Josue 1 - Ti Biblia (1973)

Ti panangcumit ni Jehova ken Josue. Ni Josue isaganana ti panagballasiw iti Jordan.

¹ Ket naaramid iti calpasan ti ipapatay ni Moises nga adipen ni Jehova, a ni Jehova nagsao ken ni Josue nga anac ni Nun, a catulongan ni Moises, a kinunana,

² Ni Moises nga adipenco natayen: tumacderca ngarud ita, ket ballasiwem daytoy Jordan, sica ken isu-amin daytoy nga umili, iti daga isu nga itedco cadacuada, cadagiti met laeng annac ti Israel.

³ Ti tumunggal disso a ti dapan ti sacam baddekennanto, dayta itedconto cadacayo, a cas insaoc idi ken ni Moises.

⁴ Manipud iti let-ang ken iti daytoy Libano agingga iti dackel a carayan, ti carayan nga Eufrates, isu-amin a daga dagiti Jetteos, ken aginggana iti dackel a taaw iti agpalelennecan ti init, isunto ti beddengyo.

⁵ Awan ti siasinoman a tao a macagawayto kenca cadagiti isu-amin nga al-aldaw ti panagbiagmo: cas iti caaddac idi ken ni Moises casta met ticaaddacto kenca; dicanto baybay-an ken dicanto met panawan.

⁶ Bumilegca ket umingelca; ta sicanto ti mamagtawid cadagitoy a tattao iti daga nga insapatac cadagiti ammada nga itedco cadacuada.

⁷ Isuna laeng a bumilegca ken umingelca unay, tapno tungpalem nga aramiden iti cas mayalubog iti isu-amin a linteg, a ni Moises nga adipenco imbilinna kenca: saanmo a pagpanawan uray iti macanawan uray iti macatigid, tapno agbanagcanto a sisasayaat iti sadinoman a papanam.

⁸ Daytoy a libro ti linteg dinto umadayo ita ngiwatmo: no di ket iti aldaw ken iti rabii panpanunotemto, tapno tungpalem nga aramiden ti cas mayalubog iti isua-min nga adda a naisurat kencuana: ta iti casta parang-ayemto ti dalanmo ket iti casta addanto naimbag a banagmo.

⁹ Saanco aya nga imbilin kenca? Bumilegca, ket umingelca: saanca nga agbuteng ket dica met agcullayaw: ta ni Jehova a Diosmo adda kenca iti sadinoman a papanam.

¹⁰ Idin ni Josue binilinna dagiti turturayen ti ili, a kinunana,

¹¹ Magnacayo ket lasatenyo daytoy a pacarso ket ibilinyo cadagiti tattao, a cunayo, Mangsaganacayo iti taraon: ta iti uneg ti tallo nga al-aldaw bumallasiwcayto itoy Jordan tapno sumreccayo nga agtagicua iti daga, a ni Jehova a Diosyo itedna cadacayo, tapno isu ti tagicuaenyo.

¹² Ket ni Josue nagsao cadagiti Rubenitas, ken cadagiti Gaditas, ken iti caguddua ti caputotan ni Manases, a kinunana,

¹³ Lagipenyo ti sao nga imbilin ni Moises, nga adipen ni Jehova cadacayo, a kinunana, Ni Jehova a Diosyo iniccannacayo iti inana, ket itednanto daytoy a daga.

¹⁴ Dagiti assawayo, annacyo ken dagiti an-animalyo agyandanto iti daga a ni Moises intedna cadacayo iti ballasiw ti Jordan; ngem bumallasiwcayto a siiigam, amin dagiti lallaki a napigsa ken maingel iti masangoanan dagiti cacabsatyo, ket tulonganyonto ida:

¹⁵ Inggana iti ni Jehova maitednan iti inana cadagiti cacabsatyo, a cas iti pannangtedna cadacayo, ket isuda tagicuaendanto met ti daga a ni Jehova a Diosyo itedna cadacuada: ket iti casta agsublicayton iti daga a pagtagicuaanyo, ket isu ti tagicuaenyo, isu a ni Moises nga adipen ni Jehova intedna cadacayo iti ballasiw ti Jordan nga agturong iti leleggacan ti init.

¹⁶ Ket idin simmungbatda ken ni Josue, a kinunada, Amin nga imbilinmo cadacami aramidenminto, ket mapancamto iti uray sadino a pangibaonam cadacami.

¹⁷ Cas iti panangipangagmi idi ken ni Moises cadagiti isu-amin a banbanag, casta met ti panangipangagminto kenca: ni Jehova a Diosmo adda coma laeng kenca a cas iti kinaaddana idi ken ni Moises.

¹⁸ Uray siasino a sumalungasingto iti bilinmo, ket saan a dumngegto cadagiti sasaom iti amin nga ibilinmonto kencuana, mapapatayto; isuna laeng a bumilegca ken umingelca.