Joel 3 - Ti Biblia (1973)

Dagiti nasnacion maocomdanto, ket ti Juda maispal.

¹ Ta, adtoy, cadagita nga al-aldaw, ken iti dayta a pannawen a panangbaliwco iti pannacacayaw ti Juda ken ti Jerusalem.

² Tiptiponecto dagiti amin a nacion, ket pasalugecto ida idiay lobong a Josafat; ket idiay aramidecto ti panangocom cadacuada a maipaay iti ilic ken iti pagtawidec nga Israel, isuda a winarawarada cadagiti nasnacion: ket biningbingayda ti dagac,

³ Ket naggiginnasangasatanda ti ilic, ket insucatda ti maysa nga ubing a lalaki iti maysa a balangcantis, ket inlacoda ti maysa nga ubing a babai, iti arac, tapno mabalinda ti uminum.

⁴ Wen, ket dacayo aniacayo caniac, O Tiro, ken Sidon, ken amin a beddeng ti Filistia? Supapacandacto aya? Ket no supapacandac, sidadaras ken sipapartacac a mangisubli iti supapacyo iti rabaw dagiti oloyo met laeng.

⁵ Gapu ta innalayo ti piracco ken ti balitocco, ket impanyo cadagiti temployo dagiti napintas ken napateg a gamengco.

⁶ Ket inlacoyo dagiti annac ti Juda ken dagiti annac ti Jerusalem a maipaay cadagiti annac dagiti Griego, tapno mayadayuyo ida iti beddengda;

⁷ Adtoy, itacderconto ida a paruaren iti disso a nangilacoanyo cadacuada, ket isublicto ti supapacyo iti rabaw dagiti oloyo met laeng;

⁸ Ket ilacocto dagiti annacyo a lallaki ken babbai iti ima dagiti annac ni Juda, ket isuda ilacodanto ida cadagiti lallaki a taga Saba, iti maysa a nacion nga adayu; ta sinao ni Jehova.

⁹ Iwarragawagyo daytoy cadagiti nacion; isaganayo ti gubat; riingenyo dagiti maingel a lallaki; amin coma dagiti lallaki ti gubat umasidegda, umayda coma.

¹⁰ Pitpitenyo dagiti tadem dagiti aradoyo nga aramiden a camcampilan, ken dagiti cumpay a pagputed a gaygayang: dagiti nacapsot cunaenda coma, napigsaac.

¹¹ Agdarascayo, ket umaycayo, dacayo amin a nacion iti aglicmut, ket aguurnongcayo: idiay paulogem dagiti mamaingelmo, O Jehova.

¹² Dagiti nacion agriingda coma, ket sumang-atda idiay lobong a Josafat: ta idiay agtugawacto a mangocom cadagiti amin a nacion iti aglicmut.

¹³ Icabilyo ti cumpay; ta ti apiten natangkenanen: Umaycayo, agpayatpayatcayo; ta iti pagpespesan ti arac napno, dagiti tangke agliplippiasda; ta ti kinadakesda dackel.

¹⁴ Umariwecwec, umariwecwec a tattao idiay lobong a pangocoman! ta asidegen ti aldaw ni Jehova idiay lobong ti pangocoman.

¹⁵ Ti init ken ti bulan agcudrepda, ket dagiti bitbitwen ipaidamda ti silengda.

¹⁶ Ket ni Jehova, agungorto manipud Sion, ket yebcasnanto ti timecna manipud Jerusalem; ket dagiti langlangit ken ti daga agkintayegdanto: ngem ni Jehova isu ti pagcamanganto ti ilina, ken sarikedked cadagiti annac ti Israel.

¹⁷ Iti casta mabigbigyonto a siac ni Jehova a Diosyo a sitataeng idiay Sion a nasantoan a bantayco: calpasanna ti Jerusalem nasantoanton ket awanton dagiti gangannaet a lumasat kencuana.

¹⁸ Ket maaramidto iti dayta nga aldaw, a dagiti banbantay pagtedtedendanto ti nasam-it nga arac, ket dagiti turturod pagayusendanto ti gatas, ket amin dagiti wawaig ti Juda agayusdanto cadagiti dandanum; ket rumuarto ti maysa a burayoc iti balay ni Jehova, ken sibugannanto ti lobong ti Sittim.

¹⁹ Ti Egipto maysanto a langalang, ket ti Edom maysanto a nalangalang a let-ang, maipuon iti ranggas a naaramid cadagiti annac ni Juda, ta imbucbocda ti awan basolna a dara iti dagada.

²⁰ Ngem ti Juda agnaedto iti agnanayon, ken ti Jerusalem manipud caputotan agingga iti caputotan.

²¹ Ket dalusacto ti darada, a saanco a dinalusan: ta ni Jehova agnaed idiay Sion.