jehova agaramidto cadagiti datdatlag iti tengngayo.

⁶ Ket ni Josue nagsao cadagiti papadi, a cunana, Alaenyo ti lacasa ti tulag, ket agballasiwcayo nga umununa ngem cadagiti tattao. Ket isuda innalada ti lacasa ti tulag, ket napanda idi una ti umili.

⁷ Ket ni Jehova kinunana ken ni Josue, Ita nga aldaw rugiancanto nga itan-oc iti imatang ti amin nga Israel, tapno maammoanda coma, a cas ti caaddac idi ken ni Moises, castanto ti caaddac kenca.

⁸ Ket ibilinmonto cadagiti papadi a mangawit iti lacasa ti tulag, a cunaem, Intono macaaycayo iti igid dagiti dandanum ti Jordan, agtacdercayto a sitatalna iti Jordan.

⁹ Ket ni Josue kinunana cadagiti annac ti Israel, Umaycayo ditoy, ket imdenganyo dagiti sasao ni Jehova a Diosyo.

¹⁰ Ket ni Josue kinunana, Ditoy maammoanyonto a ti Dios a sibibiag adda iti nagtengngaanyo, ket isu pacsiatennanto a di bumurong iti sangoyo ti Cananeo, ken ti Heteo, ken ti Heveo, ken ti Perezeo, ken ti Gergeseo, ken ti Amorreo, ken ti Jebuseo.

¹¹ Adtoy, ti lacasa ti tulag ti Apo iti isu-amin a lubong agballasiw iti Jordan iti sangoananyo.

¹² Gapuna a mangalacayo iti sangapulo ket dua a tattao cadagiti capcaputotan ti Israel, iti tumunggal caputotan maysa a tao.

¹³ Ket maaramidto, a intono dagiti dapdapan dagiti sacsaca dagiti papadi a mangawit iti lacasa ni Jehova nga Apo iti isu-amin a lubong, maisaaddanto cadagiti dandanum ti Jordan, a dagiti dandanum ti Jordan agbingaydanto, dagiti met laeng dandanum a sumalog manipud surong; ket agintecdanto iti sangcagabsuon.

¹⁴ Ket naaramid nga idi a dagiti tattao pimmanawda nanipud cadagiti toltoldada, tapno agballasiwda iti Jordan, dagiti papadi a nagawit iti lacasa ti tulag addada iti sangoanan dagiti tattao;

¹⁵ Ket idi a dagidi a nagawit idi lacasa simmalugda iti Jordan, ken dagiti sacsaca dagiti papadi a nagawit idi lacasa naitanebda idi igid ti danum (ta ti Jordan aglippias iti amin a tepteppangna iti amin a tiempo ti panagani,)

¹⁶ A dagiti dandanum a sumalog idi nga aggapu iti surong nagsardengda; ket timmacderda ket nagpangatoda a maysa a gabsuon, iti adayu idiay Adam, nga ili nga adda iti abay ti Sartan; ket dagidiay a nagsalog a nagturong iti baybay ti Araba, iti Baybay ti Asin met laeng, naibusdan amin, ket dagiti tattao nagballasiwda idi iti batog ti Jerico.

¹⁷ Ket dagiti papadi a nangawit idi lacasa ti tulag ni Jehova nagtacderda a siiintec iti daga a namaga iti tengnga ti Jordan; ket isu-amin nga Israel nagballasiwda iti daga a namaga, agingga iti amin ti nacion nalpasda a nagballasiw iti Jordan.