Josue 18 - Ti Biblia (1973)

Ti matda ti daga mabingay. Ti sacup ni Benjamin ken dagiti il-ilina.

¹ Ket isu-amin a gimong dagiti annac ti Israel naguornongda idiay Silo, ket namangonda iti maysa a tolda ti gimong idiay: ket ti daga naparucma iti sangoda.

² Ket natda cadagiti annac ti Israel dagiti pito a capcaputotan, isuda a dida pay biningay ti tawidda.

³ Ket ni Josue kinunana cadagiti annac ti Israel, Casano ti cabayagyo a di mangicascaso iti ipapanyo a mangtagicua iti daga a ni Jehova a Dios dagiti ammayo intedna cadacayo?

⁴ Mangtudingcayo cadacayo met laeng iti tallo a tattao iti tunggal maysa a caputotan: ket ibaonconto ida, ket isuda tumacderdanto, ket pagnaendanto ti daga, ket isuda mapaendanto a cas mayannurot iti tawidda; ket isuda umaydanto caniac.

⁵ Ket isuda bingayendanto ti daga iti agcapito capaset: ni Juda agnaedto iti beddengna iti abagatan, ket ti balay ni Jose agnaedto iti beddengda iti amianan.

⁶ Ket dacayo mapaenyonto ti daga iti agcapito capaset, ket yegyonto caniac ditoy ti nacamapaanna; ket paggiginnasanggasatecto cadacayo iti saclang ni Jehova a Diostayo.

⁷ Ta dagiti Levitas awan ti bingayda cadacayo: ta ti kinapadida ken Jehova isu ti tawidda: ket ni Gad ken ni Ruben, ken ti caguddua ti caputotan ni Manases inawatdan ti tawidda iti ballasiw ti Jordan nga agpadaya, isu a ni Moises nga adipen ni Jehova intedna cadacuada.

⁸ Ket dagiti tattao timmacderda, ket napanda: ket ni Josue incumitna cadagiti napan a mangmapa iti daga, a kinunana, Incayo ket pagnaenyo ti daga, ket isu mapaenyo, ket umaycayonto manen caniac; ket siac paggiginnasanggasatecto cadacayo iti saclang ni Jehova ditoy Silo.

⁹ Ket dagiti tattao napanda ket pinagnada amin a daga, ket mapada iti inilin-ili iti nagcapito capaset iti maysa a libro; ket isuda immayda ken Josue idiay pacarso sadi Silo.

¹⁰ Ket ni Josue pinaggiginnasatna cadacuada idiay Silo iti saclang ni Jehova: ket ni Josue biningbingayna idiay ti daga cadagiti annac ti Israel a cas mayannurot cadagiti bingbingayda.

¹¹ Ket ti gasat dagiti annac ni Benjamin rimmuar a cas mayannurot cadagiti famfamiliada: ket ti beddeng ti gasatda rimmuar iti nagbaetan dagiti annac ni Juda ken dagiti annac ni Jose.

¹² Ket ti beddengda iti deppaarna iti amianan isu idi ti manipud iti Jordan; ket ti beddeng simmang-at iti abay ti Jerico iti amianan, ket simmang-at iti caturodan nga agpalaud; ket dagiti pagruaranna addada idi iti let-ang ti Beth-aven.

¹³ Ket ti beddeng naglayon manipud idiay agingga iti Luz, iti abay ti Luz (nga isu met laeng ti Bet-el), iti agpaabagatan, ket ti beddeng nagsalog inggana iti Atarot-addar, iti denna ti bantay nga adda iti abagatan ti Bet-horon nga akinbaba.

¹⁴ Ket ti beddeng naglayon manipud idiay, ket nagsicco iti bangirna ti laud nga agpaabagatan, manipud iti bantay nga adda iti sangoanan ti Beth-oron nga agpaabagatan; ket dagiti pagruaranna addada idi idiay Kiryat-baal (nga isu met laeng ti Kiryat-jearim), a maysa nga ili dagiti annac ni Juda: daytoy isu ti bangirna iti laud.

¹⁵ Ket ti bangirna iti abagatan manipud iti caadayuan a paset ti Kiryat-jearim; ket ti beddeng rimmuar a nagpalaud, ket rimmuar a nagturong iti ubbog dagiti dandanum ti Neftoa;

¹⁶ Ket ti beddeng nagsalog inggana iti caadayuan a paset ti bantay nga adda iti sango ti tanap ti anac a lalaki ni Hinnom, nga adda iti lobong ni Rafaim iti amianan; ket nagsalog agingga iti lobong ni Hinnom, agingga iti sikigan ti Jebuseo nga agpaabagatan, ket nagsalog agingga iti En-rogel.

¹⁷ Ket naglayon a nagpaamianan, ket rimmuar idiay Ensemes, ket rimmuar idiay Gelilot nga adda iti sangoanan ti sang-atan ti Adummim; ket nagsalog agingga iti bato ni Bohan nga anac a lalaki ni Ruben;

¹⁸ Ket naglayon a nagpaamianan agingga iti sikigan a pumerreng iti Araba, ket nagsalog agingga iti Araba;

¹⁹ Ket ti beddeng naglayon agingga iti sikigan ti Beth-hogla nga agpaamianan; ket dagiti pagruaran ti beddeng addada idi idiay nakinamianan a sucuc ti Baybay ti Asin idiay nakinabagatan a pungto ti Jordan: daytoy isu ti nakinabagatan a beddeng.

²⁰ Ket ti Jordan isu idi ti beddengna iti bangirna iti daya. Daytoy isu ti tawid dagiti annac ni Benjamin, cadagiti bedbeddeng nga aglicmut, a cas mayannurot cadagiti famfamiliada.

²¹ Ita dagiti il-ili ti caputotan dagiti annac ni Benjamin a cas mayannurot cadagiti famfamiliada isuda ti Jerico, ken Bet-hogla, ken Casis.

²² Ken Bet-araba, ken Sumaraim, ken Bet-el,

²³ Ken Avim, ken Para, ken Ofra,

²⁴ Ken Kefar-haammoni, ken Ofni, ken Gaba: sangapulo ket dua nga il-ili agraman purpurocda:

²⁵ Gabaon, ken Rama, ken Beerot,

²⁶ Ken Mizpa, ken Cefira, ken Moza,

²⁷ Ken Recom, ken Irpeel, ken Tarala,

²⁸ Ken Sela, ken Elef, ken Jebus (nga isu met laeng ti Jerusalem), Gibeat, ken Kiryat; sangapulo ket uppat nga il-ili agraman purpurocda. Daytoy ti tawid dagiti annac ni Benjamin a cas mayannurot cadagiti famfamiliada.