Josue 2 - Ti Biblia (1973)

Dagiti agsimisim maibaonda idiay Jerico; idinto a mabirucda, mailemmengda ken Rahab ken mapagawidda.

¹ Ket ni Josue nga anac ni Nun imbaonna manipud Settim dagiti dua nga agsiim iti nalimed unay, a kinunana cadacuada, Incayo, imatanganyo ti daga, ken ti Jerico. Isuda napanda, ket simrecda iti balay ti maysa a babai a balangcantis a managan Raab, ket nagdagusda sadiay.

² Ket naidamag idi iti ari ti Jerico, a nacuna, Adtoy, ita a rabii dagiti tattao cadagiti annac ti Israel immayda ditoy a mangsiim iti daga.

³ Ket idin ti ari ti Jerico nagbaon ken ni Raab, a kinunana, Iruarmo dagiti tattao nga immay kenca, ket simrecda iti balaymo; ta immayda a mangsiim iti isu-amin a daga.

⁴ Ngem di babai innalana dagidi dua a tattao, ket inlemmengna ida; ket kinunana, Wen, dagiti tattao immayda caniac: ngem saanco a naammoan no taga anoda.

⁵ Ket naaramid a idi umadani ti pannacairikep ti ruangan, idi nasipngeten, dagidi a tattao rimmuarda; ket diac ammo no sadino ti napananda; surutenyo ida iti madaras, ta abutenyo ida.

⁶ Ngem isu pinaulina ida iti pangatepan, ket inlemmengna ida cadagiti puon ti lino nga inurnosna iti rabaw ti pangatepan.

⁷ Ket dagiti tattao kinamatda ida iti dalan nga agturong iti Jordan agingga cadagiti pagballasiwan: ket apaman a dagidiay nagcamat cadacuada nacaruarda, rinpcanda di ruangan.

⁸ Ket idi dida pay nagidda, isu immuli a napan cadacuada iti rabaw ti pangatepan;

⁹ Ket kinunana cadagiti tattao, siac ammoc a ni Jehova intedna cadacayo daytoy a daga, ket dacami mabutengcami a gapu cadacayo: ket dagiti amin nga agnaed iti daga agrunawda iti sangoyo.

¹⁰ Ta nangngegmi a ni Jehova pinagmagana dagiti danum ti Baybay a Nalabaga iti sangoananyo, idi a rimmuarcayo sadi Egipto; ken daydi inaramidyo cadagiti dua nga ar-ari dagiti Amorreos, a nagyanda idi iti ballasiw ti Jordan, da Seon ken Og, isuda a pinapatayyo a tinalipupus.

¹¹ Idinto a nangegmi daydi nagrunaw ti pusomi, awanen ti natda nga ingel iti uray maysa, a gapu cadacaya. Ta ni Jehova a Diosyo, isu ti Dios idiay ngato sadi langit, ken iti baba ditoy daga.

¹² Agdawatac ngarud cadacayo itatta, a pagsapataandac gapu ken ni Jehova, nga cas iti panangngaasic cadacayo, casta met ti aramidenyo iti balay ni amac, ket iccandac iti napudno a tanda;

¹³ Ket biagenyonto ni amac ken ni inac, ken dagiti cacabsatco a lallaki ken babbai, ken amin daydiay a cucuada, ket ispalenyonto dagiti bibiagmi iti patay.

¹⁴ Ket dagiti tattao kinunada kencuana, Ti biagmi maipaay iti biagmo, no dicay ipalgac coma daytoy a panggepmi; ket isunto, nga intono ni Jehova itedna cadacami daytoy a daga, agaramidcaminto kenca a sicacaasi ken sipupudno.

¹⁵ Idin isu pinaulogna ida iti maysa a tali iti tawa: ta ti balayna adda idi iti rabaw ti bacud; ket isu nagtaeng idi iti rabaw ti bacud.

¹⁶ Ket kinunana cadacuada, Incayo iti bantay: di la ket ta dagiti cumamat, matumpungandacayo: ket agyancayo idiay a silelemmeng iti tallo nga al-aldaw, inggana a dagidiay nga agcamat cadacayo, agawidda, ket iti calpasanna incayo iti dalanyo.

¹⁷ Ket dagiti lallaki kinunada kencuana, Dacami dicamto mapabasol iti daytoy a sapatam isu a pinaisapatam cadacami.

¹⁸ Kitaem ta intono sumreccami iti daga, sica igalutmonto daytoy a tali a nalabaga iti tawa isu a nangyulogam cadacami, ket sica ummongemto iti balaymo ni amam ken ni inam, dagiti cacabsatmo ken amin a cabbalay ni amam.

¹⁹ Ket isunto, a siasinoman a rumuar cadagiti ruruangan ti balaymo a mapan iti calzada, ti darana addanto iti rabaw ti olona, ket awanto ti basolmi: ket uray siasinoman a makinaedto kenca iti balaymo, ti darana adda iti rabaw ti olomi no adda ima a mangsagid kencuana.

²⁰ Ngem no sica ipalgacmonto daytoy a panggepmi, dacami ngarud dicamto mapabasol iti daytoy a sapatam isu a pinaisapatam cadacami.

²¹ Isu simmungbat, Cas ti kinunayo, castan coma. Ket imbaonna ida, ket pimmanawda; ket ingalutna di tali a nalabaga iti tawa.

²² Ket rimmuarda, ket nacagtengda iti bantay ket nagyanda idiay iti tallo nga aldaw, agingga iti nacaawiden dagiti nagcamat cadacuada; ket dagidi nagcamat, nagbirucda cadacuada cadagiti amin a daldalan, ngem dida nasaracan ida.

²³ Idin dagidi dua a tattao nagawidda, ket simmalogda iti bantay, ket bimmallasiwda, ket immayda ken ni Josue nga anac ni Nun; ket sinaritada amin dagiti napasamacda.

²⁴ Ket kinunada ken ni Josue, Pudno a ni Jehova inyawatna amin a daga cadagiti imatayo; ket maysa pay, amin dagiti agnaed iti daga agrunawda iti sangotayo.