Josue 11 - Ti Biblia (1973)

Ti pannacacayaw ken pannacapuur ti Hasor. Ti nacadagupan ti gapuanan ni Josue.

¹ Ket naaramid, nga idi a ni Jabin nga ari ti Hasor nadamagna daytoy, nagbaon ken Jobab nga ari ti Madon, ken iti ari ti Simron, ken iti ari ti Acsaf,

² Ket cadagiti ar-ari nga addada iti amianan, iti caturodan, ken iti Araba nga abagatan ti Cineret, ken iti tanap ken cadagiti panpantoc ti Dor iti laud,

³ Iti Cananeo iti daya ken iti laud, ken iti Amorreo, ken Heteo, ken Perezeo, ken ti Jebuseo iti caturodan ken iti Heveo nga adda iti baba ti Hermon iti daga ti Mizpa.

⁴ Ket rimmuarda, isuda ken isu-amin a buyotda naicuyog cadacuada, adu a tattao, a casda la iti darat iti igid ti baybay ti caaduda, agraman cabcabayo ken luglugan nga aduda unay.

⁵ Ket isu-amin dagitoy nga ar-ari nagsasaracda a nagtitipon; ket immayda ket nagpacarsoda a sangsangcatipon idiay dandanum ti Merom, tapno makigubatda iti Israel.

⁶ Ket ni Jehova kinunana ken Josue, Dica agbuteng cadacuada; ta intono bigat iti daytoy a tiempo yawatconto ida amin a napapatay iti sangoanan ti Israel: ket pasatamto dagiti cabcabayoda, ket puuramto iti apuy dagiti lugluganda.

⁷ Iti casta immay nga dagus ni Josue, ken isu-amin a tattao ti gubat naicuyog kencuana, a maibusor cadacuada iti denna dagiti dandanum ti Merom, ket dinuclosna ida.

⁸ Ket ni Jehova inyawatna ida iti ima ti Israel, ket kinabilda ida, ket kinamatda ida inggana iti dackel a Sidon, ken iti Misrefot-mayim, ken iti lobong ti Mizpa iti agpadaya: ket kinabilda ida, nga agingga iti awan ti tiniddada.

⁹ Ket ni Josue inaramidna cadacuada cas imbilin ni Jehova kencuana: isu pinasatanna dagiti cabcabayoda, ket pinuuranna iti apuy dagiti lugluganda.

¹⁰ Ket ni Josue nagsubli iti daydi a tiempo, ket innalana ti Hazor, ket kinabilna ti arina iti campilan: ta ti Hazor isu idi ti olo dagidiay amin a pagpagarian.

¹¹ Ket kinabilda amin dagiti carcararua nga agnaed kencuana iti tadem ti campilan, ket dinadaelda ida nga inkisap: awan natda nga adda angesna: ket pinuuranna iti apuy ti Hazor.

¹² Ket amin dagiti il-ili dagidiay nga ar-ari, ken isu-amin nga ar-arida, innala ni Josue, ket kinabilna ida iti tadem ti campilan, ket dinadaelna ida nga inkisap; cas imbilin ni Moises nga adipen ni Jehova.

¹³ Ngem cadagidiay nga il-ili a nagyan cadagiti pagsalindeganda, ti Israel awan pinuuranna, malacsid ti Hazor laeng; dayta pinuuran ni Josue.

¹⁴ Ket isu-amin dagiti nasamsam cadagiti il-ili, ken dagiti an-animal, dagiti annac ti Israel innalada a maipaay a kinayawan cadacuada; ngem tunggal tao kinabilda iti tadem ti campilan, agingga iti nadadaelda amin ida, awan ti tiniddada nga adda angesna.

¹⁵ Cas ni Jehova imbilinna ken Moises nga adipenna, casta met ni Moises imbilinna ken Josue: ket iti casta tinungpal ni Josue; ket awan ti dina tinungpal cadagiti isu-amin a ni Jehova imbilinna ken Moises.

¹⁶ Iti casta ni Josue innalana amin dayta a daga, iti caturodan, ken amin nga Abagatan, ken amin a daga ti Gosen, ken dagiti tanap, ken ti Araba, ken ti caturodan ti Israel, ken ti tanapna met laeng;

¹⁷ Manipud iti bantay Halac, a sumang-at idiay agingga ti Seir, aginggana ti Baal-gad met laeng iti lobong ti Libano iti baba ti bantay Hermon: ken isu-amin nga ar-arida innalana, ket kinabilna ida, ket pinatayna ida.

¹⁸ Ni Josue nabayag a nakigubgubat cadagidiay amin nga ar-ari.

¹⁹ Awan ti ili a nakicappia cadagiti annac ti Israel, malacsid dagiti Heveos a nagtaeng idiay Gabaon: isuda amin innalada iti gubat.

²⁰ Ta naggapu idi ken Jehova ti panangpatangken cadagiti puspusoda, tapno umayda a maibusor iti Israel iti paggugubatan, tapno pucawenna ida nga ikisap, tapno dida macaasian coma idi, no di ket tapno pucawenna coma ida, cas ni Jehova imbilinna ken Moises.

²¹ Ket ni Josue immay iti daydi a tiempo, ket iniccatna dagiti Anaceos iti caturodan, iti Hebron, iti Debir, iti Anab, ken iti isu-amin a caturodan ti Juda, ken iti isu-amin a caturodan ti Israel: ni Josue dinadaelna nga inkisap ida agraman dagiti ililida.

²² Awan idi ti Anaceo a tiniddada iti daga dagiti annac ti Israel; no saan laeng a idiay Gaza, idiay Gat, ken idiay Asdod, ti nangitiddaanda cadagiti dadduma.

²³ Iti casta ni Josue innalana dagup amin a daga, cas mayalubog cadagiti isu-amin a ni Jehova sinaona ken Moises; ket ni Josue intedna a tawid ti Israel a mayalubog iti bingbingayda iti caputotanda. Ket ti daga naginana iti gubat.