Josue 10 - Ti Biblia (1973)

Dagiti lima nga ar-ari gubatenda ti Gabaon. Ti panangispal ni Josue. Ti pannacapaatiddog ti aldaw ti gubat. Dagiti ar-ari macayawanda. Ti pannacadadael ti Maceda. Dagiti sabsabali a pinarmec ni Josue.

¹ Naaramid, idi a ni Adonisedec nga ari ti Jerusalem natimudna no casano ti panangala ni Josue iti Ai, ket isu dinadaelna a tinalipupus (a no casano ti inaramidna iti Jerico ken iti arina, casta met ti inaramidna iti Ai ken iti arina), ken no casano ti pannakicappia dagiti agnaed iti Gabaon iti Israel, ket addada idi cadacuada;

² A nagamacda unay, agsipud ta ti Gabaon isu idi ti maysa nga ili a dackel, a maysa cadagiti naarian nga il-ili, ken agsipud ta dacdackel pay ngem iti Ai, ket isu-amin dagiti tattaona mamaingelda.

³ Ngarud ni Adonisedec nga ari ti Jerusalem nagbaon ken Oham nga ari ti Hebron, ken ni Piream nga ari ti Jarmut, ken ni Jafia nga ari ti Laquis, ken ni Debir nga ari ti Eglon, a kinunana,

⁴ Sumang-atcayo caniac, ket badangandac, ket cabilentayo coma ti Gabaon: ta nakicappia ken Josue ken cadagiti annac ti Israel.

⁵ Gapuna a dagiti lima nga ar-ari dagiti Amorreos, ti ari ti Jerusalem, ti ari ti Hebron, ti ari ti Jarmut, ti ari ti Laquis, ti ari ti Eglon, nagtitiponda, ket simmang-atda, isuda ken isu-amin a buybuyotda, ket nagpacarsoda a maibusor iti Gabaon, ket nakigubatda a maibusor kencuana.

⁶ Ket dagiti tattao ti Gabaon nagbaonda ken Josue iti pacarso idiay Gilgal, a cunana, Dica cucuten ta imam cadagiti ad-adipenmo; sumang-atca a madaras cadacami, ket ispalennacami, ket badangannacami: ta isu-amin dagiti ar-ari dagiti Amorreos nga agnaedda iti caturodan nagtitiponda a bumosor cadacami.

⁷ Iti casta ni Josue simmang-at nanipud Gilgal, isu ken isu-amin dagiti tattao ti gubat kencuana, ken isu-amin dagiti tattao nga agcacamaingel.

⁸ Ket ni Jehova kinunana ken Josue, Dica agbuteng cadacuada: ta inyawatco ida cadagita imam; awan ti uray asinoman a tao cadacuada nga agtacderto iti sangoanam.

⁹ Ni Josue ngarud napan nga dagus cadacuada; ta simmang-at a nagpatpatnag nanipud Gilgal.

¹⁰ Ket ni Jehova riniribucna ida iti sangoanan ti Israel, ket pinapatayna ida iti naindaclan a panangpapatay idiay Gabaon, ket kinamatda ida iti dalan ti sang-atan sadi Bet-horon ket kinabilda ida agingga iti Azeca, ken Maceda.

¹¹ Ket naaramid, idi agtalawda manipud sangoanan ti Israel, idi addada iti salogan idiay Bet-horon, a ni Jehova tininnaganna ida cadagiti batbato a dadackel nanipud langit, cadacuada aginggana iti Azeca, ket natayda: ad-adu dagidiay napapatay cadagiti batbato nga uraro ngem dagidiay pinapatay dagiti annac ti Israel iti campilan.

¹² Idin ni Josue nagsao ken Jehova idi aldaw a ni Jehova inyawatna dagiti Amorreos iti sangoanan dagiti annac ti Israel; ket kinunana iti imatang ti Israel, init, agintecca idiay ngato ti Gabaon; ket sica, Bulan, idiay lobong ti Ajalon.

¹³ Ket ti init nagintec, ket ti bulan nagsardeng, inggana iti di nacabales ti nacion cadagiti cabcabusorda. Daytoy saan aya a naisurat iti libro ni Jasher? Ket ti init nagintec iti tengnga ti langit, ket saan a nagdaras a limnec iti dandani maysa nga aldaw.

¹⁴ Ket awan idi ti aldaw a cas la iti daydi iti casacbayanna wenno iti calpasanna, a ni Jehova impangagna ti timec ti maysa a tao: ta ni Jehova nakigubat a gapu iti Israel.

¹⁵ Ket ni Josue nagsubli, ken isu-amin nga Israel agraman kencuana, iti pacarso idiay Gilgal.

¹⁶ Ket dagitoy lima nga ar-ari nagtalawda, ket naglemmengda iti rukib sadi Maceda.

¹⁷ Ket naibaga ken Josue, a nacuna, Dagiti lima nga ar-ari nasaracanda ida, a nailemmeng iti rukib sadi Maceda.

¹⁸ Ket ni Josue kinunana, Mangtulidcayo cadagiti dadackel a batbato agingga iti ngiwat ti rukib, ket mangisaadcayo cadagiti tattao a mangaywan cadacuada:

¹⁹ Ngem dicayo agsardeng idiay; agcamatcayo cadagiti cabcabusoryo, ket cabilenyo ti taraudida; ket dicayo palubosan ida a sumrec cadagiti il-ilida: ta ni Jehova a Diosyo inyawatna ida iti imayo.

²⁰ Ket naaramid, nga idi a ni Josue ken dagiti annac ti Israel nalpasda ti nangpapatay cadacuada iti dackel a panangpapatay inggana iti napucawda ket ti natda a nabati idi cadacuada simrec cadagiti nasarikedkedan nga il-ili,

²¹ Nga isu-amin a tattao nagsublida ken Josue iti pacarso idiay Maceda a sitatalna: awan ti uray maysa a mangcuti iti dilana a maibusor iti uray siasinoman cadagiti annac ti Israel.

²² Idin kinuna ni Josue, Luctanyo ti ngiwat ti rukib, ket yegyo caniac dagiti lima nga ar-ari manipud iti rukib.

²³ Ket inaramidda a casta, ket impanda kencuana nanipud iti rukib dagiti lima nga ar-ari, ti ari ti Jerusalem, ti ari ti Hebron, ti ari ti Jerimot, ti ari ti Laquis, ti ari ti Eglon.

²⁴ Ket naaramid, idi nga inyegda ken Josue dagidiay nga ar-ari, a ni Josue inayabanna amin dagiti tattao ti Israel, ket kinunana cadagiti pangpangoloen dagiti tattao ti gubat a nakicuyog kencuana a napan, Umasidegcayo, ibaddecyo dagiti tengnged dagitoy nga ar-ari. Ket immasidegda, ket imbaddecda dagiti tengngedda.

²⁵ Ket ni Josue kinunana cadacuada, Dicayo agbuteng, dicayo met agcullayaw; pumigsacayo ken umingelcayo: ta castoy ti aramidento ni Jehova cadagiti isu-amin a cabusoryo a cabacalyo.

²⁶ Ket iti calpasanna ni Josue kinabilna ida, ket pinatayna ida, ket pinaibitinna ida cadagiti lima a cayo: ket naibitinda cadagiti caycayo agingga iti malem.

²⁷ Ket naaramid idi lumnec ti init, a ni Josue nagbilin, ket imbabada ida cadagiti caycayo, ket impalladawda ida idi rukib a naglemmenganda, ket nangicabilda cadagiti dadackel a batbato iti ngiwat ti rukib, inggana ita nga aldaw.

²⁸ Ket ni Josue innalana ti Maceda iti daydi nga aldaw, ket isu kinabilna iti tadem ti campilan, ken castamet ti arina: ket dinadaelna nga inkisap ida ken isu-amin a carcararua nga agnaed kencuana: awan a pulos ti tiniddana: ket inaramidna iti ari ti Maceda ti cas inaramidna iti ari ti Jerico.

²⁹ Ket ni Josue immallatiw nanipud Maceda, ken isu-amin nga Israel naicuyog kencuana idiay Libna, ket ginubatda ti Libna:

³⁰ Ket ni Jehova isu inyawatna met, ken castamet ti arina, iti ima ti Israel; ket isu kinabilna iti tadem ti campilan, ken isu-amin a carcararua nga agnaed kencuana; awan ti tiniddana; ket inaramidna iti arina cas ti inaramidna iti ari ti Jerico.

³¹ Ket ni Josue immallatiw nanipud Libna, ken isu-amin nga Israel naicuyog kencuana, idiay Laquis, ket nagpacarsoda a maibusor kencuana, ket nakigubatda a maibusor kencuana:

³² Ket ni Jehova inyawatna ti Laquis iti ima ti Israel; ket isu ti innalana iti maicadua nga aldaw, ket isu kinabilna iti tadem ti campilan, ken isu-amin a carcararua nga agnaed kencuana, cas iti amin nga inaramidna iti Libna.

³³ Idin ni Horam nga ari ti Gazer simmang-at a bumadang iti Laquis; ket ni Josue pinatayna isu ken dagiti tattaona, agingga iti awan tiniddana kencuana a nalabasan.

³⁴ Ket ni Josue immallatiw nanipud Laquis, ken isu-amin nga Israel naicuyog kencuana, iti Eglon; ket isuda nagpacarsoda a maibusor kencuana, nakigubatda a maibusor kencuana;

³⁵ Ket isu innalada iti daydi nga aldaw, ket isu kinabilda iti tadem ti campilan; ken isu-amin a carcararua nga agnaed kencuana isu dinadaelna nga inkisap iti daydi nga aldaw, cas iti amin nga inaramidna iti Laquis.

³⁶ Ket ni Josue simmang-at nanipud Eglon, ken amin nga Israel naicuyog kencuana, agingga iti Hebron; ket isuda nakigubatda a maibusor kencuana:

³⁷ Ket isu innalada, ket kinabilda iti tadem ti campilan, ken castamet ti arina, ken isu-amin dagiti il-ilina, ken isu-amin a carcararua nga agnaed kencuana; awan a pulos ti tiniddana, a cas iti amin nga inaramidna iti Eglon; no di ket dinadaelna nga inkisap, ken amin a carcararua nga agnaed kencuana.

³⁸ Ket ni Josue nagsubli, ken isu-amin nga Israel naicuyog kencuana, idiay Debir, ket nakigubat a maibusor kencuana:

³⁹ Ket isu innalana, ken castamet ti arina, ken amin dagiti il-ilina; ket kinabilda ida iti tadem ti campilan, ket dinadaelda nga inkisap dagiti isu-amin a carcararua nga agnaed kencuana; isu awan ti tiniddana: no casano ti inaramidna iti Hebron, casta ti inaramidna iti Debir, ken iti arina; a cas iti inaramidna met iti Libna, ken iti arina.

⁴⁰ Iti casta ni Josue kinabilna ti isu-amin a daga, iti caturodan, ken iti Abagatan, ken iti tanap, ken dagiti bacras dagiti banbantay, ken isu-amin dagiti ar-arida nga awan a pulos ti tiniddana, no di ket pinucawna nga inkisap amin a naganges, cas imbilin ni Jehova a Dios ti Israel.

⁴¹ Ket ni Josue kinabilna ida nanipud Cades-barnea aginggana iti Gaza met laeng, ken isu-amin a daga ti Gosen inggana iti Gabaon met laeng.

⁴² Ket isu-amin dagitoy nga ar-ari ken dagiti dagdagada ni Josue innalana iti maymaysa a tiempo, agsipud ta ni Jehova, a Dios ti Israel, nakigubat a gapu iti Israel.

⁴³ Ket ni Josue nagsubli, ken amin nga Israel naicuyog kencuana, iti pacarso idiay Gilgal.