Josue 19 - Ti Biblia (1973)

Dagiti sacsacup da Simeon, Zabulon, Issachar, Aser, Nephtali, ken Dan. Timnath-sera naited ken Josue.

¹ Ket ti maicadua a gasat rimmuar ken Simeon, iti caputotan met laeng ni Simeon cas mayannurot cadagiti famfamiliada: ket ti tawidda adda idi iti nagbaetan ti tawid dagiti annac ni Juda.

² Ket nagun-odanda iti panagtawid, iti Beerseba, wenno Seba, ken Molada,

³ Ken Hasar-sual, ken Bala, ken Esem,

⁴ Ken Heltolad, ken Betul, ken Horma,

⁵ Ken Siclag, ken Bet-marcabot, ken Hasarsusa,

⁶ Ken Bet-lebat, ken Saruhen; sangapulo ket tallo nga il-ili agraman purpurocda:

⁷ Ayin, Rimmon, ken Eter, ken Asan; uppat nga il-ili agraman purpurocda:

⁸ Ken isu-amin dagiti purpuroc nga addada iti aglicmut cadagitoy nga il-ili inggana iti Baalat-beer, Ramat ti Abagatan. Daytoy isu ti tawid ti caputotan dagiti annac ni Simeon a cas mayannurot cadagiti famfamiliada.

⁹ Nagtaud iti apag dagiti annac ni Juda isu idi ti tawid dagiti annac ni Simeon; agsipud ta ti apag dagiti annac ni Juda isu idi ti adu unay cadacuada: gapuna a dagiti annac ni Simeon adda idi tawidda iti nagtengngaan ti tawid dagidiay.

¹⁰ Ket ti maicatlo a gasat rimmuar a maipaay cadagiti annac ni Zabulon a cas mayannurot cadagiti famfamiliada. Ket ti beddeng ti tawidda isu idi ti agingga iti Sarid;

¹¹ Ket ti beddengda simmang-at a nagpalaud, iti met laeng Marala, ket dimteng agingga iti Dabe-set; ket dimteng iti waig, nga adda iti sango ti Jocneam;

¹² Ket manipud Sarid nagsicco a nagpadaya nga agpaleleggacan ti init agingga iti beddeng ti Kislot-tabor; ket rimmuar iti Deberat, ket simmang-at iti Jafia;

¹³ Ket manipud idiay naglayon a nagpadaya iti Gat-hefer, iti Ittakazin, ket rummuar idiay Rimmon a gumaw-at agingga iti Nea:

¹⁴ Ket ti beddeng nagsicco idiay nga agpaamianan agingga iti Hanaton; ket dagiti pagruaranna addada idi idiay lobong ti Jefte-el;

¹⁵ Ken Catat, ken Naalal, ken Simron, ket Ideala, ken Bet-lehem: sangapulo ket dua nga il-ili agraman purpurocda.

¹⁶ Daytoy ti tawid dagiti annac ni Zabulon a cas mayannurot cadagiti famfamiliada, dagitoy nga il-ili agraman purpurocda.

¹⁷ Ti maicapat a gasat rimmuar nga agpaay ken Isacar, cadagiti met laeng annac ni Isacar a mayannurot cadagiti famfamiliada.

¹⁸ Ket ti beddengda isu idi ti agingga iti Jezreel, ken Kesulot, ken Sunem,

¹⁹ Ken Hafaraim, ken Sion, ken Anaarat,

²⁰ Ken Rabbit, ken Cision, ken Ebes,

²¹ Ken Ramet, ken Enganin, ken Enhadda, ken Bet-passes,

²² Ket ti beddeng dimteng aginggana iti Tabor, ken Sahasim, ken Bet-semes; ket dagiti pagruaran ti beddengda addada idi idiay Jordan; sangapulo ket innem nga il-ili agraman purpurocda.

²³ Daytoy ti tawid ti caputotan dagiti annac ni Isacar a mayannurot cadagiti famfamiliada, dagiti il-ili agraman purpurocda.

²⁴ Ket ti maicalima a gasat rimmuar nga agpaay iti caputotan dagiti annac ni Aser a cas mayannurot cadagiti famfamiliada.

²⁵ Ket ti beddengda isu idi ti Helcat, ken Hali, ken Beten, ken Acsaf,

²⁶ Ken Alamelec, ken Amad, ken Misal: ket dimmanon agingga iti Carmel nga agpalaud, ken iti Sihorlibnat;

²⁷ Ket nagtuloy nga agturong iti leleggacan ti init nga agpa-Bet-dagon, ket dimmanon iti Zabulon, ken iti lobong ti Jefte-el, nga agpaamianan iti Bet-emec ken Naiel; ket rimmuar iti Cabul iti macatigid,

²⁸ Ken iti Hebron, ken Rehob, ken Hammon, ken Cana, agingga met laeng iti dackel a Sidon;

²⁹ Ket ti beddeng nagsicco agingga iti Horma, ken agingga iti nasarikedkedan nga ili ti Tiro; ket ti beddeng nagsicco agingga iti Hosa; ket dagiti pagruaranna addada idi idiay taaw iti sacup ti Aczib;

³⁰ Ken castamet ti Umma met, ken Afec, ken Rehob; duapulo ket dua nga il-ili agraman purpurocda.

³¹ Daytoy ti tawid ti caputotan dagiti annac ni Aser a mayannurot cadagiti famfamiliada, dagitoy nga il-ili agraman purpurocda.

³² Ti maicanem a gasat rimmuar idi nga agpaay cadagiti annac ni Neftali, cadagiti met laeng annac ni Neftali a cas mayannurot cadagiti famfamiliada.

³³ Ket ti beddengda isu idi ti manipud Helef, manipud iti lugo idiay Saanaim, ken Adami-neceb, ken Jebneel agingga iti Lacum; ket dagiti pagruaranna addada idi idiay Jordan;

³⁴ Ket ti beddeng nagsicco nga agpalaud iti Aznot-tabor, ket rimmuar manipud idiay agingga iti Hucuca; ket dimmanon agingga iti Zabulon iti abagatan, ket dimmanon iti Aser iti laud: ken iti Juda idiay Jordan nga agturong iti leleggacan ti init.

³⁵ Ket dagiti il-ili a nasarikedkedan isuda Siddim, Ser, ken Hamath, Raccat, ken Cineret,

³⁶ Ken Adama, ken Rama, ken Asor,

³⁷ Ken Cedes, ken Edrii, ken En-hasor,

³⁸ Ken Jiron, ken Migdalel, Horem, ken Bet-anat, ken Bet-semes; sangapulo ket siam nga il-ili agraman purpurocda.

³⁹ Daytoy ti tawid ti caputotan dagiti annac ni Neftali a mayannurot cadagiti famfamiliada, dagiti il-ili agraman purpurocda.

⁴⁰ Ti maicapito a gasat rimmuar nga agpaay iti caputotan dagiti annac ni Dan a cas mayannurot cadagiti famfamiliada.

⁴¹ Ket ti beddeng ti tawidda isu idi ti Sora, ken Estaol, ken Ir-semes,

⁴² Ken Saalabin, ken Ayalon, ken It-la,

⁴³ Ken Elon, ken Timna, ken Ecron,

⁴⁴ Ken Elteque, ken Gibeton, ken Baalat,

⁴⁵ Ken Jehud, ken Bene-berac, ken Gatrimon,

⁴⁶ Ken Mejarcon, ken Racon, agraman ti beddeng nga adda iti sango ti Joppe.

⁴⁷ Ket ti beddeng dagiti annac ni Dan rimmuar iti ad-adayu pay ngem iti ayanda; ta dagiti annac ni Dan simmang-atda ket gimmubatda a maibusor iti Lesem, ket isu naalada, ken kinabilda iti tadem ti campilan, ket tinagicuada, ken nagnaedda kencuana, ket ti Lesem ninaganda iti Dan, a mayannurot iti nagan ni Dan nga amada.

⁴⁸ Daytoy ti tawid ti caputotan dagiti annac ni Dan a mayannurot cadagiti famfamiliada, dagitoy nga il-ili agraman purpurocda.

⁴⁹ Iti casta tinorpusda a biningbingay ti daga iti panagtawid a gapu iti bedbeddengna: ket dagiti annac ti Israel nangtedda iti tawid ken Josue nga anac ni Nun iti nagtetengngaanda:

⁵⁰ Mayannurot iti bilin ni Jehova intedda kencuana ti ili nga isu dinawatna, ti met laeng Timnat-sera, idiay caturodan ti Efraim; ket isu binangonna ti ili, ket nagnaed kencuana.

⁵¹ Dagitoy isuda ngarud dagiti tawtawid, a da Eleazar a padi, ken ni Josue nga anac ni Nun, ken dagiti pangpangolo dagiti balbalay dagiti amma dagiti capcaputotan dagiti annac ti Israel, inwarasda a maipaay iti tawid a gapu iti ginasanggasat idiay Silo iti imatang ni Jehova, iti ruangan ti tolda ti gimong. Castoy ti panangturposda a panangbingay iti daga.