Josue 13 - Ti Biblia (1973)

Ti daga a di pay naparmec ken nabingay cadagiti capcaputotan. Ti pannacabingay ti Canaan cadagiti capcaputotan. Dagiti tawtawidda.

¹ Ita ni Josue lacayen, ket nacapuyen cadagiti adu a tawtawenna; ket ni Jehova kinunana kencuana, Sica lacaycan ket nacapuyca cadagiti adu a tawtawenmo, ket adu pay laeng ti nabati a daga a matagicua.

² Daytoy ti daga a matda pay: isu-amin a sacup dagiti Filisteos, ken isu-amin a sacup ti Geseos;

³ Manipud iti Sihor, nga adda iti sango ti Egipto, nga agpaamianan met laeng agingga iti beddeng ti Accaron, isu a maibilang cadagiti Cananeos; dagiti lima nga ap-appo dagiti Filisteos; dagiti Gazeos, ken dagiti Asdodios, dagiti Ascalonitas, dagiti Geteos, ken dagiti Accaronitas, casta met dagiti Heveos,

⁴ Iti abagatan; isu-amin a daga dagiti Cananeos, ken Mehara a cucua dagiti Sidonios, inggana iti Afec, agtungpal iti beddeng dagiti Amorreos;

⁵ Ket iti daga dagiti Gibleos, ken isu-amin a Libano, nga agturong iti leleggacan ti init, manipud iti Baalgad nga adda iti arisadsad ti bantay Hermon inggana iti sercan ti Hamat;

⁶ Isu-amin dagiti agnaed iti caturodan manipud Libano inggana iti Misrefot-mayim, amin met laeng dagiti Sidonios; pasiaecto ida manipud iti saclang dagiti annac ti Israel: ipabagim laeng iti Israel a ipatawid, a cas imbilinco kenca.

⁷ Gapuna itatta bingayem daytoy a daga a maipaay a tawid cadagi siam a caputotan ken iti caguddua ti caputotan ni Manases.

⁸ Daydiay nairaman cadagiti Rubenitas ken dagiti Gaditas inawatdan ti tawidda, nga inted ni Moises cadacuada, idiay ballasiw ti Jordan nga agpadaya, cas pannangted cadacuada ni Moises nga adipen ni Jehova:

⁹ Manipud Aroer, nga adda iti igid ti lobong ti Arnon, ken iti ili nga adda iti tengnga ti lobong, ken isu-amin a tanap ti medeba agingga iti Dibon;

¹⁰ Ken isu-amin dagiti il-ili ni Sehon nga ari dagiti Amorreos, a nagari idiay Hesbon, inggana iti beddeng dagiti annac ni Ammon;

¹¹ Ken ti Galaad, ken iti nagpatinggaan dagiti Gesureos ken Maacateos, ken isu-amin a bantay Hermon, ken isu-amin a Basan inggana iti Salca;

¹² Isu-amin a pagarian ni Og idiay Basan a nagari idiay Astarot ken Edrei (daydi met laeng nabati cadagiti Rafeos); ta dagitoy kinabil ni Moises ket pinagtalaona ida.

¹³ Nupay casta dagiti annac ti Israel saanda a pinagtalao dagiti Gesureos ken Maacateos; no di ket ti Gesureos ken Maaoat agnaedda iti tengnga ti Israel inggana ita nga aldaw.

¹⁴ Iti laeng caputotan ni Levi ti saanna nga iniccan ti tawidna; dagiti datdaton a mapuuran iti apuy ken Jehova, a Dios ti Israel, isu ti tawidda, a cas kinunana kencuana.

¹⁵ Ket ni Moises iniccanna ti caputotan dagiti annac ni Ruben iti cas mayannurot cadagiti famfamiliada.

¹⁶ Ket ti beddengda isu idi manipud Aroer, nga adda iti igid ti lobong ti Arnon, ken iti ili nga adda iti tengnga ti lobong, ken isu-amin a tanap ti Medeba;

¹⁷ Ti Hesbon, ken isu-amin dagiti il-ili nga addada iti tanap; ti Dibon, ken ti Bamot-baal, ken ti Bet-baalmeon,

¹⁸ Ken ti Jaas, ken ti Keddemot, ken ti Mefaat,

¹⁹ Ken ti Kiryataim, ken ti Sibma, ken ti Saratasar idiay bantay ti lobong,

²⁰ Ken ti Bet-peor, ken dagiti bacbacras ti Pisga, ken ti Bet-jesimot,

²¹ Ken isu-amin dagiti il-ili ti tanap, ken amin a pagarian ni Sehon nga ari dagiti Amorrheos, a nagari idiay Hesbon isu a kinabil ni Moises agraman cadagiti panguloen ti Madian, Hevi, ken Recem, ken Sur, ken Hur, ken Reba, a pangpangolo ni Sehon, a nagtaeng idiay a daga.

²² Casta met ni Balaam, a mammadles, ti anac a lalaki ni Beor, pinatay dagiti annac ti Israel iti campilan iti tengnga dagiti dadduma a pinatayda.

²³ Ket ti beddeng dagiti annac ni Ruben isu idi ti Jordan, ken ti beddengna. Daytoy isu idi ti tawid dagiti annac ni Ruben a cas mayalubog cadagiti famfamiliada, dagiti il-ili ken dagiti purpurocda.

²⁴ Ket ni Moises iniccanna ti caputotan ni Gad, dagiti annac ni Gad, a cas mayalubog cadagiti famfamiliada.

²⁵ Ket ti beddengda isu idi ti Jazer, ken isu-amin dagiti il-ili ti Galaad, ken caguddua ti daga dagiti annac ni Ammon, inggana iti Aroer nga adda iti sango ti Rabba;

²⁶ Ket manipud iti Hesbon inggana iti Ramotmizpa, ken Betonim; ken manipud Mahanaim inggana iti beddeng ti Debir.

²⁷ Ken idiay lobong ti Bet-aram, ken ti Beth-nimra, ken ti Socot, ken ti Safon, a natda iti pagarian ni Sehon nga ari ti Hesbon, ti Jordan ken iti beddengna, inggana iti caadayuan a paset ti baybay a Cineret iti ballasiw a daya ti Jordan.

²⁸ Daytoy isu ti tawid dagiti annac ni Gad cas mayalubog cadagiti famfamiliada, dagiti il-ili ken purpurocna.

²⁹ Ket ni Moises inyawatna ti tawid iti caguddua ti caputotan ni Manases: ket isu daydi ti maipaay iti caguddua ti caputotan dagiti annac ni Manases a cas mayalubog cadagiti famfamiliada.

³⁰ Ket ti beddengda isu idi manipud iti Mahanaim, isu-amin a Basan, isu-amin a pagarian ni Og nga ari ti Basan, ken isu-amin dagiti il-ili ti Jair, nga addada idiay Basan innem a pulo nga il-ili:

³¹ Ken ti caguddua ti Galaad, ken Astarot, ken Adrei, dagiti il-ili ti pagarian ni Og idiay Basan, agpaayda cadagiti annac ni Maquir nga anac a lalaki ni Manases, agpaay met laeng iti caguddua dagiti annac ni Maquir a cas mayalubog cadagiti famfamiliada.

³² Dagitoy isuda dagiti tawtawid cadagidiay tantanap ti Moab, nga imbunong ni Moises, iti ballasiw ti Jordan idiay dayaen ti Jerico.

³³ Ngem ni Moises awan ti intedna a tawid iti caputotan ni Levi: ni Jehova, a Dios ti Israel, isu ti tawidda, a cas sinaona cadacuada.