Jonas 3 - Ti Biblia (1973)

Isu mangascasaba cadagiti taga Ninive, ket agbabawida.

¹ Ket ti sao ni Jehova immay ken ni Jonas iti capamindua, a cunana,

² Tumacderca, inca idiay Ninive, daydiay dackel nga ili, ket icascasabamto kencuana ti paibaga nga ibilinco kenca.

³ Iti casta timmacder ni Jonas, ket napan idiay Ninive a cas iti sao ni Jehova. Ket ti Ninive isu idi ti dackel unay nga ili, a tallo nga aldaw a pagnaen.

⁴ Ket nangrugi ni Jonas a simrec iti ili a nagmalem a nagna, ket impuccawna, a kinunana, uppat a pulo nga aldaw manipud ita, ket ti Ninive maracracto.

⁵ Ket dagiti tattao a taga Ninive pinatida ti Dios; ket inwarragawagda ti panagayunar, ket nagcawesda iti nakersang a lupot manipud cangatoan inggana iti cababaan.

⁶ Ket dimteng daytoy a damag iti ari ti Ninive, ket isu timmacder iti tronona, ket iniccatna ti lambon, ket nagcagay iti lupot a nakersang, ket nagtugaw iti dapu.

⁷ Ket nangaramid iti pacdaar ken inwarragawagna idiay Ninive babaen ti bilin ti ari ken dagiti natan-oc a tattaona, a kinunana, Tattao ken an-animal, arban ken pangen, dida coma mangan iti aniaman; saanda coma a pagaraben ida wenno painumen iti danum;

⁸ Ket maabbonganda coma iti lupot a nakersang dagiti tattao ken dagiti an-animal, ket awaganda coma ti Dios iti natbag unay: wen, isuda agbabawida coma tunggal maysa iti dalanna a dakes, ken iti panagranggas nga adda cadagiti imana.

⁹ Siasino ti macaammo no ti Dios ibawingnanto ken ibabawinanto ti narungsot a pungtotna, tapno ditayto mapucaw?

¹⁰ Ket ti Dios nakitana dagiti aramidda, a nagtuckiadda iti dakes a dalanda; ket ti Dios imbabawina ti dakes nga imbagana idi nga aramidenna coma cadacuada; ket saanna nga inaramid.