Josue 21 - Ti Biblia (1973)

Dagiti il-ili a naited cadagiti Levitas.

¹ Idin dagiti pangpangolo dagiti balbalay dagiti amma dagiti Levitas immadanida cada Eleazar a padi, ken ni Josue nga anac ni Nun, ken cadagiti pangpangolo dagiti balbalay dagiti amma dagiti capcaputotan dagiti annac ti Israel;

² Ket nagsaoda cadacuada idiay Silo idiay daga ti Canaan, a kinunada, Ni Jehova imbilinna iti pannacaaramat ni Moises a maited cadacami dagiti il-ili a pagtaengan, agraman cabangibangda a maipaay cadagiti an-animalmi.

³ Ket dagiti annac ti Israel nangtedda cadagiti Levitas cadagiti cucuada, cas iti bilin ni Jehova, dagitoy nga il-ili agraman cabangibangda.

⁴ Ket ti gasat rimmuar nga agpaay cadagiti famfamilia dagiti Coathitas: ket dagiti annac ni Aaron a padi a nagtaud cadagiti Levitas, adda gasatda a naggapu iti caputotan ni Juda, naggapu iti caputotan ni Simeon, ken naggapu iti caputotan ni Benjamin, a sangapulo ket tallo nga il-ili.

⁵ Ket ti matda cadagiti annac ni Coat adda gasatda a naggapu cadagiti famfamilia ti caputotan ni Efraim, ken iti caputotan ni Dan, ken iti caguddua ti caputotan ni Manases, a sangapulo nga il-ili.

⁶ Ket dagiti annac ni Gerson adda gasatda a naggapu iti caputotan ni Issachar ken iti caputotan ni Aser, ken iti caputotan ni Nephtali, ken iti caguddua ti caputotan ni Manases idiay Basan, a sangapulo ket tallo nga il-ili.

⁷ Dagiti annac ni Merari a cas mayalubog cadagiti famfamiliada adda naggapu iti caputotan ni Ruben, ken naggapu iti caputotan ni Gad, ken naggapu iti caputotan ni Zabulon, a sangapulo ket dua nga il-ili.

⁸ Ket dagiti annac ti Israel intedda a ginnasat cadagiti Levitas dagitoy nga il-ili agraman cabangibangda, cas ni Jehova imbilinna iti pannacaaramat ni Moises.

⁹ Ket intedda a naggapu iti caputotan dagiti annac ni Juda, ken iti caputotan dagiti annac ni Simeon, dagitoy nga il-ili a nainaganan ditoy:

¹⁰ Ket isuda nagpaayda cadagiti annac ni Aaron, cadagiti famfamilia ni Coat, a nagtaudda cadagiti annac ni Levi; agpaay a cucuada idi ti immuna a gasat.

¹¹ Ket isuda intedda cadacuada ti Kiryat arba, ni Arbe nga isu idi ti ama ni Enac (nga isu met laeng ti Hebron), idiay caturodan ti Juda, agraman cabangibangna iti aglicmut kencuana.

¹² Ngem dagiti aw-away ti ili, ken dagiti purpurocna, intedda idi ken Caleb nga anac ni Jefone a maipaay a cucuana.

¹³ Ket cadagiti annac ni Aaron a padi intedda ti Hebron agraman cabangibangna nga ili a pagcamangan nga agpaay iti macapapatay, ken ti Lebna agraman cabangibangna,

¹⁴ Ken ti Jattir agraman cabangibangna, ti Estemoa agraman cabangibangna,

¹⁵ Ken ti Helon agraman cabangibangna, ken Debir agraman cabangibangna,

¹⁶ Ken Ain agraman cabangibangna, ken Jutta agraman cabangibangna, ken Beth-semes agraman cabangibangna; siam nga il-ili ti naggapu cadagidiay dua a caputotan.

¹⁷ Ket naggapu iti caputotan ni Benjamin, ti Gabaon agraman cabangibangna, ti Geba agraman cabangibangna,

¹⁸ Ti Anatot agraman cabangibangna, ti Almon agraman cabangibangna; uppat nga il-ili.

¹⁹ Isu-amin dagiti il-ili dagiti annac ni Aaron a dagiti papadi, sangapuloda ket tallo nga il-ili agraman cabangibangda.

²⁰ Ket dagiti famfamilia dagiti annac ni Coat, a Levitas, dagidiay a natda met laeng cadagiti annac ni Coat, tinagicuada dagiti il-ili ti gasatda a naggapu iti caputotan ni Efraim.

²¹ Ket intedda cadacuada ti Sichem agraman cabangibangna idiay caturodan ti Efraim, nga ili a pagcamangan agpaay iti macapapatay, ken ti Geser agraman cabangibangna,

²² Ken ti Kibsaim agraman cabangibangna, ken ti Beth-oron agraman cabangibangna; uppat nga il-ili.

²³ Ket naggapu iti caputotan ni Dan, ti Eltheco agraman cabangibangna, ti Gibethon agraman cabangibangna,

²⁴ Ti Ayalon agraman cabangibangna, ti Gat-rimmon agraman cabangibangna; uppat nga il-ili.

²⁵ Ket naggapu iti caguddua ti caputotan ni Manases, ti Taanach agraman cabangibangna, ken ti Gat-rimmon agraman cabangibangna: dua nga il-ili.

²⁶ Isu-amin dagiti il-ili dagiti famfamilia ti natda cadagiti annac ni Coat isuda sangapuloda agraman cabangibangda.

²⁷ Ket cadagiti annac ni Gerson, cadagiti famfamilia dagiti Levitas, naggapu iti caguddua ti caputotan ni Manases, intedda ti Golan idiay Basan agraman cabangibangna a ili a pagcamangan nga agpaay iti macapapatay, ken ti Borsa agraman cabangibangna; dua nga ili.

²⁸ Ket naggapu iti caputotan ni Issachar, ti Cesion agraman cabangibangna, ti Dabereth agraman cabangibangna,

²⁹ Ti Jaramuth agraman cabangibangna, ti Engannim agraman cabangibangna; uppat nga il-ili.

³⁰ Ket naggapu iti caputotan ni Aser ti Miseal agraman cabangibangna, ti Abdon agraman cabangibangna,

³¹ Ti Helchath agraman cabangibangna, ken ti Rohob agraman cabangibangna; uppat nga il-ili.

³² Ket naggapu iti caputotan ni Nephtali, ti Cedes idiay Galilea agraman cabangibangna, nga ili a pagcamangan nga agpaay iti macapapatay, ken ti Hammoth-dor agraman cabangibangna, ken ti Cartan agraman cabangibangna; tallo nga il-ili.

³³ Isu-amin dagiti il-ili dagiti Gersonitas cas mayalubog cadagiti famfamiliada sangapuloda ket tallo idi nga il-ili agraman cabangibangda.

³⁴ Ket cadagiti famfamilia dagiti annac ni Merari, a natda cadagiti Levitas, naggapu iti caputotan ni Zabulon, ti Jocneam agraman cabangibangna, ken Cartha agraman cabangibangna,

³⁵ Ti Dimna agraman cabangibangna, Naalal agraman cabangibangna; uppat nga il-ili.

³⁶ Ket naggapu iti caputotan ni Ruben, ti Beser agraman cabangibangna, ken Jasa agraman cabangibangna,

³⁷ Ti Cedemot agraman cabangibangna, ken Mefaat agraman cabangibangna; uppat nga il-ili.

³⁸ Ket naggapu iti caputotan ni Gad, ti Ramot idiay Galaad agraman cabangibangna, iti ili a pagcamangan nga agpaay iti macapapatay, ken ti Mahanaim agraman cabangibangna,

³⁹ Ti Hesbon agraman cabangibangna, ken Jacer agraman cabangibangna: uppat nga il-ili ti dagupda.

⁴⁰ Amin dagitoy isuda idi dagiti il-ili dagiti annac ni Merari a cas mayannurot cadagiti famfamiliada, a natda met laeng cadagiti famfamilia dagiti Levitas; ket ti gasatda ti sangapulo ket dua nga il-ili.

⁴¹ Amin dagiti il-ili dagiti Levitas iti nagtengngaan dagiti cucua dagiti annac ti Israel uppat a puloda ket walo nga il-ili agraman cabangibangda.

⁴² Dagitoy nga il-ili naaddaan ti tunggal maysa cadagiti cabangibangna nga aglicmut cadacuada: castoy idi cadagitoy amin nga il-ili.

⁴³ Iti casta ni Jehova intedna iti Israel ti isu-amin a daga nga insapatana idi nga itdenna cadagiti ammada; ket isu tinagicuada, ket nagnaedda kencuana.

⁴⁴ Ket ni Jehova intedna idi ti talna cadacuada iti aglicmut, a mayalubog iti isu-amin nga insapatana idi cadagiti ammada: ket awan cadagiti isu-amin a cabusorda ti nagtacder iti sangoananda, ni Jehova inyawatna cadagiti im-imada dagiti isu-amin a cabusorda.

⁴⁵ Awan a pulos idi ti nagcurang ti uray ania a naimbag nga insao ni Jehova iti balay ti Israel; isu-amin natungpal idi.