Josue 20 - Ti Biblia (1973)

Ti pannacaituding dagiti il-ili a pagcamangan.

¹ Ket ni Jehova nagsao ken Josue, a kinunana,

² Agsaoca cadagiti annac ti Israel, a cunam, Mangtudingcayo cadagiti il-ili a pagcamangan, isuda nga insaoc idi cadacayo a naaramat ni Moises.

³ Tapno ti macapapatay iti siasinoman a tao a dina napuotan ket dina ginagara agtarayto coma sadiay: ket isudanto cadacayo ti pagcamangan a gapu ken bumales iti dara.

⁴ Ket daydiay agtarayto iti maysa cadagidiay nga ili, ket agtacderto iti pagsercan ti ruangan ti ili, ket ipalawagnanto ti panggepna cadagiti lapayag dagiti lallacay ti daydiay nga ili; ket isuda awatendanto cadacuada iti uneg ti ili, ket iteddanto kencuana ti maysa a disso, a pakinaedanna cadacuada.

⁵ Ket no ti bumales iti dara, isu camatenna, didanto ngarud yawat ti nacapapatay iti imana; agsipud ta kinabilna ti carrubana a dina ginagara, isu a dina ginura idi unana a tiempo.

⁶ Ket agnaedto idiay nga ili, inggana iti tumacderto iti pangocoman iti saclang ti gimong, inggana iti ipapatay ti nangato a padi nga addanto cadagidiay nga al-aldaw: isu ti isusublinton ti nacapapatay, ket umayto iti ilina met laeng, ken iti balayna, iti ili a nagpanawanna idi.

⁷ Ket isuda dinutocanda ti Cades sadi Galilea idiay caturodan ti Neftali, ken ti Siquem idiay caturodan ti Efraim, ken ti Kiryat-arba (nga isu met la ti Hebron) idiay caturodan ti Juda.

⁸ Ket iti ballasiw ti Jordan idiay Jerico nga agpadaya, tinudinganda ti Beser idiay let-ang idiay tanap nga aggapu iti caputotan ni Ruben, ken ti Ramot idiay Galaad nga aggapu iti caputotan ni Gad, ken ti Golan idiay Basan nga aggapu iti caputotan ni Manases.

⁹ Dagitoy isuda dagiti il-ili a natudingan nga agpaay cadagiti isu-amin nga annac ti Israel, ken iti gangannaet a makinaed cadacuada, tapno ti uray siasino a macapapatay iti tao a dina napuotan mabalinna ti agtaray sadiay ket saan a matay iti ima ti bumales iti dara, agingga iti tumacder iti saclang ti gimong.